فورۋمدا تۋريزم جانە سپورت ءمينيسترىنىڭ ورىنباسارى ەرجان ەركىنباەۆ:
«ۇكىمەت وتىرىسىندا ءتۋريزمدى تسيفرلاندىرۋ ماسەلەسىنە ەرەكشە نازار اۋدارىلىپ, بۇل باعىتتىڭ مەملەكەتتىك دەڭگەيدە باسىمدىققا يە ەكەنىن كورسەتەدى. بۇگىندە قازاقستاندا سەگىز تىلدە قولجەتىمدى Kazakhstan.travel تۋريستىك پورتالى, اۋەجايلاردا QR-كود جۇيەسى جانە eQonaq قوناقتاردى تىركەۋ پلاتفورماسى جۇمىس ىستەيدى. الايدا ءتۋريستىڭ تسيفرلى جولى ءالى دە تولىق قالىپتاسپاعان. بۇل ۇيالى بايلانىس وپەراتورلارى مەن ەلەكتروندىق تولەم جۇيەلەرى سەكىلدى جاڭا دەرەككوزدەردى بىرىكتىرۋ قاجەتتىگىن كورسەتەدى. مۇنداي كەشەندى ءتاسىل تۋريستەر مەن سالا وكىلدەرى ءۇشىن اشىق ءارى ىڭعايلى تسيفرلى ورتا قۇرۋعا مۇمكىندىك بەرەدى» دەپ اتاپ ءوتتى.
قازاقستان تۋريستىك سالانى بىرىڭعاي تسيفرلىق ەكوجۇيەگە بىرىكتىرۋدى كوزدەيدى. بۇل ءتاسىل تۋريستىك قىزمەتتەردىڭ بىرىزدىلىگىن جويىپ, ساياحاتتى جوسپارلاۋدان باستاپ ورنالاستىرۋ مەن كەرى بايلانىسقا دەيىنگى بارلىق نەگىزگى كەزەڭدەردى بىرىكتىرۋگە مۇمكىندىك بەرەدى. ماڭىزدى ءىس-شارادا تۋريزم مەن مەيماندوستىق يندۋسترياسىنداعى زاماناۋي تەحنولوگيالىق شەشىمدەر مەن نەگىزگى ترەندتەر ۇسىنىلىپ, تۋريزم سالاسىنداعى جەتەكشى ماماندار, ءىت-كومپانيالار, سونداي-اق قازاقستان مەن جاقىن شەت ەلدەردىڭ ستارتاپتارىنىڭ جەتەكشى وكىلدەرى, ونىڭ ىشىندە Pana, inDrive, Mastercard, Sabre, Mapster كوماپنيالارىنىڭ وكىلدەرى قاتىستى.
«مەملەكەت باسشىسى جاساندى ينتەللەكتىنى بارلىق سالالارعا ەنگىزۋ كەرەك ەكەنىن ايتتى. وسىعان وراي قولدا بار شەشىمدەردى بىرىكتىرۋ ءۇشىن فورۋم اياسىندا ماڭىزدى سۇراقتار تالقىلانىپ, ستارتاپتارعا قولداۋ كورسەتىلىپ وتىر. بۇگىندە تسيفرلى شەشىمدەر تۋريزم سالاسىنىڭ دامۋىنا ىقپال ەتىپ قانا قويماي, ەلىمىزگە تۋريستەردى تارتۋعا, تۋريستىك قىزمەت تۇرلەرىن وڭتايلاندىرۋعا, ارنايى سەرۆيستەر ارقىلى تابيعاتتا ايالاۋعا مول مۇمكىنشىلىك بەرەدى» دەپ اتاپ ءوتتى «Kazakh tourism» ۇك» اق باسقارما توراعاسىنىڭ ورىنباسارى دانيەل سەرجان ۇلى.
تۋريزم يندۋسترياسىنداعى تسيفرلاندىرۋ ماسەلەلەرى (TravelTech), ءتۋريزمدى دامىتۋداعى مەملەكەتتىك تسيفرلى قىزمەتتەردىڭ ءرولى (GovTech), مەيماندوستىق يندۋسترياسىنا ارنالعان تسيفرلى تەحنولوگيالاردى (HotelTech) IT-شەشىمدەر ارقىلى جەتىلدىرۋ مەن تۋريزم بيزنەسىنىڭ جاڭا مۇمكىندىكتەرىن قاراستىرعان ءۇش پانەلدىك سەسسيادا ماماندار ەلىمىزدەگى تۋريزم سالاسىنىڭ دامۋ بارىسىن تالقىلادى.
بايقاۋعا قولدانىستاعى پروتوتيپتەرى بار تۋريزم سالاسىنداعى 10-نان استام يننوۆاتسيالىق ءىت-جوبا جولدانعان. ولاردىڭ قاتارىندا ApartX, CheckInn, IZDE, OTA سياقتى ستارتاپتار بار. ىرىكتەۋ كەزەڭىنىڭ ناتيجەسىندە 10 پەرسپەكتيۆالىق ترەۆەل-ستارتاپ اۆتورلارى اقشالاي سىيلىققا يە بولىپ, جوبالارىن الەۋەتتى ينۆەستورلار مەن سەرىكتەستەرگە تانىستىردى. ءموبيلدى گيد, قازاقستان بويىنشا تۋرلاردى ىسكە اسىرۋ قوسىمشاسى, بورتتىق تۋر ساتۋ جۇيەسى, قوناق ۇيلەردى باسقارۋدى اۆتوماتتاندىرۋ جۇيەسى, پاتەر جالداۋدى اۆتوماتتاندىرۋ پلاتفورماسى, تۇرعىن ءۇي ىزدەۋ اگرەگاتورى جانە باسقا دا يننوۆاتسيالىق جوبالار تۋريزم سالاسى ءۇشىن تارتىمدى. بايقاۋدىڭ جالپى جۇلدە قورى 10 ميلليون تەڭگەنى قۇرادى.
الماتى
