ايتا كەتەيىك, بيىل قازاقستاندا العاش رەت اتالىپ ءوتىپ جاتقان ۇلتتىق كىتاپ كۇنى – مەملەكەت باسشىسى قاسىم-جومارت توقاەۆتىڭ تاپسىرماسىمەن بەلگىلەنگەن مەرەكە. پرەزيدەنت بۇل باستامانى اتىراۋدا وتكەن ۇلتتىق قۇرىلتاي وتىرىسىندا كوتەرىپ, ونى ءبىلىم مەن كىتاپ وقۋعا دەگەن سۇيىسپەنشىلىكتى ارتتىرۋ ماقساتىندا ۇسىنعان بولاتىن.
وسى مەرەكە اياسىندا ۇيىمداستىرىلعان «ۇلتتىق كىتاپ» بايقاۋىندا وتاندىق جازۋشىلار, كىتاپ باسپاشىلارى, يلليۋستراتورلار مەن اۋدارماشىلار 10 اتالىم بويىنشا ماراپاتتالدى. باس جۇلدە – «جىل كىتابى» گران-ءپريىن «قازاقستاننىڭ تاريحي تۇلعالارى» سەرياسى ءۇشىن «الماتى كىتاپ» باسپاسىنىڭ پرەزيدەنتى گاۋحار سايماساەۆا يەلەندى.
سالتاناتتى جيىندا ەرلان قوشانوۆ كورنەكتى جازۋشى, ادەبيەت مايتالمانى اكىم تارازيدى ەسكە الىپ, مارقۇمنىڭ رۋحىنا قۇرمەت ءبىلدىردى. سونىمەن قاتار ول كىتاپتىڭ ادامزات وركەنيەتىندەگى ماڭىزىنا توقتالىپ, قازىرگى اقپاراتتىق زاماندا دا ونىڭ ءرولى باسەڭدەمەيتىنىن اتاپ ءوتتى.
«سان عاسىرلار وتسە دە, كىتاپتىڭ ادامزات ءۇشىن ماڭىزى وزگەرگەن جوق. بۇگىندە كىتاپ – زياتكەر ۇلت پەن سانالى قوعام قالىپتاستىرۋدىڭ نەگىزگى قۇرالىنا اينالدى. قازىرگى تاڭدا قولدانىپ جۇرگەن بارلىق تەحنولوگيا, مەديتسينا, ونەر – ءبارى دە كىتاپ وقۋ ارقىلى دامىعان. سوندىقتان مەملەكەت باسشىسى ايتقانداي, كىتاپ ۇلتتىڭ رۋحاني قۇندىلىعىنا اينالۋى ءتيىس. ۇلتتىق كىتاپ كۇنىن اتاپ ءوتۋدىڭ باستى ماقساتى – وسى», دەدى ءماجىلىس سپيكەرى.
ول ءوز سوزىندە كىتاپ شىعارۋ سالاسىنداعى وزەكتى ماسەلەلەرگە دە نازار اۋداردى. اتاپ ايتقاندا, سىرتقى نارىققا تاۋەلدىلىك, قازاق تىلىندەگى ادەبيەتتىڭ ازدىعى جانە باسقا دا تۇيتكىلدەرگە توقتالىپ ءوتتى.
«پرەزيدەنت ۇلتتىق قۇرىلتايدا يدەولوگيا سالاسىنداعى باستى باعىتتاردىڭ ءبىرى – كىتاپ شىعارۋ ەكەنىن باسا ايتتى. قازىرگى تاڭدا مەملەكەت بۇل باعىتقا ەرەكشە كوڭىل ءبولىپ وتىر. مىسالى, پارلامەنتتە قىزۋ تالقىلانىپ جاتقان جاڭا سالىق كودەكسى جوباسىندا دەپۋتاتتار وتاندىق كىتاپ باسپالارىن قوسىلعان قۇن سالىعىنان بوساتۋ جونىندە ۇسىنىس ەنگىزدى. بۇل ماسەلەدە ۇكىمەتپەن ورتاق شەشىمگە كەلەمىز دەپ ۇمىتتەنەمىز» دەدى ەرلان قوشانوۆ.
سونداي-اق, مەملەكەت باسشىسىنىڭ قولداۋىمەن ەلىمىزدە كىتاپحانالار جۇيەسى جاڭعىرتىلىپ جاتقانى, كىتاپحاناشىلاردىڭ جالاقىسى كوتەرىلگەنى جانە تسيفرلىق كىتاپحانالاردىڭ دامىپ كەلە جاتقانى ايتىلدى. بۇگىنگى تاڭدا ەلىمىزدە 4 مىڭعا جۋىق كىتاپحانا جۇمىس ىستەيدى. ولاردىڭ 5 ميلليوننان اسا تۇراقتى پايدالانۋشىسى بار, سونىڭ بەستەن ءبىرى – بالالار.
«AMANAT» پارتياسىنىڭ جەتەكشىسى رەتىندە ەرلان قوشانوۆ «KITAP – AMANAT» پارتيالىق جوباسىنىڭ ماڭىزدىلىعىنا دا توقتالدى. بۇل جوبا وتاندىق ادەبيەتتى كەڭىنەن ناسيحاتتاۋعا باعىتتالعان. قازىرگى تاڭدا جوبا اياسىندا ەلىمىزدىڭ بارلىق وڭىرلەرىندە پارتيا فيليالدارى جانىنان 24 ورتالىق اشىلعان. وندا ءتۇرلى كىتاپ كورمەلەرى, اۆتورلارمەن كەزدەسۋلەر جانە وزگە دە مادەني ءىس-شارالار ۇيىمداستىرىلىپ جاتىر.
ماراپاتتاۋ راسىمىنە مادەنيەت جانە اقپارات ءمينيسترى ايدا بالاەۆا, مادەنيەت جانە ونەر قايراتكەرلەرى, قوعام بەلسەندىلەرى مەن پارلامەنت دەپۋتاتتارى قاتىستى.
