اتىراۋدا تانىسىن ءولتىرۋشى 15 جىل جازاعا كەسىلدى

اتىراۋ. 12 اقپان. اتىراۋ وبلىسىنىڭ مامانداندىرىلعان اۋدانارالىق قىلمىستىق سوتىنىڭ ءوز تانىسىن قاتىگەزدىكپەن ءولتىرۋشىنى 15 جىلعا سوتتاۋعا شىعارعان ۇكىمى وزگەرىسسىز قالدىرىلدى. بۇل تۋرالى وبلىستىق سوتتىڭ ءباسپاسوز قىزمەتى حابارلادى. بۇعان دەيىن, ياعني, بىلتىرعى 12 جەلتوقساندا ءبىرىنشى ساتىداعى سوتتىڭ شىعارعان ۇكىمىمەن ءوزىنىڭ تانىسىن اسا قاتىگەزدىكپەن ءولتىرۋشى قىلمىستىق ارەكەتى ءۇشىن كىنالى دەپ تانىلىپ, وعان 15 جىلعا باس بوستاندىعىنان ايىرۋ جازاسى تاعايىندالعان ەدى. سوتتالۋشىنىڭ   تۇرمەدە وتىرۋ مەرزىمىن قاتاڭ رەجيمدەگى تۇزەۋ كولونياسىندا وتەۋ بەلگىلەنگەن بولاتىن. «كەشە, ياعني, 11 اقپاندا بۇل ءىس اتىراۋ وبلىستىق سوتىنىڭ قىلمىستىق ىستەر جونىندەگى اپەللياتسيالىق سوت القاسىنىڭ سۋدياسى م.ەرعازيەۆتىڭ توراعالىعىمەن وتكەن اشىق سوت وتىرىسىندا قارالدى. سوت وتىرىسىندا قىلمىستىق كودەكستىڭ 96-بابى, 2-بولىگىنىڭ «د» تارماقشاسىمەن (اسا قاتىگەزدىكپەن كىسى ءولتىرۋ) سوتتالۋشى مەن ونىڭ قورعاۋشىسىنىڭ جانە جابىرلەنۋشى جاق وكىلىنىڭ اتىراۋ وبلىسى مامانداندىرىلعان اۋدانارالىق قىلمىستىق سوتى شىعارعان ۇكىمگە قاتىستى اپەللياتسيالىق شاعىمى قاناعاتتاندىرۋسىز, ال ءبىرىنشى ساتىداعى سوتتىڭ ۇكىمى وزگەرىسسىز قالدىرىلدى», دەپ حابارلادى وبلىستىق سوتتىڭ ءباسپاسوز حاتشىسى بورانباي عاليەۆ. اپەللياتسيالىق سوت قاۋلىسى جاريالانعان ساتتەن باستاپ زاڭدى كۇشىنە ەندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: راحىم قويلىباەۆ.