فوتولار: ۇلتتىق ۇلان
بۇعان دەيىن ۇلتتىق ۇلاندا تاكتيكالىق مەديتسينا بويىنشا حاتتاما ازىرلەۋ جانە بەكىتۋ تۋرالى باستاما كوتەرىلگەنىن, سونداي-اق تەلەمەديتسينانى دامىتۋ ۇسىنىلعانىن اتاپ وتكەن ءجون.
وقۋ جيىنى اياسىندا ەپيدەميولوگيا, العاشقى مەديتسينالىق كومەك كورسەتۋ, مەديتسينالىق قامتاماسىز ەتۋدى ۇيىمداستىرۋ جانە تاكتيكالىق مەديتسينا بويىنشا پراكتيكالىق ساباقتارعا ەرەكشە نازار اۋدارىلدى. وقىتۋدىڭ بۇل باعىتى 2025 جىلى ۇلتتىق ۇلان جۇيەسىندە تاكتيكالىق مەديتسينا قىزمەتىنىڭ قۇرىلۋىنا تىكەلەي بايلانىستى بولدى.
بۇل قىزمەتتىڭ ماقساتى – جەكە قۇرامدى جاۋىنگەرلىك جاعدايلاردا مەديتسينالىق كومەك كورسەتۋ جونىندەگى ءىس-قيمىلدارعا وقىتۋ بولىپ تابىلادى.
تاكتيكالىق مەديتسينا بويىنشا ساباقتاردىڭ تاجىريبەلىك بولىگى 6654 اسكەري ءبولىمىنىڭ وقۋ ورتالىعىندا «بۇركىت» ارنايى ماقساتتاعى بولىمشەسى نۇسقاۋشىلارىنىڭ قاتىسۋىمەن ءوتتى. شىنايى وقيعالارعا بارىنشا جاقىن جاعدايلاردا اسكەري قىزمەتشىلەر شۇعىل كومەك كورسەتۋ, گەموستاتيكالىق تۋرنيكەتتەر سالۋ داعدىلارىن, جارالىلاردى تاسىمالداۋ جانە ەۆاكۋاتسيالاۋ تاسىلدەرىن پىسىقتادى.
«توتەنشە جاعدايلاردا العاشقى كومەك كورسەتۋ بويىنشا ادىستەمەلىك دايىندىق جەكە قۇرامدا پسيحولوگيالىق تۇراقتىلىقتى قالىپتاستىرۋعا, ءوزىن-ءوزى ۇستاي بىلۋگە جانە سترەسس پەن جاۋىنگەرلىك فاكتورلاردىڭ اسەرىنەن ءتيىمدى ارەكەت ەتە بىلۋگە كومەكتەسەدى. سونىمەن قاتار, جاۋىنگەرلىك شىعىنداردى ازايتۋعا ىقپال ەتەدى», دەيدى ۇلتتىق ۇلان اسكەري-مەديتسينالىق باسقارماسىنىڭ باستىعى تالعات سىدىرمانوۆ.
تاكتيكالىق دايىندىقتان باسقا, جيىن شەڭبەرىندە وبەكتىلەردىڭ سانيتارلىق جاي-كۇيىن مەديتسينالىق باقىلاۋ, ءدارى-دارمەكتەرمەن جۇمىس ىستەۋ ءتارتىبى, جاۋىنگەرلىك كەزەكشىلىك كەزىندە مەديتسينالىق كومەكتى ۇيىمداستىرۋ, سانيتارلىق وڭدەۋ, ينفەكتسيالار مەن تاماقتان ۋلانۋدىڭ الدىن الۋ, سونداي-اق جارالار مەن قان كەتۋلەر كەزىندە العاشقى كومەك كورسەتۋ بويىنشا تەوريالىق جانە پراكتيكالىق ساباقتار ءوتتى.
ايتا كەتكەن ءجون, مۇنداي جيىنداردى وتكىزۋ ۇلتتىق ۇلان جەكە قۇرامىنىڭ مەديتسينالىق دايارلىعىنىڭ جوعارى دەڭگەيىن ۇستاپ تۇرۋدا ماڭىزدى ءرول اتقارادى جانە اسكەري قىزمەتشىلەردىڭ دەنساۋلىعى مەن جاۋىنگەرلىك دايىندىعىن قامتاماسىز ەتۋگە ەلەۋلى ۇلەس قوسادى.
