زاڭ جوباسى ءبىرىنشى وقىلىمدا ماقۇلداندى

كەشە پالاتا سپيكەرى قابيبوللا جاقىپوۆتىڭ توراعالىعىمەن ءماجىلىستىڭ جالپى وتىرىسى ءوتتى. حالىق قالاۋلىلارى  «قازاقستان رەسپۋبليكاسىنداعى باعالاۋ قىزمەتى تۋرالى» زاڭ جوباسىن ىلەسپەلى تۇزەتۋلەرىمەن ءبىرىنشى وقىلىمدا ماقۇلدادى. ءماجىلىس دەپۋتاتى, زاڭناما جانە سوت-قۇقىقتىق رەفورما كوميتەتىنىڭ مۇشەسى مۇحتار تىنىكەەۆتىڭ اتاپ وتكەنىندەي, زاڭ جوباسى ۇكىمەتتىڭ زاڭ جوبالاۋ جۇمىستارىنىڭ 2014 جىلعا ارنالعان جوسپارىنا سايكەس ازىرلەنگەن جانە باعالاۋ قىزمەتى سالاسىنداعى زاڭنامانى ونىڭ رەتتەۋ جۇيەسىن وزگەرتۋ, حالىقارالىق ستاندارتتاردى ەنگىزۋ ارقىلى جەتىل­دىرۋگە باعىتتالعان. زاڭ جوباسى مىندەتتى باعالاۋ تەك قانا مەملەكەتتىك م ۇلىكتى جەكەشەلەندىرۋ, سەنىمگەرلىك باس­قارۋعا نە جالعا (كەيىننەن ساتىپ الۋ قۇقىعىمەن جالعا) بەرۋ ءۇشىن, سونداي-اق, نەكە كەلى­سىم­شارتتارىن جاساسۋ جانە ءمۇ­لىكتىڭ قۇنى تۋرالى داۋ تۋىنداعان جاعدايدا اجىراسۋ­شى ەرلى-زايىپتىلاردىڭ وسى مۇلكىن تاراپتاردىڭ بىرەۋىنىڭ نەمەسە ەكى تاراپتىڭ دا تالاپ ەتۋى بويىنشا ءبولۋ, سالىق سالى­ناتىن بازانى ەسەپتەۋ تۋ­رالى داۋ تۋىنداعان جاعداي­دا سالىقتاردىڭ تولەنۋ دۇ­رىس­تىعىن باقىلاۋ ماقساتىندا باعالاۋ وبەكتىلەرىنە باعالاۋ جۇرگىزىلەتىنى تۋرالى نورمامەن تولىقتىرىلدى. سونداي-اق, ءماجىلىس دەپۋتاتتارىنا تۇراقتى كوميتەتتەر مەن زاڭناما بولىمىنەن كەلىپ تۇسكەن بارلىق ەسكەرتپەلەر مەن ۇسىنىستار قاراستىرىلىپ, تالقىلانعان. سونىمەن قاتار, ءماجىلىس دەپۋتاتتارى «ەۋرازيالىق ەكو­نوميكالىق كوميسسيانىڭ باسە­كەلەستىكتىڭ بىرىڭعاي قاعي­دالارىنىڭ ساقتالۋىن باقىلاۋ جونىندەگى وكىلەتتىكتەردى جۇزەگە اسىرۋى كەزىندە قۇپيا اقپاراتتى قورعاۋ ءتارتىبى جانە ونى جاريا ەتكەنى ءۇشىن جاۋاپتىلىق تۋرالى كەلىسىمدى راتيفيكاتسيا­لاۋ تۋرالى» زاڭ جوباسىن ماقۇلدادى. اسقار تۇراپباي ۇلى, «ەگەمەن قازاقستان».