ماۋلەن اشىمباەۆ مەيمانعا ءىلتيپات بىلدىرە كەلىپ, حورۆاتيا قازاقستاننىڭ ەۋروپالىق وداقتاعى سەنىمدى سەرىكتەسى ەكەنىن ايتتى.
سونداي-اق پالاتا سپيكەرى پارلامەنتارالىق بايلانىستاردى ودان ءارى نىعايتۋدىڭ ماڭىزدى ەكەنىن اتاپ ءوتتى. سۇحبات كەزىندە زاڭ شىعارۋ قىزمەتىندە تاجىريبە الماسۋ, دوستىق توپتارىنا مۇشە دەپۋتاتتاردىڭ ءوزارا ساپارلارىن ۇيىمداستىرۋ جانە پارلامەنت سەناتى مەن سابوردىڭ سالالىق كوميتەتتەرى اراسىندا تىعىز بايلانىس ورناتۋ جونىندەگى جۇمىستارعا باسا ءمان بەرىلدى.
«قازاقستان مەن حورۆاتيا اراسىندا ءتيىمدى ساياسي ديالوگ جولعا قويىلعان. ەكونوميكالىق ىنتىماقتاستىق پەن مادەني بايلانىستار دا قارقىندى دامىپ كەلەدى. ءسىزدىڭ ساپارىڭىزدىڭ مازمۇنى مەن ماڭىزى ەلدەرىمىز ءوزارا ءىس-قيمىلدى ودان ءارى تەرەڭدەتۋگە مۇددەلى ەكەنىن كورسەتەدى. مەملەكەتتەرىمىز اراسىنداعى ىنتىماقتاستىقتى نىعايتۋ جولىندا پارلامەنتارالىق ديالوگ ۇلكەن ءرول اتقارادى. ءبىز حورۆاتيا پارلامەنتىمەن قارىم-قاتىناستى دامىتۋعا نيەتتىمىز. بۇل رەتتە دوستىق توپتارىنىڭ الەۋەتىن ءوزارا ديالوگتى دامىتۋدىڭ ءتيىمدى تەتىگى رەتىندە پايدالانعان ورىندى دەپ ەسەپتەيمىز», دەدى م.اشىمباەۆ.
كەزدەسۋدە ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ ماسەلەلەرى دە تالقىلاندى. سەنات توراعاسى ەل پرەزيدەنتى قاسىم-جومارت توقاەۆتىڭ باستاماسىمەن قازاقستاندا ىسكە اسىرىلىپ جاتقان الەۋمەتتىك-ەكونوميكالىق جانە ساياسي رەفورمالارعا توقتالىپ, قولعا العان جۇمىس نەگىزگى مەملەكەتتىك ينستيتۋتتاردى كەشەندى تۇردە جاڭعىرتۋدى كوزدەيتىنىن تىلگە تيەك ەتتى.
ناقتى ايتقاندا, سۇحبات بارىسىندا جاڭا ەكونوميكالىق ۇلگى قالىپتاستىرۋعا جانە قازاقستاننىڭ ينۆەستيتسيالىق احۋالىن جاقسارتۋعا ارنالعان شارالار تۋرالى, سونداي-اق ەكى تاراپ تا مۇددەلى سالالاردا ينۆەستورلار ءۇشىن ارتىقشىلىقتار قاراستىرۋ جونىندە ءسوز بولدى. وسىعان بايلانىستى ەنەرگەتيكا, فارماتسەۆتيكا, كولىك, اقپاراتتىق تەحنولوگيالار جانە اۋىل شارۋاشىلىعى سياقتى باعىتتارداعى بىرلەسكەن جوبالارعا ەرەكشە نازار اۋدارىلدى.
ءوز كەزەگىندە گوردان گرليچ-رادمان قاسىم-جومارت توقاەۆتىڭ باسشىلىعىمەن قازاقستاندا جۇزەگە اسىرىلىپ جاتقان اۋقىمدى ساياسي جانە الەۋمەتتىك-ەكونوميكالىق وزگەرىستەرگە جوعارى باعا بەردى. سونداي-اق ول ىنتىماقتاستىقتى ودان ءارى كەڭەيتۋگە جانە نىعايتۋعا مۇددەلى ەكەنىن جەتكىزدى.
سونىمەن قاتار سەنات توراعاسى بيىل قىركۇيەك ايىندا وتەتىن «دىندەر ديالوگى – بولاشاق جولىنداعى سينەرگيا» تاقىرىبىنا ارنالعان الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسىندا قولعا الىنعان جۇمىستارعا توقتالىپ ءوتتى.
