فوتولار: تۇركى اكادەمياسىنىڭ ءباسپاسوز قىزمەتى
تۇركى اكادەمياسىنىڭ پرەزيدەنتى, اكادەميك شاھين مۇستافاەۆ شارانىڭ تۇساۋكەسەر راسىمىندە سويلەگەن سوزىندە باسىلىمنىڭ قازاقستان مەن ازەربايجان اراسىنداعى مادەني بايلانىستاردى نىعايتۋعا زور ۇلەس قوساتىنىن اتاپ ءوتتى.
روماننىڭ ورىس تىلىنەن اۋدارىلعان ازەربايجان تىلىندەگى العاشقى نۇسقاسى 1954 جىلى ەيۋپ ابباسوۆتىڭ تارجىمەلەۋىمەن, سول كەزدەگى كيريلل قارپىندە جارىققا شىققان ەدى. سودان بەرى 70 جىل ۋاقىت وتسە دە اتاقتى تۋىندى ازەربايجان وقىرماندارىنا قايتادان ۇسىنىلماعان.
تۇركى اكادەمياسىنىڭ ءباسپاسوز قىزمەتىنىڭ مالىمدەۋىنشە جاڭا اۋدارما لاتىن قارپىمەن, ازەربايجاننىڭ ادەبي ءتىل نورمالارىنا ساي جانە قازاق تىلىندەگى تۇپنۇسقاسىمەن سالىستىرىلىپ, العاشقى باسىلىمداعى قاتەلىكتەرى تۇزەتىلىپ, كەڭەس ۇكىمەتى كەزىندە تسەنزۋراعا ۇشىراعان تۇستارى قايتادان تولىقتىرىلىپ باسىلعان.
اكادەميك شاھين مۇستافاەۆ روماندى جارىققا شىعارۋعا ۇلەس قوسقان رەداكتور فاريد حۋسەينگە جانە بارشا شىعارماشىلىق ۇجىمعا العىسىن ءبىلدىردى.
«اباي» رومانىنىڭ مۇنداي فورماتتا جارىق كورۋى – تەك ادەبي وقيعا عانا ەمەس. بۇل – مادەني جادىنى جاڭعىرتۋ, ورتاق رۋحاني مۇرامىزعا دەگەن قۇرمەت پەن ونى ساقتاۋ جولىنداعى ناقتى قادام. تۇركى اكادەمياسى الداعى ۋاقىتتا دا تۇركى حالىقتارىنىڭ مادەني-رۋحاني مۇراسىن زەردەلەۋ جانە ناسيحاتتاۋ باعىتىنداعى كەشەندى جۇمىستاردى جالعاستىرا بەرەدى», دەدى اكادەميا باسشىسى.
تۇساۋكەسەرگە ازەربايجانداعى اتاتۇرىك ورتالىعىنىڭ جەتەكشىسى نيزامي دجافاروۆ, ازەربايجان ميللي ءماجىلىسىنىڭ دەپۋتاتتارى, قازاقستان رەسپۋبليكاسىنىڭ ازەربايجانداعى توتەنشە جانە وكىلەتتى ەلشىسى ءالىم بايەل, تۇركپا باس حاتشىسى مەحمەت سۇرەيا ەر, تۇركى مادەنيەتى مەن مۇراسى قورىنىڭ اپپارات جەتەكشىسى فاحري حادجيەۆ, سونداي-اق عىلىمي جانە ءبىلىم بەرۋ مەكەمەلەرىنىڭ وكىلدەرى, ادەبيەت جانە مادەنيەت قايراتكەرلەرى قاتىستى.
