فوتو: ەكولوگيا جانە تابيعي رەسۋرستار مينيسترلىگى ءباسپاسوز قىزمەتى
بۇل جوبا «جاسىل دامۋ» اكتسيونەرلىك قوعامىنىڭ قولداۋىمەن جۇزەگە اسىرىلىپ جاتىر. ىنتىماقتاستىق 2024–2029 جىلدارعا ارنالعان «تازا قازاقستان» ەكولوگيالىق مادەنيەتتى دامىتۋ تۇجىرىمداماسىنىڭ اياسىندا قولعا الىندى. اتالعان قۇجاتتىڭ باستى ماقساتى – ەلىمىزدەگى قورشاعان ورتانىڭ جاي-كۇيىن جاقسارتۋ.
«ينتەرمۋلتيسەرۆيس» – 2008 جىلى الماتى قالاسىندا نەگىزى قالانعان, گوفر كارتوننان جاسالاتىن قاپتامالار وندىرىسىندە كوش باستاپ تۇرعان وتاندىق كاسىپورىنداردىڭ ءبىرى. كومپانيا ءوندىرىس بارىسىندا زاماناۋي تەحنولوگيالاردى قولدانا وتىرىپ, قورشاعان ورتاعا كەلەتىن زياندى ازايتۋ ماقساتىندا قايتا وڭدەلگەن شيكىزاتتى بەلسەندى تۇردە پايدالانادى.
ال «Technic Destroy» جشس – قالدىقتاردى قايتا وڭدەۋگە باعىتتالعان مامانداندىرىلعان كومپانيا. 2024 جىلدىڭ تامىزىندا بۇل كومپانيا الماتىدا قازاقستانداعى العاشقى ليتي-يوندى باتارەيالاردى قايتا وڭدەيتىن زاۋىتتى ىسكە قوستى. كاسىپورىن اي سايىن 20 تونناعا دەيىن اككۋمۋلياتورلاردى قايتا وڭدەپ, قۇرامىنان ليتي ۇنتاعىن, اليۋميني مەن مىس ءتارىزدى قۇندى ەلەمەنتتەردى ءبولىپ الا الادى.
كەلىسىم اياسىندا تاراپتار وندىرىستىك رەسۋرستاردى بىرىكتىرىپ پايدالانۋ, تەحنولوگيالىق تاجىريبە مەن شيكىزاتپەن الماسۋ باعىتىندا جۇمىس ىستەۋدى جوسپارلاپ وتىر. بۇل سەرىكتەستىك ماكۋلاتۋرانى وڭدەۋدىڭ تيىمدىلىگىن ارتتىرىپ قانا قويماي, قورشاعان ورتاعا تۇسەتىن جۇكتەمەنى ازايتىپ, سالانىڭ تۇراقتى دامۋىنا جول اشۋى ءتيىس. مۇنداي ءوزارا ارەكەتتەستىك ەلىمىزدەگى ەكولوگيالىق احۋالدى جاقسارتۋعا باعىتتالعان بيزنەستىڭ ناتيجەلى ىنتىماقتاستىعىنىڭ ۇلگىسى بولماق.
