اكىم اعانىڭ ءوزى تۋرالى دا, شىعارماشىلىعى تۋرالى دا كوپ ءسوز ايتۋعا بولادى. قازاق ادەبيەتىندە الىپتار توبىنان كەيىن كەلگەن ءبىر شوعىر تالانتتارمەن بىرگە شىقتى. اۋەزوۆتىڭ ءدارىسىن تىڭداعان از جازۋشىنىڭ ءبىرى بولدى. قايبىر جىلى مەنىڭ ء«ان سالۋعا ءالى ەرتە» دەگەن رومانىمدى وقۋعا اپارىپ بەرگەن ەدىم. سوندا شىعارمامدى باستان-اياق ىقتياتپەن وقىپ, ىزىنەن ەرگەن ىنىلەرىنە اسقان جاناشىرلىقپەن قاراپ, جىلى ءسوزىن اياماپ ەدى. روماندى تۇپ-تۋرا ءبىر اي وقىعان. مەن قالجىڭداپ: «اعا, كىشكەنتاي روماندى نەگە ءبىر اي وقىدىڭىز؟» دەپ ەدىم, «اينالايىن, مەنى اسىقتىرما. مەنىڭ تابيعاتىم سولاي. كەزىندە «اباي جولىن» ءتورت اي, «تىنىق دوندى» ءتورت اي وقىعام. ويتكەنى قولجازبانى اتتاپ وقىساڭ, كەي سويلەمدەرى قالىپ قويادى. اۆتوردىڭ نەگىزگى ويى سول سويلەمدە بولۋى مۇمكىن. سوندىقتان مەن ءبارىن اسىقپاي وقيمىن», دەپ ەدى. سوندا جازۋشىنىڭ اعالىق ءىلتيپاتىن, ايالى الاقانىن ەرەكشە سەزىندىم. اكىم اعا ءوزى دە «اندرەي» دەگەن اڭگىمەسىنىڭ قولجازباسىن وقىتقان بولاتىن. استانادا ءوتىپ جاتاتىن ءتۇرلى مادەني-رۋحاني ءىس-شارادان دا مەنى قالدىرمايتىن. مەنىڭ پايىمىمشا, اكىم تارازي – سوڭعى دەمى تاۋسىلعانشا قولىنان قالام تۇسپەگەن جازۋشى. جاقىندا عانا «Egemen Qazaqstan» گازەتىنە جاريالانعان نۇرعيسا تىلەنديەۆ تۋرالى ەسسەسى قانداي عاجاپ.
تاۋ-تۇلعانىڭ قازاققا بەرگەنى وراسان. اسىل اعامىزدى ەشقاشان ۇمىتپايمىز. قيمايمىز. اردا ازاماتتىڭ الدى جارىق بولسىن!
قۋانىش جيەنباي,
حالىقارالىق «الاش» ادەبي سىيلىعىنىڭ لاۋرەاتى
