فوتو: اشىق دەرەككوز
مينيسترلىكتىڭ حابارلاۋىنشا, ەلىمىزدە ببق-نى ساتۋعا تەك كەدەن وداعىنىڭ تەحنيكالىق رەگلامەنتتەرىنە سايكەستىگى راستالىپ, مەملەكەتتىك تىركەۋدەن وتكەننەن كەيىن عانا رۇقسات بەرىلەدى. بۇل پروتسەستى سانيتاريالىق-ەپيدەميولوگيالىق باقىلاۋ كوميتەتى قازاق تاعامتانۋ اكادەمياسى جانە ەاەو ەلدەرىنىڭ عىلىمي-زەرتتەۋ ينستيتۋتتارى ۇسىنعان ساراپتامالىق قورىتىندىلار نەگىزىندە جۇزەگە اسىرادى.
ايتا كەتەيىك, ساتۋعا دەيىن بارلىق ببق-لار مىندەتتى تۇردە ميكروبيولوگيالىق, توكسيكولوگيالىق جانە فيزيكا-حيميالىق كورسەتكىشتەر بويىنشا زەرتحانالىق زەرتتەۋلەردەن وتەدى. سونىمەن قاتار قۇرامىنداعى دارۋمەندەر مەن بيواكتيۆتى زاتتاردىڭ نورمالارى جانە تىيىم سالىنعان كومپونەنتتەردىڭ بولماۋى دا قاتاڭ تەكسەرىلەدى.
«جاڭا باقىلاۋ شارالارى 2024 جىلدان باستاپ باق پەن الەۋمەتتىك جەلىلەردەگى ببق جارناماسىنا مونيتورينگ جۇرگىزىلەدى. سونىمەن قاتار 2025 جىلى ءونىمنىڭ جەتكىزۋ تىزبەگىنىڭ اشىقتىعىن قامتاماسىز ەتەتىن, تۇتىنۋشىعا دەيىنگى جولىن باقىلايتىن, ارنايى سايكەستەندىرۋ قۇرالدارىمەن تاڭبالاۋ بويىنشا پيلوتتىق جوبا ىسكە قوسىلادى», دەلىنگەن حابارلامادا.
مينيسترلىك اتاپ وتكەندەي, كەلەسى جاعدايلاردا ببق-لاردى ساتۋعا تىيىم سالىنادى:
- مەملەكەتتىك تىركەۋ كۋالىگى جوق بولسا;
- جارامدىلىق مەرزىمى اياقتالعان جاعدايدا;
- ساقتاۋ شارتتارى ساقتالماسا;
- قاپتامادا ءونىمنىڭ قۇرامى, قارسى كورسەتىلىمدەرى نەمەسە ءوندىرۋشى تۋرالى اقپارات بولماسا.
سونداي-اق, ۆەدومستۆو ازاماتتارعا ببق-نى قابىلداماس بۇرىن مىندەتتى تۇردە دارىگەرمەن كەڭەسۋگە كەڭەس بەرەدى. سەبەبى باقىلاۋسىز قولدانۋ, اسىرەسە, سوزىلمالى اۋرۋى بار ادامدار, جۇكتى ايەلدەر مەن بالالار ءۇشىن قاۋىپتى بولۋى مۇمكىن.
ببق ساتىپ الاردا: ءونىمنىڭ ەلىمىزدە تىركەلگەنىن, قۇرامىنىڭ تولىق كورسەتىلگەنىن, ءوندىرۋشى مەن ەلدىڭ ناقتى كورسەتىلگەنىن, جارامدىلىق مەرزىمى مەن ساقتاۋ شارتتارىنىڭ دۇرىس ەكەنىن جانە تاڭبالاۋ تالاپتارىنا ساي كەلەتىنىن مىندەتتى تۇردە تەكسەرۋ قاجەت.
دەنساۋلىق ساقتاۋ مينيسترلىگى ببق اينالىمىن باقىلاۋ سالاسىندا اشىقتىق پەن قاۋىپسىزدىكتى قامتاماسىز ەتۋ باعىتىنداعى جۇمىسىن جالعاستىرا بەرەتىنىن مالىمدەدى.
