بۇل – تەك قازىرگى ءبىزدىڭ وتانىمىز ءۇشىن ەمەس, جالپى دامىپ كەلە جاتقان بۇگىنگى الەم ءۇشىن دە اسا ماڭىزدى ماسەلە. باعىتى ايقىن, قۇندىلىقتارى ناقتى ەل عانا العا باسا الادى. سونداي-اق اسسامبلەيانىڭ باستى ۇستانىمىنىڭ ءبىرى – ءوز حالقىنا, ءوز تۋعان جەرىنە پايدالى بولۋ. ناعىز ءپاتريوتيزمنىڭ نەگىزى دە – وسى. ويتكەنى ەلگە قىزمەت ەتۋ – ازاماتتىق بورىشتىڭ ەڭ بيىك كورىنىسى.
پرەزيدەنتتىڭ ءاربىر اسسامبلەيا مۇشەسى, ءتىپتى ءاربىر ازامات – تاربيەلەۋشى ءرولىن اتقارادى دەگەن پىكىرى دە كوڭىلگە قونادى. ويتكەنى قوعامنىڭ وزگەرۋى اركىمنىڭ وزىنەن باستالادى.
شىن مانىندە قازاقستان حالقى اسسامبلەياسى ەل ۇيىسۋىنىڭ بەرىك تىرەگى, تاتۋلىقتىڭ تەمىرقازىعى بولىپ كەلەدى. اسسامبلەيانىڭ ەڭ ۇلكەن پايداسى – ەل ىشىندەگى تۇراقتىلىق پەن كەلىسىمدى ساقتاۋ. ءتۇرلى ۇلتتار مەن ۇلىستاردىڭ وكىلدەرى ءبىر شاڭىراق استىندا تاتۋ-ءتاتتى ءومىر ءسۇرىپ, ءبىر-ءبىرىنىڭ مادەنيەتى مەن ءتىلىن قۇرمەتتەپ, ورتاق قۇندىلىقتاردى دارىپتەپ كەلەدى. بۇل – بەيبىت ءومىر مەن وركەندەۋدىڭ باستاۋى.
سونداي-اق ول ۇلتتىق سانانى جاڭعىرتاتىن, رۋحاني مۇرالاردى ساقتايتىن, ۇرپاقتار ساباقتاستىعىن جالعايتىن التىن كوپىر ءرولىن دە اتقارادى. تەك ەتنوستار اراسىنداعى ديالوگتىڭ ەمەس, ازاماتتىق بىرەگەيلىكتى قالىپتاستىرۋدىڭ دا نەگىزگى تەتىگىنە اينالدى.
پرەزيدەنتىمىز ايتقانداي, ءاربىر ازامات – ەلىمىزدىڭ بولاشاعىن قالىپتاستىراتىن تۇلعا. ال اسسامبلەيا وسى جاۋاپكەرشىلىكتى تەرەڭ سەزىنىپ, ەلگە قىزمەت ەتۋدىڭ ۇلگىسىن كورسەتىپ وتىر.
سەرگەي تسىرۋلنيكوۆ,
سپورتشى, ءتورت دۇركىن الەم رەكوردشىسى
