فوتو: اتىراۋ وبلىسىنىڭ اكىمدىگى
فورۋمنىڭ سالتاناتتى اشىلۋىندا اتىراۋ وبلىسىنىڭ اكىمى سەرىك شاپكەنوۆ پەن قر مادەنيەت جانە اقپارات مينيسترلىگىنىڭ جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ قاتىسۋشىلارعا ساتتىلىك تىلەپ, جۇمىسشى ماماندىقتارىنىڭ قوعامداعى ماڭىزىن اتادى.
ءوز كەزەگىندە سەرىك شاپكەنوۆ فورۋمنىڭ كاسىبي دامۋ الاڭى عانا ەمەس, جاڭا يدەيالار مەن ۇلكەن مۇمكىندىكتەرگە جول اشاتىن بىرەگەي پلاتفورما ەكەنىن اتاپ ءوتتى.
«قۇرمەتتى جاستار! سىزدەر – ەلىمىزدىڭ ناقتى تىرەگى, ەكونوميكامىزدىڭ قوزعاۋشى كۇشى, ەل ەرتەڭىنىڭ يەسى سانالاتىن ەڭبەك مايدانىنىڭ جاس ساربازىسىزدار. مەملەكەت باسشىسىنىڭ 2025 جىلدى جۇمىسشى ماماندىقتارىنىڭ جىلى دەپ جاريالاۋى – قوعامدا ەڭبەكقورلىق پەن كاسىبي شەبەرلىكتى ۇلىقتاۋعا باعىتتالعان تاريحي شەشىم. اتىراۋ وبلىسى – قازاقستاننىڭ ەڭ ءىرى يندۋستريالىق-وندىرىستىك ايماقتارىنىڭ ءبىرى. ولكەمىزدە الەمدىك دەڭگەيدەگى ءوندىرىس ورىندارىنىڭ قاتىسۋىمەن ەلىمىزدىڭ مۇناي-گاز سالاسىنداعى ءىرىجوبالار جۇزەگە اسىرىلىپ جاتىر. ءوندىرىس وشاقتارىن ىسكە قوساتىن دا, ەكونوميكانىڭ ناقتى سەكتورىن العا سۇيرەيتىن دە – جۇمىسشى مامانداردىڭ قاجىرلى ەڭبەگى مەن كاسىبي شەبەرلىگى. سوندىقتان بۇگىنگى فورۋم وسى باعىتتاعى ماقسات-مۇددەلەردى جۇزەگە اسىرۋ جولىنداعى ماڭىزدى الاڭ بولارىنا سەنىمدىمىن», دەدى س.شاپكەنوۆ.
فورۋم اياسىندا «قازاقستاننىڭ ەڭبەك نارىعى جانە جۇمىسشى ماماندىقتارىنىڭ كەلەشەگى» اتتى پلەنارلىق وتىرىس پەن TEDx ۇلگىسىندەگى «Isker talks» كونفەرەنتسياسى ءوتتى. قاتىسۋشىلار ءۇش باعىتتا وقىتۋ كۋرستارىنان ءوتىپ, ترەنينگتەرگە قاتىستى. سپيكەر رەتىندە قر پارلامەنتىنىڭ دەپۋتاتتارى, مينيسترلىكتەر مەن ءىرى كومپانيالاردىڭ وكىلدەرى شاقىرىلدى.
سونداي-اق جاستار جاڭادان اشىلعان «Atyrau faces» جۇمىسشى ماماندىقتار كورمەسىن تاماشالادى. فورۋم سوڭىندا جۇمىسشى جاستار اللەياسى اشىلىپ, ەڭ ۇزدىك جوبالارعا جالپى 3 ميلليون تەڭگە كولەمىندە ميني-گرانتتار تابىستالماق.
ايتا كەتەيىك, اتىراۋ وبلىسىنداعى 24 تەحنيكالىق جانە كاسىپتىك ءبىلىم بەرۋ ۇيىمىنىڭ 18-ءى جۇمىسشى ماماندىقتارىنا ماماندار دايارلايدى. جاستارعا 3600-دەن استام مەملەكەتتىك گرانت بولىنگەن.
