سۋرەتتى تۇسىرگەن – ەرلان ومار, «ەQ»
ءيا, ءبىز – باتامەن كوگەرگەن ەلمىز. اتالى سوزگە توقتاپ, ءبىر كۇننىڭ عانا ەمەس, ارعى-بەرگى بولاشاعىمىزدىڭ قامىمەن قارەكەت قىلعان ەلمىز. جىر الىبى جامبىل ايتپاقشى, «جىگەرلى بولسا, ەر بولار, بىرلىكتە بولسا, ەل بولار» دەگەن دانالىق ءسوزدىڭ قاسيەتىن ۇعىنىپ, ىنتىماققا ۇمتىلدىق. اسىلىندە, ەل ءىشى الا تايداي ءب ۇلىنىپ, بىرلىكتەن كەتسە, الەۋمەتتىك-ەكونوميكالىق الەۋەتىمىز دامىماق تۇرماق, تاۋەلسىزدىگىمىز بەن تۇراقتىلىعىمىزدى ۇستاپ تۇرۋ وڭايعا سوقپاس ەدى.
حالىق بىرلىگى دەمەكشى, بۇل – كەز كەلگەن مەملەكەتتىڭ كۇرەتامىرى, ونىڭ ىرگەتاسىن قالاپ, بولاشاققا باستار بەرىك باعدارى. بەيبىتشىلىك پەن تۇراقتىلىقتى, ىنتىماق پەن كەلىسىمدى ۇلتتىڭ ەڭ ۇلكەن بايلىعى رەتىندە باعالايتىن مەملەكەتىمىز بۇل باعىتتا زور جەتىستىككە قول جەتكىزدى. قوعامدىق كەلىسىمدى تۋ ەتىپ ۇستانۋ ارقىلى عانا ءبىز بولاشاقتا قۋاتتى, وركەنيەتتى, دامىعان مەملەكەت قۇرۋ جولىنداعى ۇلى مۇراتتارىمىزدى ىسكە اسىرا الامىز.
قوعامداعى بىرلىك پەن كەلىسىم – تاۋەلسىزدىگىمىزدىڭ مىزعىماس تۇعىرى. بۇل – جاي ءسوز ەمەس, ۋاقىت پەن تاجىريبە دالەلدەگەن تاريحي اقيقات. وسى تۇرعىدان العاندا, ەل ومىرىندەگى ماڭىزى اسا زور ساياسي قۇرىلىم – قازاقستان حالقى اسسامبلەياسى قوعامدىق بىرلىكتىڭ رامىزىنە اينالدى. ەل پرەزيدەنتى توراعالىق ەتەتىن بۇل ينستيتۋت شيرەك عاسىردان اسا ۋاقىت بويى حالىقتى ورتاق ماقساتقا جۇمىلدىرىپ, ەلدىڭ ىشكى تۇراقتىلىعى مەن دامۋ ۇدەرىسىنە سۇبەلى ۇلەس قوسىپ كەلەدى.
مەملەكەت باسشىسى قاسىم-جومارت توقاەۆتىڭ جۋىردا وتكەن قازاقستان حالقى اسسامبلەياسىنىڭ 30 جىلدىق مەرەيتويىنا ارنالعان سالتاناتتى جيىندا «بىرلىك ۇعىمى قازىرگى دۇنيە جۇزىندەگى تۇراقسىز جاعدايدا اسا ماڭىزدى. الەمدە, اسىرەسە, ءبىزدىڭ اينالامىزداعى كەيبىر ەلدەردە نە بولىپ جاتقانىنا ءبارىمىز كۋا بولىپ وتىرمىز. سوندىقتان شىن مانىندە, «بىرلىك بار جەردە عانا تىرلىك بار». بۇل – اقيقات», دەگەنى ەل بولاشاعىنىڭ باياندى بولۋىنىڭ قامى ەمەس پە؟
بىرلىگىمىزدىڭ باستى سيمۆولى بولىپ وتىرعان اسسامبلەيانىڭ باستى ەرەكشەلىگى – ەلدەگى بارلىق ەتنوستى ءبىرتۇتاس ازاماتتىق قوعام اياسىنا, يدەولوگيالىق ينستيتۋتتىڭ شاڭىراعى استىنا بىرىكتىرىپ, ولاردىڭ مادەني, تىلدىك, ءدىني ەرەكشەلىكتەرىن ساقتاي وتىرا دامۋىنا مۇمكىندىك بەرگەندىگىندە. قازىرگى تاڭدا ەلىمىزدە تۇرىپ جاتقان ەتنوستاردىڭ مادەني ورتالىقتارى, ءتىلى مەن ءدىنىن دامىتۋعا ارنالعان 500-دەن اسا ەتنومادەني بىرلەستىك جۇمىس ىستەيدى.
پرەزيدەنت قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا سويلەگەن سوزىندە ەلىمىز قارقىندى دامۋى ءۇشىن ونداعان جىل بويى قوردالانعان كوپ ماسەلەنى شەشۋىمىز قاجەتتىگىن باسا ايتتى. ال ول ءۇشىن حالىقتىڭ كۇش-جىگەرىن ورتاق مۇددەگە بىرىكتىرۋ, ءبىر ماقساتقا باعىتتاۋ اۋاداي قاجەت دۇنيە ەكەنىن ەسكە سالدى.
ء«بىز كۇش-جىگەرىمىزدى بىرىكتىرۋ ارقىلى عانا بولاشاق جەتىستىكتەردىڭ بەرىك تۇعىرىن قالاپ, ساياساتتا, ەكونوميكادا, مادەنيەتتە جانە الەۋمەتتىك سالادا تۇبەگەيلى وزگەرىستەر جاساي الامىز», دەي كەلە مەملەكەت باسشىسى ءدال سول سەبەپتى اسسامبلەيا سەسسياسىنىڭ «بىرلىك. جاسامپازدىق. ورلەۋ» دەپ اتالعانىن اتاپ ءوتتى. «سىزدەر مۇنىڭ وزەكتى ەكەنىن تۇسىنەسىزدەر دەپ ويلايمىن. قازاقستان حالقى اسسامبلەياسىنىڭ عانا ەمەس, بارشا حالقىمىزدىڭ ستراتەگيالىق باعدارىنىڭ تۇپكى ءمانىن وسى ءۇش ۇعىم ءدال ءارى ناقتى بىلدىرەدى. باستى ميسسيامىز – جاساۋ, قۇرۋ, جۇزەگە اسىرۋ. بىرلىك پەن ىنتىماق باستى قۇندىلىعىمىز ءارى مەملەكەتتىك ساياساتتىڭ بۇلجىماس باعدارى بولىپ قالا بەرەدى», دەدى قاسىم-جومارت توقاەۆ.
اسسامبلەيا باستاماسىمەن بۇگىندە 40-تان اسا دوستىق ءۇيى مەن قوعامدىق كەلىسىم ورتالىقتارى ەل بىرلىگىنە قىزمەت ەتىپ كەلەدى. بۇل مەكەمەلەر تەك ەتنوسارالىق ديالوگ الاڭى ەمەس, سونىمەن قاتار جاستاردى تاربيەلەۋ, قۇقىقتىق ساۋاتتى ارتتىرۋ, مەدياتسيانى دامىتۋ سياقتى ماڭىزدى الەۋمەتتىك مىندەتتەردى دە ىسكە اسىرادى.
قازاقستان حالقى اسسامبلەياسىنىڭ ارقاسىندا ەتنوستىق جانە ءدىني ەرەكشەلىگىنە قاراماستان, ءاربىر ازاماتتىڭ كونستيتۋتسيامەن بەكىتىلگەن قۇقىقتارى مەن ەركىندىكتەرىن تولىق پايدالانۋىنا جاعداي جاسالدى. بۇل – ەلىمىزدەگى ەتنوسارالىق ءارى كونفەسسياارالىق كەلىسىمنىڭ ايرىقشا ۇلگىسى, حالىقارالىق قاۋىمداستىق تاراپىنان دا مويىندالعان تاجىريبە.
اسسامبلەيا ەتنوسارالىق قاتىناستار سالاسىندا مەملەكەتتىك ورگاندار مەن ازاماتتىق قوعام ينستيتۋتتارى اراسىنداعى ءتيىمدى ءوزارا ءىس-قيمىلدى قامتاماسىز ەتەتىن نەگىزگى تەتىككە اينالىپ وتىر. بۇل ءوز كەزەگىندە ۇلتتىق قاۋىپسىزدىكتىڭ ماڭىزدى قۇرامداس بولىگى رەتىندە باعالانادى. مىنە, وسىنداي بىرلىك پەن كەلىسىم جولى – ەلىمىزدىڭ تابىستى دامۋىنىڭ باستى كىلتى بولىپ وتىر. وسى قۇندىلىقتاردى ساقتاپ, ۇرپاق ساناسىنا سىڭىرە بىلسەك, كەلەشەگىمىز كەمەل, مەملەكەتىمىز قۋاتتى بولماق.
