ەلىمىزدە فۋتبول تاقىرىبىندا تۇسىرىلگەن العاشقى كينوكارتينادا باستى رولدەردى قۋانىش كەرىمقۇلوۆ, المات ساقاتوۆ جانە بلوگەر ارتۋر اسقار ۇلى وينايدى.
«بۇل جوبا 2023 جىلى ۇيىمداستىرىلعان كينوجوبالار پيتچينگىندە ىرىكتەلىپ, وندىرىستىك جۇمىستارى وتكەن جىلى اياقتالدى. ال بيىل كەڭ كولەمدە كورەرمەن نازارىنا ۇسىنىلىپ وتىر. ءبىز بۇل ءفيلمدى وتاندىق كينووندىرىستى دامىتۋ مەن جاستار اراسىندا سالاماتتى ءومىر سالتىن ناسيحاتتاۋ ىسىندەگى ماڭىزدى قادام دەپ ەسەپتەيمىز. ءفيلمنىڭ ماقساتى – ەلىمىزدە سپورتتى دامىتۋ ماسەلەسىن كوتەرۋ عانا ەمەس, سونىمەن قاتار تاباندىلىق پەن جىگەردىڭ ماڭىزىن اشىپ كورسەتۋ. جاستارعا جول كورسەتىپ, موتيۆاتسيا سىيلاۋ كينونىڭ وزەگىنە اينالعان», دەدى ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي.
فيلم سيۋجەتىنە كەلسەك, باستى كەيىپكەردىڭ اتا-اناسى جول اپاتىنا ۇشىراپ, وعان وتباسىنىڭ تىرەگى ءارى سۇيەنىشى بولۋعا تۋرا كەلەدى. فۋتبول دەسە, جانىن بەرەتىن جىگىتتىڭ بالا كۇنگى ارمانىنان قول ۇزگىسى جوق. تۋىندى شىتىرمانعا تولى حيكاياعا نەگىزدەلگەن.
«90+1» – بۇل تەك سپورتتىق دراما ەمەس. بۇل – جاستارعا ارنالعان موتيۆاتسيالىق كينو. ءبىز قانداي قيىندىق بولسىن, ارمانعا جەتۋگە بولاتىنىن كورسەتكىمىز كەلەدى. بۇل – اتا-انالارعا دا «بالالارىڭىزعا سەنىڭىزدەر, قولداۋ كورسەتىڭىزدەر!» دەگەن ۇندەۋ», دەدى ءفيلمنىڭ ستسەناريسى قۋانىش كەرىمقۇلوۆ.
اتالعان فيلم 24 ساۋىردەن باستاپ ەلىمىزدىڭ بارلىق وڭىرىندە كەڭ كولەمدى پروكاتقا شىعادى.
سونداي-اق بيىل ۇلتتىق كينونى قولداۋ مەملەكەتتىك ورتالىعىنىڭ قولداۋىمەن بىرقاتار ماڭىزدى وتاندىق كينوجوبا جارىققا شىعادى. ولاردىڭ قاتارىندا لۋدومانيا ماسەلەسىن قوزعايتىن «يگرومانكا», 2011 جىلى تاراز قالاسىنداعى تەراكتى كەزىندە ەرلىكپەن قازا تاپقان عازيز بايتاسوۆ تۋرالى «كاپيتان بايتاسوۆ» جانە «كۇزگى سامال» اتتى الەۋمەتتىك-درامالىق ءفيلمى بار.
