اتالعان ەلدى مەكەن شاھار مارتەبەسىن العان سوڭ, 4 مىڭ كىتاپ قورىمەن شاعىن عانا عيمارات ىشىندە قالالىق كىتاپحانا قۇرىلعان ەدى. سول 2022 جىلدان باستاپ-اق مۇندا جىل سايىن ءتۇرلى مادەني-كوپشىلىك ءىس-شارا ۇيىمداستىرىلىپ, تۇرعىنداردىڭ كىتاپ وقۋعا دەگەن قىزىعۋشىلىعىن ارتتىرۋ ماقساتىندا جۇمىس ىستەپ كەلدى. ال بيىل بولات وتەمۇراتوۆ قورىنىڭ قولداۋىمەن سالىنعان ورتالىققا كوشىرىلىپ, زاماناۋي, جاڭا كەيىپكە ەندى.
ايتا كەتەيىك, ورتالىقتىڭ جالپى اۋدانى – 8,5 مىڭ شارشى مەتر, نىسان ءبىر ۋاقىتتا مىڭ ادامدى قابىلداي الادى. ورتالىق – حالىقارالىق ستاندارتتارعا ساي سالىنعان ءىرى مادەني-سپورتتىق كەشەن. مۇندا سپورتتىق, ءبىلىم جانە بوس ۋاقىت وتكىزۋگە ارنالعان الاڭدار بار. قوناقتار ءۇشىن 233 ورىندىق كينوتەاتر, 300 ادامعا ارنالعان ءدارىسحانا, كورمە جانە كونفەرەنتسيا زالدارى, ستۋديالار, كوۆوركينگ جانە وقۋ زالى بار كىتاپحانا قىزمەت ەتەدى. بالالار ءۇشىن روبوتتەحنيكا مەن شاحماتتان باستاپ, حورەوگرافيا, قولدانبالى ونەرگە دەيىنگى ءتۇرلى ۇيىرمە جۇمىس ىستەيدى. قوسشىداعى كرەاتيۆتى حاب – مەملەكەت باسشىسىنىڭ تاپسىرماسىمەن اشىلعان ەلىمىزدەگى 13-ورتالىق. القيسسا.
قوسشى قالاسى ورتالىقتاندىرىلعان كىتاپحانا جۇيەسىنىڭ باسشىسى سىمبات باۋىرجانقىزىنىڭ ايتۋىنشا, جىل سايىن كىتاپ قورىن تولىقتىرۋ جۇمىستارىن جۇرگىزۋ ناتيجەسىندە بۇگىندە كىتاپ قورى 20 مىڭعا جەتكەن. وبلىستىق جانە جەرگىلىكتى بيۋدجەتتىڭ قارجىلاندىرۋىمەن تۇراقتى تۇردە وقىرماننىڭ سۇرانىسىنداعى كىتاپتار ساتىپ الىنادى. بۇل جۇمىستاردى كىتاپحانانىڭ جيناقتاۋ-وڭدەۋ ءبولىمىنىڭ ماماندارى جۇزەگە اسىرادى. كوپشىلىك كورمەيتىن, بىلمەيتىن, بىراق كىتاپحانا ىسىندەگى اسا ماڭىزدى جۇمىستاردىڭ ءبىرى وسى دەيدى.
«كۇندەلىكتى وقىرماننىڭ سۇرانىسىنداعى كىتاپتار ارنايى جۋرنالعا تىركەلىپ وتىرادى. ول ءتىزىمدى كىتاپحاناشىلار جيناقتاپ, ءارى قاراي كىتاپ دۇكەندەرىمەن, باسپالارمەن بايلانىس ورناتادى. قاجەتتى ءتىزىمدى بەكىتىپ, ونى ساتىپ العان سوڭ, جۇمىستىڭ ۇقىپتىلىق پەن مۇقياتتىلىقتى قاجەت ەتەتىن بولىگى باستالادى. ءاربىر كەلگەن كىتاپتى نومىرلەپ, كىتاپحانا ءمورى باسىلىپ, جۋرنالعا تىركەلەدى. كىتاپحانا ءىسىن اۆتوماتتاندىرۋ جۇيەسىندە ەلەكتروندى كاتالوگكە ەنگىزىلەدى. مۇنىڭ بارلىعى – ءار كىتاپتى وڭدەۋدەن وتكىزۋ كەزەڭى. وڭدەۋدەن وتكەن كىتاپتار كىتاپحانانىڭ قىزمەت كورسەتۋ بولىمىنە تاپسىرىلادى», دەيدى سىمبات باۋىرجانقىزى.
جاڭا كىتاپحانانىڭ كوركى كوز تارتادى. ءستيلى دە بولەك, كەڭ ءارى زاماناۋي ۇلگىدە سالىنعان. ەڭ باستىسى, وقىرمانعا بارلىق جاعداي جاسالعان: كىتاپتى قالاي وقيمىن دەسەڭىز دە ءوز ەركىڭىز. سامساپ تۇرعان سورەلەر. كرەاتيۆتى كىتاپحاناعا كەرەكتى قۇرال-جابدىقتار تولىعىمەن قامتىلعان. ىشكى ديزاينى دا جانعا جىلىلىق, ميعا تىنىشتىق سىيلايدى. ءيا, رۋحاني ورىن بۇگىندە ەلىمىزدە بالاماسى جوق كىتاپحانانىڭ ءبىرى بولىپ ەسەپتەلەدى.
«كۇندەلىكتى 100–150 وقىرمان كەلەدى. ارينە, وقىرماننىڭ كوپتىگى كوڭىل قۋانتادى. بۇل كىتاپحاناعا دەگەن جاستار اراسىندا جاڭا كوزقاراس تۋدىراتىندىعى انىق. جالپى, جىل سايىن كىتاپحانا جيىرما بەس مىڭ كەلۋشىگە قىزمەت كورسەتەدى, ونىڭ ىشىندە مەكتەپ جاسىنداعى بالادان باستاپ زەينەتتەگى قاريالارعا دەيىنگى تۇرعىندار بار. ارقايسىسىنىڭ سۇرانىسى ءارتۇرلى, سوعان ساي قاجەتتى اقپارات بەرۋ – ءبىزدىڭ باستى ماقساتىمىز», دەيدى ورتالىقتاندىرىلعان كىتاپحانا جۇيەسىنىڭ باسشىسى.
سونداي-اق, ونىڭ ايتۋىنشا, كرەاتيۆتى كىتاپحانادا مادەني-رۋحاني ءىس-شارالار دا ءجيى وتەدى.
«كىتاپحانا – اۆتور مەن وقىرمان اراسىنداعى التىن كوپىر ىسپەتتەس بولعاندىقتان, اقىن-جازۋشىلارمەن شىعارماشىلىق بايلانىستامىز. سونداي-اق بيىل «فوليانت» باسپاسى دا جاڭا كىتاپحانانىڭ اشىلۋىنا وراي مىڭنان استام كىتاپتى سىيعا تارتتى. ودان بولەك ەسىمدەرى ەلىمىزگە ايان اقىن-جازۋشىلار ءوز كىتاپتارىن قورعا تارتۋ ەتىپ وتىرادى», دەيدى ول.
عىلىم كۇنىنە وراي ورتالىق كىتاپحانانىڭ ۇيىمداستىرۋىمەن سانجار كەرىمبايدىڭ «قانىش جانە عىلىمي مايدان» كىتابى جەلىسىنەن اشىق ءدارىس ءوتتى. شوقان ءۋاليحانوۆتىڭ 190 جىلدىعىنا وراي جارىلقاپ بەيسەنباي ۇلى مەن سەرىك نەگيموۆتىڭ قاتىسۋىمەن «شوقان ءۋاليحانوۆ مۇراسى» تاقىرىبىندا عىلىمي كونفەرەنتسيا دا ۇيىمداستىرىلعان. ال قازىرگى تاڭدا كىتاپحانا قابىرعاسىندا «جانازىق» وقىرمان كلۋبى قۇرىلىپ, سەنبى سايىن ءتۇرلى شىعارما تالقىلايدى.
«استانا قالاسىنان «القا», «Oyorda» كلۋبتارى دا كىتاپحانامىزعا قىزىعۋشىلىق تانىتىپ, بىرلەسە جۇمىس ىستەۋگە دايىن ەكەندەرىن ايتىپ جاتىر. مۇنىڭ ءبارى جاستار اراسىندا كىتاپ وقۋ قايتا ترەندكە اينالىپ كەلە جاتقاندىعىن كورسەتەدى», دەيدى سىمبات باۋىرجانقىزى.
تاعى ءبىر جاقسى جاڭالىق, بيىلدان باستاپ جۇمىس ۋاقىتىندا كىتاپحاناعا كەلۋگە ۋاقىتى جوق جاندار ءۇشىن مەكەمەلەرگە بارىپ قىزمەت كورسەتەتىن «جىلجىمالى كىتاپحانا» ىسكە قوسىلدى. بۇگىندە بۇل قىزمەتتى قوسشى قالاسىنىڭ بالاباقشالارى مەن قالالىق ەمحانا پايدالانىپ وتىر.
ء«بىزدىڭ جاس قالامىزدا وسىنداي كەرەمەت كوميۋنيتي ورتالىقتىڭ اشىلعانىنا وتە قۋانىشتىمىن. شەتەلدىك كىتاپحانالاردان ءبىر مىسقال كەم تۇسپەيتىن ۇلگىدەگى رۋحاني وشاق قالامىزدىڭ تۇرعىندارىن بەك قۋانتتى. وقىرمانعا جايلى جاعداي جاسالىپ, تۇرعىنداردىڭ وقۋعا قۇشتارلىعى ارتا ءتۇستى. قوسشى – حالىق سانى تەز ءوسىپ كەلە جاتقان قالالاردىڭ ءبىرى, سول سەبەپتى تەڭدەسى جوق كىتاپحانانىڭ ءبىزدىڭ قالادان اشىلۋى قاجەت ەدى. كۇندەلىكتى وقىرمان قاراسى ارتپاسا, ازايعان ەمەس. كىتاپتى جانىمەن سۇيەتىن كىتاپحاناشى ءۇشىن بۇل – زور مارتەبە», دەيدى قوسشى قالاسى ورتالىقتاندىرىلعان كىتاپحانا جۇيەسىنىڭ باسشىسى سىمبات باۋىرجانقىزى.
رۋحاني, مادەني يممۋنيتەتى مىقتى ەلدىڭ ىرگەسى دە بەرىك, ساپاسى دا جاقسى بولارى ءسوزسىز. وقيتىن ۇلت قالىپتاستىرۋ جولىندا مەملەكەت باسشىسى دا بىرقاتار باستاما كوتەرىپ, تىكەلەي نازارىندا ۇستاپ وتىر. ءۇشىنشى ۇلتتىق قۇرىلتايدا بارشا حالىقتى كىتاپ وقۋ مادەنيەتىن قالىپتاستىرۋعا شاقىرعانى دا ەستە. وسى ورايدا زاماناۋي كىتاپحانالاردىڭ سانىمەن قوسا وقىرمانى دا كوبەيگەنى وقيتىن ۇلت قالىپتاستىرۋ جولىنداعى نەگىزگى قادام بولماق.
