فوتو: اشىق دەرەككوز
ءۇندى تاراپى اۋە قاتىناسى مەن ساۋدانى دوعارىپ, ديپلوماتتاردى ەلدەن شىعارىپ جاتىر. سونىمەن قاتار, سۋ رەسۋرستارىن بىرلەسىپ پايدالانۋ جونىندەگى 1960 جىلى جاسالعان كەلىسىمنەن شىعاتىنىن مالىمدەدى. ال پاكىستان ۇكىمەتى ەگەر ءۇندىستان سۋ جەتكىزۋدى توقتاتۋعا تىرىسسا, بۇل ارەكەتتى سوعىس جاريالاۋ دەپ قابىلدايتىنىن ەسكەرتىپ وتىر.
ءۇندىستان پوليتسياسى وقيعاعا قاتىسى بار دەپ كۇدىككە ىلىنگەن ءۇش سودىردىڭ اتى-ءجونىن جاريالادى. ولاردىڭ ەكەۋى پاكىستاندىق ازاماتتار ەكەنى حابارلاندى.
پاكىستاننىڭ بۇرىنعى اقپارات ءمينيسترىنىڭ مىندەتىن اتقارۋشى مۋرتازا سولانگي سوڭعى جاعدايعا بايلانىستى پىكىر ءبىلدىرىپ, احۋالدىڭ اسا كۇردەلەنىپ بارا جاتقانىن اتاپ ءوتتى.
«بۇل جولى جاعداي الدەقايدا قاتەرلى كەزەڭگە ءوتىپ وتىر. حالىقارالىق ءتارتىپتىڭ بۇزىلۋى مەن ۇندىلىك اقپارات قۇرالدارىنداعى ۇرەي ءۇندىستان پرەمەر-ءمينيسترى نارەندرا ءموديدىڭ سابىرلى ءارى سالماقتى شەشىم قابىلداۋىنا كەدەرگى كەلتىرىپ تۇر. ەگەر ءۇندىستان بۇل ەسسىزدىكتى توقتاتپاسا, ەكى تاراپ تا ۇتىلادى», دەيدى مۋرتازا سولانگي.
سارسەنبى كۇنى كەشكە ءۇندىستان پاكىستانمەن ديپلوماتيالىق قارىم-قاتىناستىڭ دەڭگەيىن تومەندەتىپ, ەلشىلىكتەردەگى قىزمەتكەرلەر سانىن ەكى ەسەگە قىسقارتتى. سونىمەن قاتار, ەكى ەل اراسىنداعى جالعىز قۇرلىق شەكارا وتكەلى جابىلىپ, يند وزەنى بويىنشا جاسالعان كەلىسىمنىڭ كۇشى ۋاقىتشا توقتاتىلدى. وڭتۇستىك ازيا ايماقتىق ىنتىماقتاستىعى قاۋىمداستىعى اياسىندا پاكىستاندىقتارعا بەرىلگەن ۆيزالار ءۇش كۇن ىشىندە جويىلماق.
بەيسەنبى كۇنى پاكىستان ۇكىمەتى دە بىرقاتار جاۋاپتى شارالاردى قولعا الدى. اتاپ ايتقاندا, ءۇندىستان ازاماتتارىنا ارنالعان ۆيزالار بەرۋدى توقتاتتى سيكح زياراتشىلارىنان باسقا, ۇندىلىك اسكەري كەڭەسشىلەردى «بيلىككە ۇنامسىز» دەپ تانىپ, ەلدەن شىعۋعا نۇسقاۋ بەردى.
سونىمەن قاتار, پاكىستان اۋە كەڭىستىگىن ۇندىستانعا تيەسىلى نەمەسە سول ەل تاراپىنان باسقارىلاتىن بارلىق اۋە كومپانيالارى ءۇشىن جاپتى. ۆاگاح شەكارا بەكەتى مەن ەكى ەل اراسىنداعى بارلىق ساۋدا, سونىڭ ىشىندە ترانزيتتىك تاسىمال دا توقتاتىلدى.
پاكىستان تاراپى يند وزەنى ارقىلى سۋ جەتكىزۋدى توقتاتۋعا باعىتتالعان كەز كەلگەن ارەكەتكە «سوعىس اكتىسى» رەتىندە قارايتىنىن جانە وعان ءتيىستى تۇردە جاۋاپ بەرەتىنىن مالىمدەدى.
پاكىستان ۇكىمەتى تاراتقان مالىمدەمەدە بۇل شابۋىلعا بايلانىستى ناقتى ءارى راستالعان تەرگەۋ ناتيجەلەرىنىڭ جوقتىعى ايتىلىپ, ءۇندىستاننىڭ شابۋىلدى پاكىستانمەن بايلانىستىرۋ ارەكەتتەرى «ويسىز, قيسىنسىز جانە لوگيكاعا قارسى» دەپ باعالاندى.
