فوتو: ەرلان ومار
پرەمەر-مينيستر ولجاس بەكتەنوۆ ءتيىستى قاۋلىعا قول قويىپ, ۇكىمەت رەزەرۆىنەن شامامەن 1,1 ميلليارد تەڭگە ءبولىندى. بۇل قاراجات 2025–2026 جىلدارعا ارنالعان جىلىتۋ ماۋسىمىنا دايىندىق جۇمىستارىن جۇرگىزىپ, ونىڭ ىركىلىسسىز ءوتۋىن قامتاماسىز ەتۋ ماقساتىندا ءبولىنىپ وتىر.
«بولىنگەن قاراجات «كوكشەتاۋ جىلۋ» كاسىپورنىنىڭ تەحنولوگيالىق پروتسەستەردى باسقارۋدىڭ اۆتوماتتاندىرىلعان جۇيەسىن جانە باقىلاۋ-ولشەۋ اسپاپتارىنىڭ دالالىق دەڭگەيىن جانە سسۋ جىلىتاتىن توزاڭ كومىر قازاندىعىنىڭ اۆتوماتيكاسىن, سونداي-اق قازاندىق اگرەگاتىنىڭ قىزدىرۋ بەتتەرىن رەكونسترۋكتسيالاۋ, قازاندىق اگرەگاتىنىڭ اۋا جىلىتقىشتارىنىڭ تەكشەلەرىن جوندەۋ, تەحنولوگيالىق رەسۋرسى تاۋسىلعان جابدىقتاردىڭ بىرلىكتەرىن جوندەۋ جانە اۋىستىرۋ جونىندەگى جوبالاردى جۇزەگە اسىرۋعا باعىتتالادى», دەلىنگەن حابارلامادا.
ۆەدومستۆونىڭ مالىمەتىنشە, كوكشەتاۋ قالاسىنىڭ جىلۋمەن جابدىقتاۋ جۇيەسى نەگىزىنەن №1 اۋداندىق قازاندىق (مازۋت) جانە №2 اۋداندىق قازاندىققا (كومىر) سۇيەنەدى. جىلۋ جەلىلەرىنىڭ جالپى ۇزىندىعى 188,7 شاقىرىمدى قۇرايدى, ونىڭ ىشىندە 51 كم — ماگيسترالدى, ال 137,7 كم — ورامىشىلىك جەلىلەر. بۇل جەلىلەردىڭ كوپشىلىگى 1977 جىلدان بەرى پايدالانىلىپ كەلەدى.
ەستەرىڭىزگە سالا كەتەيىك, 2024 جىلى ۇكىمەت رەزەرۆىنەن بولىنگەن قارجىنىڭ ەسەبىنەن 6 شاقىرىم ماگيسترالدى جەلى جوندەلىپ, №2 جانە №3 قازاندىق اگرەگاتتارىنا كۇردەلى جوندەۋ جۇرگىزىلگەن بولاتىن. سونىڭ ناتيجەسىندە جىلۋ جۇيەلەرىندەگى توزۋ دەڭگەيى 45%-دان 43%-عا دەيىن تومەندەپ, تەحنولوگيالىق اقاۋلار سانى 62 جاعدايدان 47-گە دەيىن قىسقاردى.
