جيىندا دەپۋتاتتار مۇددەلى تاراپتارمەن بىرگە جۇمىسشى ماماندىقتاردى قولداۋ جانە ولاردىڭ بەدەلىن ارتتىرۋ شارالارىن تالقىلادى. سونداي-اق ولار اتالعان باعىتتاعى زاڭنامانى جەتىلدىرۋگە قاتىستى ۇسىنىستارىن ايتتى.
ماۋلەن اشىمباەۆ اتاپ وتكەندەي, مەملەكەت باسشىسىنىڭ تاپسىرماسىمەن ۇكىمەت جۇمىسشى ماماندىقتارى جىلىن وتكىزۋگە ارنالعان ءىس-شارالار جوسپارىن قابىلداپ, جاۋاپتى مەملەكەتتىك ورگاندار مەن ۇيىمداردى بەكىتتى. سەنات توراعاسى پرەزيدەنت تاپسىرمالارىن ساپالى ىسكە اسىرۋ ءۇشىن بارلىق مۇددەلى تاراپتىڭ بەلسەندىلىك تانىتۋى ماڭىزدى ەكەنىن ايتىپ, بۇل رەتتە تەحنيكالىق جانە كاسىپتىك ءبىلىم بەرۋ جۇيەسىن كەشەندى تۇردە جاڭعىرتۋ قاجەتتىگىنە نازار اۋداردى.
«سەنات پرەزيدەنت قاسىم-جومارت توقاەۆ بەلگىلەپ بەرگەن مىندەتتەردى ورىنداۋ ءۇشىن زاڭنامانى جەتىلدىرۋگە ارنالعان باستامالاردى بەلسەندى تۇردە ىلگەرىلەتۋدى كوزدەپ وتىر. وسى ىستە ساراپشىلاردى, عالىمداردى جانە سالا ماماندارىن جۇمىلدىرۋدىڭ بەرەرى مول. جالپى, بۇل باعىتتا, ەڭ الدىمەن, تەحنيكالىق جانە كاسىپتىك ءبىلىم بەرۋ جۇيەسىن ساپالى قايتا جاڭعىرتۋ قاجەت. سونداي-اق اتالعان ءبىلىم بەرۋ جۇيەسىن جاھاندىق ترەندتەرگە بەيىمدەۋ جانە ىشكى ەڭبەك ميگراتسياسىن وڭتايلى دامىتۋ دا اسا ماڭىزدى. جۇمىسشى ماماندىق يەلەرىن الەۋمەتتىك قولداۋدىڭ جانە ولاردىڭ بەدەلىن ارتتىرۋ جۇمىستارىن جۇرگىزۋ دە ەرەكشە مانگە يە. قازىر سەنات وسى باعىتتاعى زاڭنامالىق باستامالارمەن جۇمىس ىستەپ جاتىر», دەدى م.اشىمباەۆ.
سونىمەن قاتار پالاتا سپيكەرى بۇل كەزدەسۋ سەناتتىڭ ورتالىقتا جانە وڭىرلەردە اتقارىپ كەلە جاتقان جۇمىسىنىڭ جالعاسى ەكەنىن تىلگە تيەك ەتتى. ناقتى ايتقاندا, دەپۋتاتتار بۇعان دەيىن پەتروپاۆلدا وڭىرلەردە ەڭبەك رەسۋرستارىن دامىتۋ ماسەلەلەرىنە ارنالعان دوڭگەلەك ۇستەل وتكىزگەن ەدى. بۇعان قوسا ەڭبەك ادامىن قولداۋ ماسەلەسى پارلامەنتتىك تىڭداۋدا جانە سەناتورلار كەڭەسىنىڭ وتىرىسىندا تالقىلاندى. اتالعان ءىس-شارالاردا بۇل باعىتتاعى وزەكتى ماسەلەلەردى شەشۋگە ارنالعان زاماناۋي تاسىلدەر ءسوز بولدى.
بۇگىنگى كەزدەسۋگە قاتىسۋشىلار بىلىكتى كادرلار تاپشى قازىرگىدەي كەزەڭدە ءبىلىم بەرۋ جۇيەسىنىڭ بارلىق بۋىنىن دامىتۋ وتە وزەكتى ماسەلەگە اينالىپ وتىرعانىن باسا ايتتى. سەنات توراعاسى اتاپ وتكەندەي, بۇل رەتتە ءبىلىم بەرۋ جۇيەسىنىڭ ەڭبەك نارىعىمەن جانە وندىرىسپەن ءوزارا ءىس-قيمىل ساپاسىن ارتتىرۋ, ونى شەشۋ بارلىق مۇددەلى تاراپتىڭ جۇيەلى ءارى كەشەندى بىرلەسكەن جۇمىسىن قاجەت ەتەدى.
ءىس-شاراعا وقۋ-اعارتۋ ءمينيسترى عاني بەيسەمباەۆ, ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا, باسقا دا مەملەكەتتىك ورگانداردىڭ, «اتامەكەن» ۇلتتىق كاسىپكەرلەر پالاتاسىنىڭ, «ماشينا جاساۋشىلار وداعىنىڭ» جانە «وتباسى بانكتىڭ» باسشىلىعى, سونداي-اق ساراپشىلار مەن قوعام قايراتكەرلەرى قاتىستى.
