ونەر ۇجىمى حالىقارالىق «InClassica International Music Festival» جوباسى اياسىندا بەدەلدى «Zabeel Theater» ساحناسىندا كلاسسيكالىق مۋزىكا كونتسەرتتەرىنىڭ نەگىزگى وركەسترى رەتىندە ونەر كورسەتتى.
مادەني ءىس-شاراعا قازاق مەملەكەتتىك سيمفونيالىق وركەسترىمەن بىرگە قازاقستاننىڭ ەڭبەك ەرى ايگىلى سكريپكاشى ايمان مۇساقوجاەۆا دا قاتىستى.
گاسترولدىك ساپار ەلىمىزدىڭ الەمدىك ارەناداعى مادەني ءيميدجىن نىعايتىپ, قازاقستان مەن بىرىككەن اراب امىرلىكتەرى اراسىنداعى ديپلوماتيالىق بايلانىستى كۇشەيتۋ ماقساتىندا ۇيىمداستىرىلىپ وتىر.
«InClassica International Music Festival» مۋزىكالىق فەستيۆالى – حالىقارالىق جوعارى دەڭگەيدەگى بەدەلدى جوبا. وعان الەمنىڭ تۇكپىر-تۇكپىرىنەن وركەسترلەر قاتىسىپ, كلاسسيكالىق مۋزىكانىڭ ۇزدىك ارتىستەرىمەن ءبىر ساحنادا ونەر كورسەتەدى.
ايتا كەتەيىك, ونەر ۇجىمى بۇعان دەيىن مادەنيەت جانە اقپارات مينيسترلىگىنىڭ قولداۋىمەن انگليا, فرانتسيا, چەحيا, يتاليا, گەرمانيا, اۋستريا, رەسەي, وڭتۇستىك كورەيا, تۇركيا, جاپونيا ەلدەرىنىڭ ۇزدىك كونتسەرتتىك زالدارىندا ونەر كورسەتكەن بولاتىن. سونداي-اق وركەستر كلاسسيكالىق مۋزىكاعا ارنالعان كوپتەگەن حالىقارالىق فەستيۆالگە قاتىسىپ كەلەدى. وسى ۋاقىت ارالىعىندا سيمفونيالىق وركەستر ەلىمىز بەن شەتەلدەردە كورەرمەننىڭ ىستىق ىقىلاسىنا بولەنىپ, كاسىبي مامانداردىڭ جوعارى باعاسىنا يە بولىپ ءجۇر.
مارجان قۋاتقىزى
