بۇل تۋرالى كولىك مينيسترلىگىنىڭ ءباسپاسوز قىزمەتى حابارلادى. بۇرىنعى تەمىرجول ۆوكزالدارى بۇزىلىپ, قايتا سالىنادى دەپ جوسپارلانۋدا. جوبا تۋرالى تولىعىراق كولىك ءمينيسترى مارات قاراباەۆ ايتتى.
«ماڭعىستاۋ ۆوكزالىنىڭ اۋدانىن 10 ەسەگە ۇلعايتامىز. تەمىرجول نىسانى زاماناۋي ۇلگىدە جاڭارتىلادى. عيمارات ءۇش قاباتتان تۇرادى. ءبىز ەرەكشە قاجەتتىلىكتەرى بار ادامدارعا قولايلى جاعداي جاساۋعا باسا نازار اۋدارامىز», دەدى ول.
ءمينيستردىڭ ايتۋىنشا, جاڭا ينفراقۇرىلىم بارلىق ساناتتاعى ازاماتتاردىڭ قاجەتتىلىكتەرىنە بەيىمدەلەدى. ۆوكزال عيماراتىندا ۇزاق مەرزىمدى دەمالىس بولمەلەرى, بالالى انالارعا ارنالعان بولمەلەر, كەڭ كۇتۋ زالدارى, سونداي-اق ەسكالاتورلار بولادى.
«سايكەسىنشە, جولاۋشىلار اعىنى بىرنەشە ەسە ارتادى. بۇل ءتۋريزمدى دامىتۋعا سەپتىگىن تيگىزەدى», دەدى مينيستر.
ولار شەتپەدەگى تەمىرجول ۆوكزالى قازىرگى عيماراتتان 5 ەسە, بەينەۋدەگى 10 ەسە ۇلكەن بولادى دەپ ۋادە بەرىپ وتىر.
«بيىل تەمىرجولشىلار جالپى ۇزىندىعى 404 شاقىرىمدى قۇرايتىن "بەينەۋ-ماڭعىستاۋ" تەمىر جول ۋچاسكەسىن جاڭارتادى. شالقار-بەينەۋ, ماڭعىستاۋ-وزەن ۋچاسكەسىندە (جالپى ۇزىندىعى - 651 شاقىرىم) پويىز قوزعالىسىن باسقارۋدىڭ جاڭا جۇيەسى (اۆتوماتتى بلوكتاۋ) ورناتىلادى», دەپ حابارلادى ۆەدومستۆودان.
جوبا پرەزيدەنتتىڭ تۋريستىك باعىتتاردىڭ قولجەتىمدىلىگىن ارتتىرۋ جانە ەلدىڭ كولىك جەلىسىن جاڭعىرتۋ جونىندەگى تاپسىرماسى اياسىندا جۇزەگە اسىرىلۋدا. قازاقستاندا بارلىعى 125 تەمىرجول ۆوكزالىن قايتا قۇرۋ باستالدى, ونىڭ 21-ءى تۋريستىك باعىتتارعا قىزمەت كورسەتەدى.
