فوتو: مقىا ءباسپاسوز قىزمەتى
جيىنعا كولىك پروكۋراتۋراسىنىڭ, كولىك جانە ىشكى ىستەر مينيسترلىكتەرىنىڭ, تەحنيكالىق رەتتەۋ جانە مەترولوگيا كوميتەتىنىڭ, سونداي-اق «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ وكىلدەرى قاتىستى.
وتىرىستا حالىقارالىق اۆتوكولىك تاسىمالدارى جانە كولىك قۇرالدارىن تىركەۋ سالاسىنداعى مەملەكەتتىك قىزمەتتەردىڭ ساپاسى قارالدى. اگەنتتىك جۇرگىزگەن باقىلاۋ ناتيجەسىندە بۇل باعىتتا 1800-دەن استام قۇقىقبۇزۋشىلىق انىقتالعان. ولاردىڭ قاتارىندا قىزمەت كورسەتۋ مەرزىمدەرىنىڭ ساقتالماۋى, ارتىق قۇجاتتار تالاپ ەتىلۋى, نەگىزسىز باس تارتۋلار جانە رەگلامەنت تالاپتارىنىڭ بۇزىلۋى سياقتى ماسەلەلەر بار.
تالقىلاۋ بارىسىندا وتىنىمدەردى قاراۋ مەرزىمىنىڭ كەشىگۋىنە اكەلىپ وتىرعان بىرقاتار جۇيەلى تۇيتكىلدەرگە نازار اۋدارىلدى. اتاپ ايتقاندا, اقپاراتتىق جۇيەلەردەگى ءجيى تەحنيكالىق اقاۋلار, ۋاكىلەتتى ورگاندار مەن تاسىمالداۋشىلار اراسىنداعى ءوزارا ءىس-قيمىلدىڭ جەتكىلىكسىز اشىقتىعى جانە ۇيلەسىمسىزدىگى ءسوز بولدى.
كەڭەس قورىتىندىسى بويىنشا اقپاراتتىق جۇيەلەردىڭ تۇراقتى جۇمىسىن قامتاماسىز ەتۋ, ولاردى ينتەگراتسيالاۋ جانە ۆەدومستۆوارالىق ءوزارا ءىس-قيمىلدى جەتىلدىرۋ جونىندە ناقتى ۇسىنىستار ايتىلدى.
ايتا كەتەيىك, مەملەكەتتىك قىزمەت ىستەرى اگەنتتىگى مەملەكەتتىك قىزمەت كورسەتۋ ساپاسىن ارتتىرۋ جانە قىزمەت الۋشىلاردىڭ قۇقىقتارىن قورعاۋ باعىتىنداعى جۇيەلى جۇمىسىن جالعاستىرا بەرمەك.
