كەزدەسۋ بارىسىندا ساياسي ديالوگتى نىعايتۋ, ساۋدا-ەكونوميكالىق بايلانىستاردى كەڭەيتۋ, كولىكتىك ءوزارا بايلانىستى دامىتۋ, سىن-تەگەۋرىندەر مەن قاۋىپ-قاتەرلەرمەن بىرلەسكەن كۇرەسۋ, سونداي-اق وڭىردەگى ورنىقتى دامۋ مەن ەكولوگيالىق قاۋىپسىزدىك ماسەلەلەرىنە باستى نازار اۋدارىلدى. ورتالىق ازيانىڭ قىتايمەن ءوزارا سىيلاستىق پەن تەڭدىك قاعيداتتارىندا كوپجاقتى ءوزارا ءىس-قيمىلىنىڭ ارحيتەكتۋراسىن جاقسارتۋ جونىندەگى ۇسىنىستار تالقىلاندى.
تاراپتار زاماناۋي سىن-تەگەۋرىندەرگە تەڭشەلگەن كوزقاراستاردىڭ قاجەتتىلىگىن اتاپ ءوتىپ, ءوزارا ءتيىمدى دامۋ جولىنداعى قادامداردى كەلىستى.
مۇرات نۇرتىلەۋ ءوز سوزىندە وڭىردەگى تۇراقتىلىقتى قامتاماسىز ەتۋ ءۇشىن شەشۋشى سالالارداعى ىنتىماقتاستىقتى ودان ءارى كەڭەيتۋ قاجەتتىگىنە نازار اۋدارا وتىرىپ, «ورتالىق ازيا – قىتاي» كوپجاقتى فورماتىن نىعايتۋدىڭ ماڭىزدىلىعىن اتاپ ءوتتى.
«فورماتىمىزدىڭ «ورتالىق ازيا +» تەتىكتەرى اراسىندا فلاگمانعا اينالۋى, ال كوشباسشىلاردىڭ الداعى كەزدەسۋى ماڭگىلىك دوستىق پەن وركەندەۋدىڭ جاڭا كەزەڭىنە قادام باسۋ ءۇشىن بارلىق جاعداي جاسالۋدا», – دەدى قازاقستان ءسىم باسشىسى.
وتىرىسقا قاتىسۋشىلار جاھاندىق سىن-قاتەرلەر جاعدايىندا سىندارلى ديالوگتى جالعاستىرۋدىڭ, بايلانىستاردى دامىتۋدىڭ جانە باسىم باعىتتار بويىنشا كۇش-جىگەردى ۇيلەستىرۋدىڭ ماڭىزدىلىعىنا نازار اۋدارىپ, وسى فورماتتاعى تۇراقتى كەزدەسۋلەرگە دايىن ەكەنىن ءبىلدىردى.
ءىس-شارا قورىتىندىسى بويىنشا سىرتقى ىستەر مينيسترلەرى اقپاراتتىق كومميۋنيكەنى قابىلدادى, وندا «ورتالىق ازيا – قىتاي» فورماتى شەڭبەرىندە تاتۋ كورشىلىك, ورنىقتى دامۋ جانە كوپجاقتى ءوزارا ءىس-قيمىلدى تەرەڭدەتۋ قاعيداتتارىنا ورتاق مىندەتتەمە بەكىتىلدى.
