تۇنگى ۇيقى – جاي عانا دەمالىس ەمەس. ول – ادامنىڭ جۇيكە جۇيەسىن تىنىقتىرىپ, ويلاۋ قابىلەتىن جاڭارتىپ, بۇكىل اعزانى قالپىنا كەلتىرەتىن ەڭ ماڭىزدى مەزەت. الايدا وسى تىنىشتىقتى ەڭ الدىمەن سمارتفوندار بۇزىپ وتىر. عالىمداردىڭ ايتۋىنشا, جاستار اراسىندا ۇيقى بۇزىلىسىنىڭ باستى سەبەبى – الەۋمەتتىك جەلىگە تاۋەلدىلىك.
بۇرىن تەك ەكران جارىعىنىڭ ۇيقى ساپاسىنا اسەر ەتەتىنى ايتىلسا, قازىر ماسەلە تەرەڭدەي تۇسكەن. قازىر باستى قاۋىپ ەكراننان عانا ەمەس, الەۋمەتتىك جەلىلەردەگى كونتەنت پەن ادامنىڭ وعان ەموتسيالىق بايلانىسىنان تۋىنداپ وتىر.
2024 جىلى جۇرگىزىلگەن اۋقىمدى زەرتتەۋلەر وسىنى دالەلدەپ وتىر. الەۋمەتتىك جەلىلەرگە ءجيى كىرۋ, ونداعى اقپاراتتاردى شەكتەن تىس تۇتىنۋ – ۇيقىنى بۇزاتىن نەگىزگى فاكتور. ادام نەعۇرلىم تەلەفونعا كوپ قاراسا, مي سوعۇرلىم دەمالمايدى.
جەلىدە وتىرعان ادام جاتىپ الىپ وزگەلەردىڭ ءومىرىن باقىلاپ, ءوزىن وزگەمەن سالىستىرادى. ناتيجەسىندە: «مەن جەتىستىككە جەتكەن جوقپىن», «باسقالار بارىنە ۇلگەرىپ جاتىر؟» دەگەن مازاسىز ويلار ميعا ورنىعىپ الادى. عالىمدار مۇنى كوگنيتيۆتى بەلسەندىلىك دەپ اتايدى – ياعني مي تىنىش كۇيگە كوشە الماي, بەلسەندى كۇيدە قالىپ قويادى. ال ول ۇيقىنى بۇزادى.
سونىمەن قاتار الەۋمەتتىك جەلىگە كىرىپ, جاڭالىق قاراماسا, بىردەڭەدەن قۇر قالعانداي كۇي كەشۋ دە ۇيقىنى بۇزاتىن نەگىزى فاكتور. بۇل – FOMO سيندرومىنىڭ كورىنىسى. ء«بىر نارسەدەن قالىپ قويمايمىن با؟» دەگەن قورقىنىش ادامدى تەلەفوننان الىستاتپايدى. سونىڭ سالدارىنان ۇيقىنىڭ ۇزاقتىعى قىسقارادى, ساپاسى تومەندەيدى. ال ۇيقىسى قانباعان ادامنىڭ ويلاۋ قابىلەتى السىرەيدى, شىدامسىز بولا باستايدى.
ماماندار ەڭ الدىمەن, ۇيىقتاردان كەمىندە ءبىر ساعات بۇرىن تەلەفوندى قولدانباۋعا كەڭەس بەرەدى. بۇل كەزدە ادام ميىن تىنىشتالىپ, اعزاسىن ۇيقىعا دايىندايدى. سونىمەن قاتار جاعىمسىز جاڭالىقتار مەن ءمىنسىز ءومىر تۋرالى جازبالاردان وقىماۋ ماڭىزدى. ءار قوسىمشانى اشقان سايىن وزىڭىزگە: «مەن نەلىكتەن ءدال قازىر وسىنى اشتىم؟» دەگەن سۇراق قويۋ بۇل ويسىز ارەكەتتەردىڭ الدىن الادى ەكەن.
ۇيقىنىڭ ماڭىزىن زەرتتەۋشى نەيروبيولوگ مەتتيۋ ۋولكەردىڭ ايتۋىنشا, ۇيقى – جاي عانا فيزيولوگيالىق قاجەتتىلىك ەمەس. ول – ادامنىڭ ىشكى الەمىنىڭ تىنىشتىعى, جان دۇنيەسىنىڭ تەپە-تەڭدىگى, ومىرگە دەگەن قۇلشىنىسىنىڭ كەپىلى. تۇندە تەلەفون ۇستاماۋ – كوزدى عانا ەمەس, ويدى دا, جۇرەكتى دە تىنىقتىرادى. «ۇيقى ارقىلى ءبىز كۇندىزگى اۋىرتپالىقتان ارىلىپ, ىشكى الەمىمىزدى قالپىنا كەلتىرەمىز», دەيدى عالىم.
