ءبىر عاسىرلىق تاريحى بار قارا شاڭىراق – ەلىمىزدەگى تۇڭعىش جوعارى وقۋ ورنى رەتىندە مىڭداعان بىلىكتى ۇستازداردى دايىنداپ, قازاق ەلىنىڭ اعارتۋ سالاسىنا وراسان ۇلەس قوسىپ كەلەدى.
اشىق ەسىك كۇنىنىڭ رەسمي بولىگىندە اكادەميالىق ماسەلەلەر جونىندەگى دەپارتامەنت ديرەكتورى حايرۋللا جانبەكوۆ ءسوز سويلەپ, تۇلەكتەرگە ساتتىلىك تىلەدى. سونىمەن قاتار, بيىلعى ۇلتتىق بىرىڭعاي تەستىلەۋدەن ەڭ جوعارى – 140 بالل جيناعان الماتى وبلىسى, ەڭبەكشىقازاق اۋدانى, "تولقىن" ورتا مەكتەبىنىڭ تۇلەگى قۋاندىق سانجار عالىمجان ۇلى ارنايى ماراپاتتالىپ, ەستەلىك سىيعا يە بولدى.
شارا اياسىندا ۋنيۆەرسيتەتتىڭ ءسان جانە ديزاين كافەدراسىنىڭ ستۋدەنتتەرى دايىنداعان ءسان ۇلگىلەرى كوپشىلىك نازارىنا ۇسىنىلدى. سونداي-اق, الماتى وبلىسى ءبىلىم باسقارماسىنىڭ وكىلى يمانحاتوۆا گۋلجيحان تۇلەكتەرگە قۇتتىقتاۋ ءسوز ارنادى.
اشىق ەسىك كۇنى بارىسىندا فاكۋلتەتتەر جارمەڭكەسى وتكىزىلىپ, 15 جىلدىق تاجىريبەسى بار پەداگوگ-پروفوريەنتولوگ وماربەك كوشكىمباي ۇلى "ماماندىقتى دۇرىس تاڭداۋ مەن گرانتقا ءتۇسۋ جولدارى" تاقىرىبىندا ءدارىس وقىدى.
كاسىبي باعدار بەرۋ جانە مانساپتى دامىتۋ دەپارتامەنتىنىڭ ديرەكتورى الماس ءابدىماناپ ۇلى نايمانباەۆ «قازىرگى تاڭدا وقۋ وردامىزدا توعىز فاكۋلتەت بار. ولار سوربوننا-قازاقستان ينستيتۋتى, ماتەماتيكا, فيزيكا جانە ينفورماتيكا فاكۋلتەتى, پەداگوگيكا جانە پسيحولوگيا فاكۋلتەتى, جاراتىلىستانۋ جانە گەوگرافيا فاكۋلتەتى, فيلولوگيا فاكۋلتەتى, تاريح جانە قۇقىق فاكۋلتەتى, ونەر فاكۋلتەتى, دەنە شىنىقتىرۋ جانە العاشقى اسكەري دايىندىق فاكۋلتەتى جانە استانا ءبىلىم بەرۋ كافەدراسى. ولاردىڭ ارقايسىسى زاماناۋي, ساپالى مامان دايىنداۋ ءۇشىن ۋاقىت سۇرانىسىنا ساي بەيىمدەلگەن. بۇگىنگى اشىق ەسىك كۇنىنە الماتى قالاسى مەن الماتى جانە جەتىسۋ وبلىستارىنان جالپى سانى 500-گە جۋىق وقۋشى كەلىپ قاتىستى» - دەيدى.
شارا كونتسەرتتىك باعدارلامامەن جانە ۆيكتورينالىق سۇراقتارمەن جالعاستى.
