پاۆلوداردا قىلمىستىق ىستەر جونىندەگى مامانداندىرىلعان اۋدانارالىق سوتى «ەرتىس ورمانى» قورىعىنىڭ بۇرىنعى باس ديرەكتورى مەن ءۇش قىزمەتكەرىنە قاتىستى ۇكىم شىعاردى.
سوتتالۋشىلارعا اعاش ۇرلاۋ, پارا الۋ, ۇيىمداسقان قىلمىستىق توپ قۇرۋ جانە وعان قاتىسۋ سياقتى ايىپتار تاعىلدى. تەرگەۋشىلەردىڭ مالىمەتىنشە, ءىس بويىنشا ايىپتالۋشىلار 2022-2023 جىلدار ارالىعىندا وتىن مەن وندىرىستىك اعاشتى جەلەۋ ەتىپ, ورمانداردى كەسىپ, ساتۋدى ۇيىمداستىرعان.
مەملەكەتتىك ايىپتاۋ تاراپىنىڭ مالىمەتىنشە, مەملەكەتكە كەلتىرىلگەن شىعىن شامامەن 153 ميلليون تەڭگەنى قۇراعان.
سوت تورتەۋىن دە اسا اۋىر قىلمىس جاساعانى ءۇشىن كىنالى دەپ تانىپ, «ەرتىس ورمانى» سەرىكتەستىگىنىڭ بۇرىنعى باس ديرەكتورىن 12 جىلعا, ونىڭ قاراماعىنداعى ءۇش قىزمەتكەردى 10 جىلعا باس بوستاندىعىنان ايىردى.
تەرگەۋشىلەردىڭ ايتۋىنشا, اسا ءىرى كولەمدە اعاش ۇرلاۋعا سىبايلاس بولعان 58 جاستاعى سوتتالۋشى ءۇش جىلعا سوتتالدى. ول سوت زالىندا قاماۋعا الىندى.
ەسكە سالايىق, «ەرتىس ورمانى» مەملەكەتتىك ورمان تابيعي رەزەرۆاتىنىڭ بۇرىنعى باسشىسى 2024 جىلدىڭ قاڭتارىندا قاماۋعا الىنىپ, ونىڭ قاراماعىنداعى ءۇش قىزمەتكەر كەيىن قاماۋعا الىنعان ەدى.
