باس قوسۋعا قازاقستاننىڭ عىلىمي جانە ءبىلىم بەرۋ قاۋىمداستىعىنان 100-دەن استام وكىلدەر, سونداي-اق قىتاي, رەسەي, پولشا, ءۇندىستان, قىرعىزستان جانە باسقا ەلدەردەن كەلگەن ساراپشىلار قاتىستى.
ماڭىزدى جيىندى اشىپ ءسوز سويلەگەن پرەزيدەنتتىك ورتالىعىنىڭ ديرەكتورى باقىتجان تەمىربولات:
«بۇگىندە ءبىز قارقىندى وزگەرىستەر داۋىرىندە ءومىر ءسۇرىپ جاتىرمىز, بۇل كەزەڭدە عىلىم جاھاندىق ماسەلەلەردى شەشۋدە بارعان سايىن ماڭىزدى ءرول اتقارىپ جاتىر. كليماتتىڭ وزگەرۋى, ەنەرگەتيكالىق داعدارىس, رەسۋرستاردىڭ تاپشىلىعى, تسيفرلىق قاۋىپسىزدىك جانە باسقا دا وتكىر ماسەلەلەر يننوۆاتسيالىق كوزقاراستار مەن عىلىمي شەشىمدەردى تالاپ ەتەدى. قازاقستان پرەزيدەنتى ق.ك.توقاەۆ عىلىم قىزمەتكەرلەرى كۇنىنە ارنالعان ءوز سوزىندە: «عىلىم شىڭىنا اپارار جول – قيىن. بۇل جولدا تەك ءوز ىسىنە شىن بەرىلگەن, ەڭبەكقور, تاباندى جانە شىعارماشىل جاندار عانا قيىندىقتارعا توتەپ بەرە الادى. شىن مانىندە وزىق ۇلتقا اينالۋ ءۇشىن وسى قۇندىلىقتاردى قوعامعا ءسىڭىرۋىمىز قاجەت», دەپ اتاپ ءوتتى. بۇگىنگى كونفەرەنتسيامىز الىس-جاقىن شەتەلدەر مەن قازاقستان وكىلدەرىن بىرىكتىرىپ, تاجىريبە الماسۋعا, بىرلەسكەن عىلىمي زەرتتەۋلەردى باستاۋعا, اكادەميالىق اشىقتىقتى كەڭەيتۋگە جاعداي جاساپ, وسى ۇدەرىستەرگە ءوز ۇلەسىن قوسادى», دەدى.
سونداي-اق, اتالعان جيىننىڭ ماڭىزى تۋرالى پىكىر بىلدىرگەن Astana International University ءبىرىنشى ۆيتسە-پرەزيدەنتى انار مىرزاگاليەۆا حانىم, بۇل رەتكى كونفەرەنتسيا ەلىمىزدىڭ ءبىلىم جانە عىلىم سالاسىنداعى جاھاندىق ۇدەرىستەرگە بەلسەندى قاتىسۋىنىڭ ايعاعى ەكەنىنە توقتالىپ:
ء«بىز ءۇشىن بۇل تەك پىكىر الماسۋ الاڭى عانا ەمەس, سونىمەن قاتار بولاشاقتاعى حالىقارالىق ارىپتەستىكتەر مەن ورتاق جوبالارعا باستاما بولاتىن ماڭىزدى قادام. قاتىسۋشىلار مەن سپيكەرلەردىڭ اۋقىمى بۇل الاڭنىڭ وزەكتىلىگىن جانە ماڭىزدىلىعىن دالەلدەپ وتىر. عىلىم مەن بىلىمگە نەگىزدەلگەن دامۋ – ەلىمىزدىڭ ستراتەگيالىق تاڭداۋى», دەدى.
ايتا كەتۋ كەرەك, كونفەرەنتسيا باعدارلاماسى تسيفرلاندىرۋ, گەنەراتيۆتى جاساندى ينتەللەكتىنى پايدالانۋ, جاھاندىق ەكونوميكا, كرەاتيۆتى يندۋستريالار, حالىقارالىق ىنتىماقتاستىق, گۋمانيتارلىق جانە جاراتىلىستانۋ عىلىمدارى, سونداي-اق جاھاندىق ترەندتەر اياسىندا ءبىلىم بەرۋدى دامىتۋ پەرسپەكتيۆالارى سياقتى نەگىزگى باعىتتاردى قامتىدى. سونىمەن قاتار, اتالعان جيىن عىلىمي پىكىر الماسۋ الاڭى عانا ەمەس, سونىمەن قاتار اكادەميالىق قاۋىمداستىق, مەملەكەتتىك قۇرىلىمدار مەن حالىقارالىق ۇيىمدار وكىلدەرى اراسىنداعى تىعىز بايلانىستاردى ورناتۋعا مۇمكىندىك بەرەدى.
