تۇساۋكەسەر راسىمىندە ءسوز سويلەگەن تۇركى اكادەمياسىنىڭ پرەزيدەنتى, اكادەميك شاھين مۇستافاەۆ بۇل باسىلىم تەك كوركەم تۋىندىنىڭ تۇپنۇسقالىق رۋحىن قايتارۋ عانا ەمەس, سونىمەن قاتار قازاقستان مەن ازەربايجان اراسىنداعى مادەني بايلانىستاردى نىعايتۋدىڭ ايقىن كورىنىسى ەكەنىن اتاپ ءوتتى.
مۇحتار اۋەزوۆتىڭ اتالعان رومانى ازەربايجان تىلىندە العاش رەت 1954 جىلى ەيۋپ ابباسوۆتىڭ تارجىمەلەۋىمەن, سول كەزدەگى كيريلل قارپىندە جارىق كورگەن بولاتىن. الايدا ول نۇسقا ورىس تىلىنەن اۋدارىلعان ەدى. ودان بەرىدەگى 70 جىلدان استام ۋاقىت ىشىندە ايگىلى شىعارما ازەربايجان وقىرماندارىنا قايتادان ۇسىنىلعان ەمەس.
بۇل جولى رومان قازىرگى ازەربايجان ادەبي ءتىلى نورمالارىنا ساي لاتىن قارپىمەن ءارى قازاق تىلىندەگى تۇپنۇسقاسى بويىنشا سالىستىرىلا تەكسەرىلىپ, العاشقى باسىلىمداعى قاتەلىكتەر تۇزەتىلىپ, كەزىندە كەڭەستىك تسەنزۋرا سەبەبىمەن قىسقارىپ كەتكەن كەيبىر تۇستارى تولىقتىرىلىپ باسىلدى.
اكادەميك شاھين مۇستافاەۆ روماندى جاڭا الىپبيمەن قايتا باسىپ شىعارۋعا اتسالىسقان رەداكتور فاريد حۋسەينگە جانە بارشا شىعارماشىلىق توپقا ريزاشىلىعىن ءبىلدىردى.
– «اباي» رومانىنىڭ مۇنداي فورماتتا جارىق كورۋى – تەك ادەبي وقيعا عانا ەمەس. بۇل – مادەني جادىنى جاڭعىرتۋ, ورتاق رۋحاني مۇرامىزعا دەگەن قۇرمەت پەن ونى ساقتاۋ جولىنداعى ناقتى قادام. تۇركى اكادەمياسى الداعى ۋاقىتتا دا تۇركى حالىقتارىنىڭ مادەني-رۋحاني مۇراسىن زەردەلەۋ جانە ناسيحاتتاۋ باعىتىنداعى كەشەندى جۇمىستاردى جالعاستىرا بەرەدى, – دەدى اكادەميا باسشىسى.
تۇساۋكەسەرگە ازەربايجانداعى اتاتۇرىك ورتالىعىنىڭ جەتەكشىسى نيزامي دجافاروۆ, ازەربايجان ميللي ءماجىلىسىنىڭ دەپۋتاتتارى, قازاقستان رەسپۋبليكاسىنىڭ ازەربايجانداعى توتەنشە جانە وكىلەتتى ەلشىسى ءالىم بايەل, تۇركپا باس حاتشىسى مەحمەت سۇرەيا ەر, تۇركى مادەنيەتى مەن مۇراسى قورىنىڭ اپپارات جەتەكشىسى فاحري حادجيەۆ, سونداي-اق عىلىمي جانە ءبىلىم بەرۋ مەكەمەلەرىنىڭ وكىلدەرى, ادەبيەت جانە مادەنيەت قايراتكەرلەرى قاتىستى.
ريناتقىزى اسەماي
الىكەي مارعۇلان اتىنداعى
40 مەكتەپ-ليتسەيى
11 سىنىپ وقۋشىسى
