اۋىلداستارى سايىن بورانقۇلوۆ پەن ءباتيما ماياساروۆانىڭ وتباسىن ىنتىماعىنا ىرىسى, بىرلىگىنە بەرەكەسى ساي شاڭىراق رەتىندە قۇرمەتتەيدى, قادىر تۇتادى. وتاعاسى ەڭبەك جولىن 1966 جىلى تراكتورشى-مەحانيزاتورلىقتان باستادى. كەيىن ەتىنىڭ تىرىلىگى, ەڭبەكقورلىعى مەن ومىرلىك ۇستانىمى ارقاسىندا كەڭشار كومسومول كوميتەتىنىڭ حاتشىسى, زووتەحنيك, فەرما مەڭگەرۋشىسى, شارۋاشىلىق ديرەكتورىنىڭ ورىنباسارى, ەكونوميست بولدى. قاي قىزمەتتە بولماسىن ىسكەرلىك قابىلەتىمەن, ىجداعاتتىلىعىمەن تانىلعان ول 2002 جىلدان باستاپ «تەمىرلان» شارۋا قوجالىعىن اشىپ, باسقارىپ كەلەدى.
جولداسى ءباتيما بولسا, 2009 جىلعا دەيىن كىتاپحانا مەڭگەرۋشىسى قىزمەتىن اتقارىپ, زەينەتكەرلىككە شىقتى. قازىر «ءالي» دۇكەنىن اشىپ, حالىققا ساۋدا قىزمەتىن كورسەتىپ وتىر. 5 بالا, 11 نەمەرە ءتاربيەلەپ وتىرعان وتباسى ەلگە سىيلى, حالقىنا قادىرلى.
سايىن بورانقۇل ۇلى مەن باتيما دۇيسەنبايقىزىنىڭ وتباسىن قۇرعانىنا 45 جىل بولعان ەكەن. جۇرەك قالاۋىمەن قوسىلىپ, ىزگى تىلەكتەرىمەن ىلگەرىگە قادام باسقان ەرلى-زايىپتىلار شاڭىراقتىڭ شىرايىن كەلتىرىپ, كەلەشەگىن كەمەل ەتۋگە جۇدىرىقتاي جۇمىلدى, جاراستى وتباسى بولۋدىڭ ۇلكەن مەكتەبىنەن ءوتتى. ولار – جوعارى ءبىلىمدى ماماندار, اۋىلدىڭ كوركەيۋىنە ءبىر كىسىدەي ۇلەس قوسقان جاندار. بۇل وتباسىن وزدەرى تۋىپ-ءوسكەن التىقاراسۋ وكرۋگىندەگى ەڭبەكشى اۋىلىنىڭ ناعىز پاتريوتتارى دەۋ ورىندى. ەگىن ءوسىرۋمەن, مال شارۋاشىلىعىمەن اينالىسقان ولار ونەگەلى وتباسىن قالىپتاستىرا وتىرىپ, اتا كاسىپتىڭ اجارىن كەلتىردى, ەڭبەكتىڭ كورىگىن قىزدىردى. ەرتە تۇردى, كەش جاتتى, ەرىنبەدى, ەرتەڭگى كۇنگى اجارلى تىرلىكتىڭ ادال ەڭبەكپەن, ماڭداي تەرمەن كەلەتىنىن وزدەرى دە ءتۇسىندى, ءوز ونەگەلەرى ارقىلى وعان بالالارىن دا ءتاربيەلەدى.
بۇل وتباسىنىڭ شارۋاشىلىقتاردىڭ اجارى تايىپ, ەل جاپپاي جان-جاققا كوشىپ جاتقان كۇردەلى جىلدارى ەڭبەكشى ەلدى مەكەنىنىڭ ىدىراماي ساقتالىپ قالۋىنا, ون ءبىر جىلدىق مەكتەپتىڭ جابىلماۋىنا مۇرىندىق بولعانىنىڭ ءوزى نەگە تۇرادى. وسىنداي يگى ىستەردىڭ ناتجەسىندە اۋىلدىڭ تۇتاستىق تۇعىرى بەكىپ, الەۋمەتتىك نىسانداردىڭ ۇستاعاننىڭ قولىندا, تىستەگەننىڭ اۋزىندا كەتپەي ساقتالىپ قالعانىن حالىق بىلەدى. وسىنداعى مادەنيەت ءۇيىن, كىتاپحانا, بالاباقشانى قايتا قالپىنا كەلتىرىپ, ءبىلىم بەرۋ مەكەمەلەرىنىڭ كۇردەلى جوندەۋىنە قارجىلاي قولداۋ كورسەتۋدەن دە ەشقاشان تارتىنعان ەمەس. اۋىلداعى جوق-جىتىك, تۇرمىسى اۋىر وتباسىلارىن دا ءوز قامقورلىعىنا الىپ كەلەدى. وسى ەڭبەكشىدە قازىر 101 وتباسى تۇرادى. سايىن بورانقۇلوۆ سولاردىڭ باسىم كوپشىلىگىنە جۇمىس تاۋىپ بەرىپ, مال, قۇس ءوسىرۋگە كومەگىن تيگىزىپ وتىر. قازىر ەلدىڭ تۇرمىسى تۇزەلدى, جاعدايى جاقساردى.
بۇگىنگى تاڭدا ول شارۋا قوجالىعىندا 205 ءىرى قارا, 810 قوي, 35 جىلقى ءوسىرىپ وتىر. مال باسىن ءوز تولىنەن وسىرۋدە جىل سايىن تابىسقا جەتىپ كەلەدى. قازىرگى تاڭداعى جاڭاشىل ادىستەردى قولدانا وتىرىپ, اسىل تۇقىمدى مال باسىن كوبەيتۋدە. «سىباعا» اۋىل شارۋاشىلىعىن قولداۋ قورى ارقىلى بەرىلەتىن نەسيەنى پايدالانىپ, شارۋاشىلىعىن كەڭەيتۋدە. ەڭبەگىنىڭ ناتيجەسىندە بىرنەشە رەت اۋداندىق, وبلىستىق, رەسپۋبليكالىق دەڭگەيلەردەگى ماراپاتتارعا يە بولدى.
«بالاپان ۇيادا نە كورسە, ۇشقان
دا سونى ىلەدى» دەگەندەي, بالالارىنىڭ بارلىعى جوعارى ءبىلىمدى, اتا-انا جولىن قۋعان, كاسىپكەرلىكتەرىن جالعاستىرۋدا. نەمەرەلەرى – وقۋ وزاتتارى, سپورت, ونەر, ءبىلىم سايىستارىنىڭ جەڭىمپازدارى. سايىن بورانقۇلوۆ پەن ءباتيما ماياساروۆانىڭ وتباسى ومىرلىك قۇندىلىقتاردى جاڭعىرتۋ جانە وتباسى ونەگەسىن ناسيحاتتاۋ ماقساتىندا وتكىزىلىپ كەلە جاتقان «مەرەيلى وتباسى» ۇلتتىق بايقاۋىنىڭ وبلىستىق كەزەڭىنە قاتىسىپ, ەكىنشى ورىندى جەڭىپ الدى. مۇنىڭ ءوزى ونەگەلى وتباسىنا بەرىلگەن لايىقتى باعا بولدى. وعان بۇل شاڭىراقتاعى باقۋاتتى تۇرمىس پەن باقىتتى تىرلىك نەگىز قالاپ وتىرعانى ءسوزسىز.
ساتىبالدى ءساۋىرباي,
«ەگەمەن قازاقستان».
اقتوبە وبلىسى,
تەمىر اۋدانى.
