قازاقستاندا تۋىپ-وسكەنىمە قۋانامىن

ەلباسىمىز نۇرسۇلتان نازار­باەۆ­تىڭ حالىققا ارناعان جولداۋىندا ايتقان مىنا سوزدەرى مەنى ەرەكشە باۋراپ الدى, ءارى سول جولدار ءوزىمدى العا جەتەلەۋگە سەپتىگىن تيگىزدى دەسەم ارتىق ايتقاندىق ەمەس: «ءبىز ەڭ لايىقتى دەگەن جاستاردىڭ شەتەلدەردە ءبىلىم الۋلارىنا جاردەم جاسايمىز. جىل سايىن ءۇش مىڭ ۇزدىك ستۋدەنتكە «بولاشاق» باعدارلاماسىنىڭ شەڭبەرىندە الەمنىڭ ىلگەرى جوعارى وقۋ ورىندارىندا ءبىلىم الۋلارى ءۇشىن رەسپۋبليكالىق بيۋدجەتتەن قاراجات بولىنەتىن بولادى». وسى سوزدەردى ەستىگەندە مەن قاتتى قۋاندىم جانە وسى باعدارلاما اياسىندا شەت ەلدە ءبىلىم العىم كەلىپ, تالاپتانا باستادىم. كوپشىلىك ويلاپ جۇرگەندەي بۇل پرەزيدەنتتىك جوباعا تەك جاعدا­يى­ جاقسى وتباسىلاردىڭ بالالا­رى عانا بارادى دەگەن ءسوز اسىرا­ ايتىلعان سياقتى. مەن مەركى اۋدا­­نىنداعى قاراپايىم عانا وتباسىنان شىق­قان­مىن. 2001 جىلى م.ح.دۋلاتي اتىن­داعى تارمۋ-ءدى ءبىتىردىم, 2004 جىلى «بولاشاق» ستيپەندياسىنا ۇمىتكەر رەتىندە تىركەلىپ, بۇل ارمانعا  2005 جىلى قول جەتكىزدىم. ءسويتىپ, ەلدەن العان ءبىلىمىمدى شەتەلدەگى ىرگەلى وقۋ ورنىندا جالعاستىردىم. مەن ءبىلىم العان ۇلىبريتانياداعى ليدس ۋنيۆەرسيتەتى – تاريحى سوناۋ تەرەڭ­دە جاتقان جانە الەمدەگى رەيتينگى­سى جوعارى الدىڭعى قاتارلى وقۋ ورىندارىنىڭ ءبىرى. ارينە, سىرت ەلدەگى تانىمال وقۋ ورنىندا وقۋعا مۇمكىندىك العانىمدى مەنىڭ باعىمنىڭ جانعانى دەپ ايتسام دا بولار. مەنىمەن بىرگە وقىعان كۋرستاستارىمنىڭ اراسىندا پاكىستان, ءۇندىستان, اقش, مەكسيكا, قىتاي جانە تاجىكستان, مولدوۆا سەكىلدى ەلدەردىڭ وكىلدەرى دە بولدى. شىنى كەرەك, ولار مەنى ەلىمىز ارنايى گرانت ءبولىپ جىبەرىپ وتىرعاندىعىن ايتقانىمدا ەرەكشە تاڭدانىس ءبىلدىرىپ, قىزىعىپ تا, قىزعانىپ تا قاراعانداي بولدى. سەبەبى, ولار ءوز قاراجاتتارىمەن, كەيبىرى حا­لىق­ارالىق قورلاردىڭ قارجىلاي قول­دا­ۋىمەن ءبىلىم الىپ جاتقاندار ەدى. شەت­ەل­دىكتەرگە ءبىزدىڭ ەلدەگى «بولاشاق» حالىقارالىق باعدارلاماسى جايلى ايتىپ بەرگەنىمدە, ولار ءبىزدىڭ ەلگە سۇيسىنە قارادى. مەملەكەتىمىزدىڭ جىلىنا 3000 جاسقا ءبىلىم الۋعا مۇمكىندىك بەرىپ وتىرعانى قاسىمداعى كۋرستاستارىمدى ەرەكشە قىزىقتىردى. وسىلايشا مەن ءوزىمنىڭ بولاشاق ۇرپاعىنا بەيجاي قاراي المايتىن, كەلەشەككە سەنىممەن كوز تاستايتىن ەلدىڭ ۇرپاعى ەكەنىمە, قازاقستاندا تۋىپ-وسكەنىمە قۋاندىم. ولگا چەركاسوۆا, تاراز مەملەكەتتىك پەداگوگيكالىق ينستيتۋتىنىڭ شەت تىلدەرى كافەدراسىنىڭ اعا وقىتۋشىسى. جامبىل وبلىسى.