سۋرەت: adebiportal.kz
بۇل كوشكە ىلەسكەندەر قازاق ادەبيەتىنىڭ قورجىنىنا ۇلان-عايىر ولجا سالدى. سونىڭ ءبىرى – ەندى ماڭگىلىككە اينالعان تارازي قالامىنان تۋىنداعان شىعارمالار.
جاس كۇنىمىزدە قالامداس دوستار ءبىر-ءبىرىمىزدى ءىس-ارەكەتىمىزگە وراي تانىمال قالامگەرلەردىڭ تاتىمدى تۋىندىلارىنا تەلىپ اتاۋ ۇردىسكە ەنگەن بولاتىن. بۇل – تارازي تۋىندىلارىنىڭ ساحنا تورىندە مازداپ جانىپ, كورەرمەن كوكىرەگىن جىلىتىپ تۇرعان شاعى ەدى. بىرەۋلەر «جولى بولعىش جىگىت» اتانسا, بىرەۋلەر «جاقسى كىسى», ال ەندى بىرەۋلەر «لاينەر» دەگەن اتقا يە بولىپ شالقىپ ءجۇردى. ءبىز وسىلايشا قالامگەر كەيىپكەرلەرىن ومىردەن ىزدەپ تاباتىنبىز. جازۋشىنىڭ تەاتر مەن كينودراماتۋرگيا سالاسىنداعى ەڭبەگى وراسان. ول ۇزاق ءسوز.
ءا.تارازي مۇستافا شوقاي تاقىرىبىنا باتىل قالام تارتتى. تۇركىستان بىرلىگى دەپ وتكەن ازاماتتىڭ بەينەسىن كەمەلدەنگەن سوتسياليزم كەزەڭىندە شىنايى بەينەلەپ, ەرلىك كورسەتتى. العاش دەگەننەن شىعادى, ف.رابلەنىڭ «گارگانتيۋا جانە پانتاگريۋەل» رومانىن دا العاش قازاق تىلىندە سويلەتتى.
اۋەلى سايىن ءوزى جازعان «ارعى-بەرگى جولمەن» ماڭگىلىككە اتتانسا, قاليحان «قوڭىر كۇزدە» قول بۇلعاپ كەتتى. «ەرتىستىڭ مۇحيتقا قۇيعانىن» سۋرەتتەپ, رامازان دا سوڭدارىنان ىلەستى. «سوڭعى كوشتى» شىعارىپ سالعان قابدەش تە سوڭدارىنان جول تارتتى. ەندى توپىراققا «تۇلپاردىڭ ءىزىن» قالدىرىپ, اكىم اعا دا اتتانىپ بارادى. ول دا ايتۋلى كوشتىڭ اقىرى بولىپ ۇيىرگە بارىپ قوسىلار. وندا دا ادەبيەت دەگەن الەم اڭگىمە بولماي قالماس. ويتكەنى ادەبيەتتى جەتىلدىرگەن وزدەرى ەمەس پە؟
قۋاندىق تۇمەنباي,
«ايبوز» ۇلتتىق ادەبي سىيلىعىنىڭ لاۋرەاتى
