جاپونيانىڭ وساكا قالاسىندا ءوتىپ جاتقان EXPO 2025 دۇنيەجۇزىلىك كورمەسىندە قازاقستان پاۆيلونى 100 مىڭىنشى قوناعىن قارسى الدى. بۇل مارتەبەلى قوناق – نارا قالاسىنىڭ 37 جاستاعى تۇرعىنى, جەكە قارجىلىق باستامالار قاۋىمداستىعىنىڭ جوبا مەنەدجەرى اكيبا اكيحيتو.
اكيحيتو مىرزا پاۆيلونداعى ەكسپوزيتسيالارعا ءتانتى بولعانىن ايتىپ, قازاق حاندىعىنىڭ تاريحى مەن زاماناۋي تەحنولوگيالاردىڭ ۇيلەسىمىنە ەرەكشە نازار اۋداردى. ول «ALEM» قۇرىلعىسىن كورىپ, قازاقستاننىڭ تەرەڭ تاريحى مەن بولاشاققا دەگەن كوزقاراسىنىڭ ۇيلەسىمدىلىگىن جوعارى باعالادى. سونىمەن قاتار, قازاقستاننىڭ مادەنيەتىمەن جاقىنىراق تانىسۋ ءۇشىن تۇركىستانعا بارعىسى كەلەتىنىن ءبىلدىردى.
قازاقستاننىڭ جاپونياداعى توتەنشە جانە وكىلەتتى ەلشىسى ەرلان باۋداربەك-قوجاتاەۆ اكيحيتو مىرزانى قۇتتىقتاپ, وعان «Karavansaray Turkistan» تۋريستىك كەشەنىنە ەكى ادامعا ارنالعان ساپار سەرتيفيكاتى مەن ەستەلىك سىيلىقتار تابىس ەتتى.
قازاقستان پاۆيلونى ءتورت نەگىزگى ايماقتان تۇرادى: تاريح, مادەنيەت, ەكونوميكا جانە يننوۆاتسيا. پاۆيلوننىڭ تۇجىرىمداماسى شاڭىراق سيمۆولىنا نەگىزدەلگەن جانە 3D مەپپينگ, يممەرسيۆتى پروەكتسيالىق شوۋ سياقتى زاماناۋي تەحنولوگيالارمەن جابدىقتالعان. سونىمەن قاتار, پاۆيلوندا ەلىمىزدىڭ ينۆەستيتسيالىق جانە ەكونوميكالىق الەۋەتى, تابيعي رەسۋرستارى, تۋريستىك جانە يننوۆاتسيالىق مۇمكىندىكتەرى, «جاسىل» ەنەرگەتيكا جانە تۇراقتى دامۋ سالاسىنداعى جەتىستىكتەرى كورسەتىلگەن.
ايتا كەتەيىك, EXPO 2025 كورمەسى 13 ساۋىردە باستالىپ, 13 قازانعا دەيىن جالعاسادى. كورمەگە 158 ەل مەن 9 حالىقارالىق ۇيىم قاتىسىپ جاتىر.
