ء«بىز, ەڭ الدىمەن, جاستاردى كىتاپ وقۋعا باۋلۋىمىز كەرەك. سوندا جاپپاي كىتاپ وقيتىن ۇلتقا اينالامىز. تاۋەلسىزدىك كەزەڭىندە ەلىمىزدە كىتاپحانا ءىسى كەنجەلەپ قالدى. توقسانىنشى جىلدارداعى الاساپىران ۋاقىتتا مىڭداعان كىتاپحانا جابىلدى. ميلليونداعان كىتاپ قورىنان ايىرىلدىق. كەيىنگى جىلدارى جاعدايدى تۇزەۋ ءۇشىن ارەكەت جاسالىپ جاتىر. كىتاپحانا – مەملەكەتتىڭ, ۇلتتىڭ نەگىزگى جادى. ەلىمىز ءۇشىن قۇندى تاريحي دەرەكتەر مەن ماتەريالداردىڭ دەنى كىتاپحانادا ساقتالادى. سوندىقتان كىتاپحانا ءىسىن دامىتۋعا بەيجاي قاراۋعا بولمايدى», دەدى پرەزيدەنت.
قاسىم-جومارت توقاەۆتىڭ ايتۋىنشا, ەڭ الدىمەن كىتاپ وقىرمانعا قولجەتىمدى بولۋى كەرەك.
«مىسالى, كوپتەگەن مەملەكەت ۇلتتىق كىتاپ كۇنىن اتاپ وتەدى. ءبورىحان نۇرمۇحامەدوۆ, ايدوس سارىم, دانيار اشىمباەۆ باستاعان قۇرىلتاي مۇشەلەرى وسىنداي باستاما كوتەردى. مەن ولاردىڭ ۇلتتىق كىتاپ كۇنىن بەلگىلەۋ تۋرالى ۇسىنىسىن قولدايمىن. بىراق ونى مازمۇندى ەتىپ وتكىزۋ قاجەت. مىسالى, ءتۇرلى ءىس-شارا ۇيىمداستىرىپ, ارنايى جارمەڭكەلەر وتكىزۋ قاجەت. شىن مانىندە, وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك», دەگەن ەدى مەملەكەت باسشىسى.
ەل پرەزيدەنتىنىڭ «ۇلتتىق كىتاپ كۇنىن» بەلگىلەپ, اتالعان مەرەكەنى مازمۇندى ەتىپ وتكىزۋ تۋرالى تاپسىرماسىنا سايكەس 23 ءساۋىر – ۇلتتىق كىتاپ كۇنى بولىپ بەكىتىلىپ, رۋحاني مەرەكە بيىل العاش رەت كەڭ كولەمدە اتاپ ءوتىلدى. اتاۋلى داتانىڭ اياسىندا مادەنيەت جانە اقپارات مينيسترلىگىنىڭ تىكەلەي باستاماسىمەن ءار وڭىردە ءتۇرلى ىلكىمدى جوبالار باستالىپ, مازمۇندى ءىس-شارالار ۇيىمداستىرىلدى. اسىرەسە بيىل تۇڭعىش رەت وتكىزىلىپ وتىرعان «ۇلتتىق كىتاپ» رەسپۋبليكالىق بايقاۋىن اتاپ وتەمىز. بەيبىتشىلىك جانە كەلىسىم سارايىندا وتكەن ۇلتتىق كىتاپ كۇنىنە ارنالعان سالتاناتتى جيىندا ءدۇبىرلى دودانىڭ جەڭىمپازدارى انىقتالىپ, سالتاناتتى تۇردە ماراپاتتالدى. مەرەكەلىك كەشكە پارلامەنت ءماجىلىسىنىڭ توراعاسى ەرلان قوشانوۆ, مادەنيەت جانە اقپارات ءمينيسترى ايدا بالاەۆا, باسقا دا قوعام قايراتكەرلەرى, زيالى قاۋىم مەن دەپۋتاتتار قاتىستى.
بايقاۋعا كەيىنگى ەكى جىلدا جارىق كورگەن وتاندىق اۆتورلاردىڭ كىتاپتارى ۇسىنىلىپ, توعىز اتالىم جانە گران-پري بويىنشا جەڭىمپاز انىقتالدى.
سونىمەن, ەلىمىزدە تۇڭعىش رەت وتكىزىلىپ وتىرعان كىتاپ دوداسىندا «بالالارعا ارنالعان ۇزدىك كىتاپ» اتالىمىندا 1-ورىن «ATA Creative Hub» باسپاسىنا («تاۋ قۇسى», اۆتورى ەلدوس توقتارباي), 2-ورىن «كوكجيەك-گوريزونت» باسپاسىنا («كويلەك كيگەن كوبەلەك», اۆتورى بەكەن ىبىرايىم), 3-ورىن «دارىندى بالا» ورتالىعىنا («دارىندى بالا الەمى. الەم حالىقتارىنىڭ ەرتەگىلەرى») بۇيىردى. ال «ۇزدىك كوميكس» جانرىندا 1-ورىندى «Khan Comics» باسپاسى («ەركەتاي كوميكس»), 2-ورىندى «Steppe&World» باسپاسى («ساققۇلاق»), 3-ورىندى «نزم» دببۇ («قازاق حالقىنىڭ كۇي-اڭىزدارى») يەلەندى. سونداي-اق «نون-فيكشن باعىتىنداعى ۇزدىك كىتاپ», «دەتەكتيۆ جانرىنداعى ۇزدىك كىتاپ», «ساتيرا جانرىنداعى ۇزدىك كىتاپ», «ۇزدىك يلليۋستراتسيالىق كىتاپ», «ۇزدىك اۋدارما كىتابى», «فانتاستيكا جانرىنداعى ۇزدىك كىتاپ», «ۇزدىك باسپا» اتالىمدارىندا وزا شاپقان تۋىندىلار بەلگىلى بولدى. ال بايقاۋدىڭ نەگىزگى سىيلىعى – گران-پري «جىل كىتابى» اتالىمىندا «الماتىكىتاپ» باسپاسى ۇسىنعان «قازاقستان تاريحي تۇلعالارى» سەرياسى جەڭىمپاز اتاندى.
ايتا كەتەيىك, كىتاپ دوداسىنا جالپى سانى 120 ءوتىنىم كەلىپ تۇسكەن. جۇلدە قورى – 41,5 ملن تەڭگە. ءار اتالىم بويىنشا 1, 2, 3-ورىن يەگەرلەرى اقشالاي سىيلىقپەن ماراپاتتالسا, «جىل كىتابى» اتالىمىنىڭ يەگەرىنە 5 ميلليون تەڭگە كولەمىندە سىياقى تابىستالدى.
«بيىل ءبىزدىڭ باسپامىزعا – 25 جىل تولىپ وتىر. وسى ورايدا ۇلتتىق كىتاپ كۇنى قارساڭىندا باسپامىز «جىل كىتابى» اتالىمىن جەڭىپ الدى. بۇل تەك باسپا ۇجىمىنىڭ ەڭبەگى عانا ەمەس, كىتاپقا, سوزگە, ۇلتتىق قۇندىلىقتارعا دەگەن شىنايى سۇيىسپەنشىلىكتىڭ مويىندالۋى دەپ ويلايمىن. وسى جەڭىس ءۇشىن ەرەكشە العىسىمىز – باسپامىزدىڭ نەگىزىن قالاۋشى, شابىت بەرۋشى, «مەنىڭ قازاقستانىم» سەرياسىنىڭ اۆتورى ءارى يدەيا اۆتورى – ەلەونورا باتالوۆاعا ارنالادى. بۇگىندە بۇل سەريادا 100-گە جۋىق كىتاپ جارىق كوردى, ونىڭ ىشىندە وسى ماراپاتتالعان ەڭبەكتەر دە بار. پرەزيدەنت باستاماسىمەن بەكىتىلگەن ۇلتتىق كىتاپ كۇنى – جاي عانا ادەبي ءىس-شارا ەمەس, ەلىمىزدەگى بۇكىل باسپا سالاسىنىڭ مەملەكەتتىك دەڭگەيدە تانىلعان ماڭىزدىلىعىنىڭ ايعاعى. وسى رەتتە كىتاپقا دەگەن شىنايى ىقىلاسى مەن ءاردايىم كورسەتىپ كەلە جاتقان قولداۋى ءۇشىن مادەنيەت جانە اقپارات ءمينيسترى ايدا بالاەۆاعا العىس ايتامىز», دەيدى «الماتىكىتاپ» باسپاسىنىڭ پرەزيدەنتى گاۋحار سايماساەۆا.
«جىل كىتابى» اتانعان ەڭبەكتەردىڭ قاتارىندا «اباي – ماڭگىلىك تۇلعا», «ىبىراي – دالانىڭ تازا بۇلاعى», «شوقان – شىعىستىڭ جارىق جۇلدىزى», «احمەت – الاشتىڭ ارداقتىسى» اتتى تۋىندىلار بار.
«باسپاگەرلەردىڭ سانى كوبەيدى, كىتاپ سانى دا كوبەيىپ جاتىر. كىتاپ شىعارۋ قازىر ترەندتە. جازۋشىلارىمىز دا شابىتتانا جازىپ جاتىر. بۇل وتە جاقسى كورىنىس. مەملەكەت تاراپىنان كۇتەتىنىمىز, كىتاپ وقىتۋ يدەولوگياسى كۇشەيتىلسە ەكەن دەيمىز. باسپامىز بالالارعا ارنالعان الەم ادەبيەتىنىڭ تۋىندىلارىن قازاق تىلىنە اۋدارىپ شىعارادى. سوڭعى 5 جىلدا 150-دەن استام كىتاپ باسىپ شىعاردىق. شامامەن, 80 پايىز بالالارعا ارنالعان بولسا, 20 پايىز ەرەسەكتەرگە ارنالعان كوركەم ادەبيەت», دەيدى باسپاگەر رايسا قادىر.
ءدۇبىرلى دودادا جەڭىمپاز اتانعان «كوكجيەك-گوريزونت» باسپاسى «ۇلتتىق كىتاپ» بايقاۋىنداعى جۇلدەسىن استانا قالاسىنداعى بالالار ءپاللياتيۆتى كومەك ورتالىعىنا اۋدارماق ەكەن.
«بارشا ەلىمىزدى ۇلتتىق كىتاپ كۇنىمەن قۇتتىقتايمىن. بيىل تۇڭعىش رەت وتكىزىلىپ وتىرعان ءىس-شارا وتە جوعارى دەڭگەيدە ۇيىمداستىرىلدى. جالپى, وسى كۇندى اتاۋلى مەرەكەگە اينالدىرعان مەملەكەت باسشىسىنا ەرەكشە العىس ايتامىز. باسپامىز بايقاۋدا ەكى اتالىم بويىنشا جەڭىمپاز اتاندى. بۇل قارجىنى استانا قالاسىنداعى بالالار ءپاللياتيۆتى كومەك ورتالىعىنا اۋدارامىز. ءبىزدىڭ ۇجىم ءۇشىن مۇنداي يگى قادام ۇلكەن مارتەبە», دەيدى «كوكجيەك-گوريزونت» باسپاسىنىڭ باسشىسى ايدا ورازاەۆا.
سونداي-اق سالتاناتتى جيىن اياسىندا سيرەك كىتاپتار مەن قولجازبالار, جەڭىستىڭ 80 جىلدىعىنا ارنالعان ادەبيەتتەر, سونداي-اق بىلتىر مەملەكەتتىك تاپسىرىسپەن جارىق كورگەن 200-گە جۋىق كىتاپ پەن سۋرەتتەر كورمەسى ۇيىمداستىرىلدى.
ايتا كەتەيىك, ۇلتتىق كىتاپ كۇنىنە وراي مينيسترلىكتىڭ باستاماسىمەن 16-23 ءساۋىر ارالىعىندا رەسپۋبليكا بويىنشا 300-دەن استام تاقىرىپتىق ءىس-شارا ۇيىمداستىرىلدى. ودان بولەك الەۋمەتتىك جەلىلەردە كىتاپ وقۋ مادەنيەتىن ناسيحاتتاۋعا باعىتتالعان چەللەندج ءوتتى. وعان العاشقىلاردىڭ ءبىرى بولىپ اقىن-جازۋشىلار مەن مادەنيەت قايراتكەرلەرى قاتىسىپ, كوپشىلىكتى كىتاپ وقۋعا شاقىردى.
