فوتولار: ت.تانىباەۆ. ءماجىلىستىڭ ءباسپاسوز قىزمەتى
«اسا كورنەكتى جازۋشى, دراماتۋرگ, ەڭبەك ەرى اكىم ءتارازيدىڭ دۇنيەدەن وتۋىنە بايلانىستى قايعىلارىڭىزعا ورتاقتاسىپ, كوڭىل ايتامىن.
اكىم تارازي بۇكىل سانالى عۇمىرىن ءسوز ونەرىنە ارناعان, ءتول ادەبيەتىمىز بەن مادەنيەتىمىزدى تورگە وزدىرعان ۇلتىمىزدىڭ ءبىرتۋار پەرزەنتى ەدى. دارىندى قالامگەر قازاق پروزاسىنىڭ كوكجيەگىن كەڭەيتتى, ۇلتتىق كينو جانە دراماتۋرگيا سالاسىنا ولشەۋسىز ۇلەس قوستى.
اسىل مۇراتىنان ەشقاشان اينىماعان قالام يەسىن كوزى قاراقتى وقىرمان «ادەبيەت الەمىنىڭ اكىمى» دەپ ارداق تۇتتى, زيالى قاۋىم ونىڭ شىعارماشىلىعىمەن قاتار ادامگەرشىلىك قاسيەتتەرىن ەرەكشە باعالادى.
ونەگەلى ءومىر ءسۇرىپ, سوڭىنا مول مۇرا قالدىرعان اكىم ءتارازيدىڭ جارقىن بەينەسى حالقىمىزدىڭ جۇرەگىندە ماڭگى ساقتالادى», دەلىنگەن پرەزيدەنتتىڭ كوڭىل ايتۋىندا.
ءماجىلىس سپيكەرى مەملەكەت باسشىسى اكىم تارازي شىعارماشىلىعىنا ارقاشان ەرەكشە قۇرمەتپەن قارايتىنىن اتاپ ءوتتى. وسىدان بىرەر جىل بۇرىن ەلى الدىنداعى ەڭبەگىن ءۇشىن جازۋشىعا «ەڭبەك ەرى» اتاعى بەرىلگەن ەدى.
ەرلان قوشانوۆ اكىم تارازيدىڭ ارتىندا قالعان مول مۇراسى ۇرپاقتان ۇرپاققا رۋحاني ازىق بولارىن ايتتى.
قوشتاسۋ راسىمىنە جازۋشىنىڭ تۋعان-تۋىستارى مەن جاقىندارى, قازاقستان جازۋشىلار وداعىنىڭ باسشىلىعى مەن مۇشەلەرى, مەملەكەتتىك ورگانداردىڭ وكىلدەرى, ەلىمىزدىڭ شىعارماشىل زيالى قاۋىمى قاتىستى.
