763 شارشى مەتر اۋماققا ورنالاسقان «ماڭعىستاۋ» تەمىرجول ۆوكزالى كەشەنىنىڭ اۋماعىن ۇلعايتۋ بارىسىندا «قازاقستان تەمىرجولى» ۇك تەڭگەرىمىندەگى 2 گەكتارعا جۋىق جەر تەلىمى مەملەكەت مەنشىگىنە قايتارىلىپ, قازىرگى تاڭدا ءسۇرۋ جۇمىسى باستالدى, رەكونسترۋكتسيالاۋ جۇمىسىنا بايلانىستى «ماڭعىستاۋ» تەمىرجول ۆوكزالى ۋاقىتشا جانىنداعى بوس عيماراتقا اۋىستىرىلدى.
كولىك مينيسترلىگىنىڭ مالىمەتىندە جاريالانعانداي, ەلىمىزدىڭ بارلىق وڭىرىندە 125 تەمىرجول ۆوكزالىن قايتا جاڭعىرتۋ جۇمىستارى باستالعان بولسا, ماڭعىستاۋ وبلىسى «ماڭعىستاۋ» ستانساسىنداعى تەمىرجول ۆوكزالىن جوندەۋ جۇمىسى وسى جاڭعىرتۋدىڭ اياسىندا قولعا الىنعان.
ماڭعىستاۋ وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادايبەك قاليەۆتىڭ ايتۋىنشا, «ماڭعىستاۋ» تەمىرجول ۆوكزالىن جاڭارتۋ جۇمىسىن بيىل جىل سوڭىنا دەيىن اياقتاۋ جوسپارلانعان, جۇمىسقا ازىرگە 150-گە جۋىق جۇمىسشى جۇمىلدىرىلىپ وتىر.
ماڭعىستاۋ وڭىرىندە تەمىرجول ۆوكزالدارىنىڭ جاعدايى ءماز ەمەس – شاعىن بەكەتتەردى ايتپاعاندا, اتى دارداي ۆوكزالداردىڭ ءوزى كوزگە قوراش, ەسكىرگەن, زاماناۋي تالاپتارعا ساي كەلمەيدى. مادەنيەتتىڭ بوساعادان باستالاتىنىن ەسكەرسەك, بۇل ءتۋريزمدى دامىتامىن دەگەن ءوڭىر ءۇشىن قولايسىزدىق تۋدىراتىنى بەلگىلى. اسىرەسە وبلىس ورتالىعى اقتاۋ قالاسىنا جولاۋشى قابىلدايتىن «ماڭعىستاۋ» ستانساسىنداعى ۆوكزالدىڭ جۇپىنى ءحالى تۇرعىنداردى كوپتەن تولعاندىرىپ جۇرگەن ەدى. بيىل ەل ۇكىمەتىنىڭ قولداۋىمەن ماڭعىستاۋدا ءبىر ەمەس ءۇش ۆوزكالعا – «بەينەۋ», «شەتپە», «ماڭعىستاۋ» ۆوكزالدارىنا كۇردەلى جوندەۋ جۇمىسى جۇرگىزىلەدى. ۇشەۋى دە كۇرە جولدىڭ بويىنداعى ەڭ ءىرى ورتالىقتار, اقتاۋعا پويىزبەن كەلەمىن دەگەن جولاۋشى بەينەۋ مەن شەتپە ارقىلى جەتەدى.
الدىمەن قولعا الىنعان «ماڭعىستاۋ» ستانساسىنداعى ۆوكزالدى جوندەۋ جوباسى بارىسىندا ۆوكزالداردىڭ ىشكى جانە سىرتقى كەلبەتىن تولىق جاڭارتۋمەن بىرگە سەرۆيستىك ينفراقۇرىلىمى وزگەرتىلمەك. بۇل جونىندە ماڭعىستاۋ جۇك تاسىمالى بولىمشەسىنىڭ ديرەكتورى ناجىمەدەن عۇباشوۆ ايتىپ بەردى.
– كەشەندى جاڭعىرتۋ بارىسىندا كاسسالار, انىقتاما ورنى, دارەتحانالار مۇمكىندىگى شەكتەۋلى جاندار ءۇشىن قولجەتىمدى بولادى. سونداي-اق كوتەرگىش قۇرىلعىلار, تاكتيلدى جولاقتار, يندۋكتسيالىق پانەلدەر ورناتىلىپ, اربالار جاڭارتىلادى. جاڭا ءدامحانا اشۋ, ۆەندينگ اپپاراتتارىن ورناتۋ, ساقتاۋ كامەرالارىن كەڭەيتۋ, دەمالىس بولمەلەرىن جانە «انا مەن بالا» بولمەلەرىن ۇيىمداستىرۋ, كۇتۋ زالدارىن تەگىن Wi-Fi جەلىسىمەن جابدىقتاۋ جوسپارلانعان, دەدى ماڭعىستاۋ جۇك تاسىمالى بولىمشەسىنىڭ ديرەكتورى ناجىمەدەن عۇباشوۆ.
ماڭعىستاۋ وبلىسى
