تۋريزم سالاسىنىڭ جاھاندىق ۇردىستەرى جانە ونىڭ ەلدەر ەكونوميكاسىنىڭ وسۋىنە قوسقان ۇلەسى تالقىلاندى. تاۋ شاڭعىسى باعىتى تاۋلى اۋداندار مەن جالپى ەلىمىزدىڭ الەۋمەتتىك-ەكونوميكالىق دامۋىنىڭ ماڭىزدى قۇرالى ەكەنى ايتىلدى.
دجوان ۆيلادومات تۋريزمگە نازار اۋدارۋدى ەسكەرە وتىرىپ, بىرقاتار ەلدىڭ ەكونوميكا قۇرىلىمدارىن ترانسفورماتسيالاۋ بويىنشا جوبالاردى ىسكە اسىرۋ ناتيجەلەرىمەن ءبولىستى. بۇگىنگى تاڭدا كومپانيادا 120-دان استام جوبا بار, وعان داۆوس جانە سەنت-موريتس (شۆەيتساريا), كۋرشەۆەل (فرانتسيا), يشگل جانە تيرول (اۋستريا), ۆەيل جانە اسپەن (اقش), ۋيستلەر-بلەككومب (كانادا) سياقتى قىسقى تۋريستىك برەندتەر, سونداي-اق وتكەن جىلى كەلۋشىلەر سانى 9,6 ملن ادامدى قۇراعان, 80 مىڭ حالقى بار اندوررا كۋرورتتارى كىرەدى. 60 جىلدان استام ۋاقىت بويى كومپانيا تاۋ شاڭعىسى كەشەندەرىن دامىتۋدا الەمدىك كوشباسشىعا اينالدى.
تاراپتار الماتى تاۋ كلاستەرىن بىرلەسىپ دامىتۋ كەلەشەگىن قاراستىردى. بۇگىنگى تاڭدا تۋريستىك اعىن جىلىنا 2 ملن ادامدى قۇرايدى, جالپى ماۋسىمدىق 2 مىڭ جۇمىس ورنى اشىلدى. جالپى ۇزىندىعى 41 شاقىرىم تراسسادان جانە 16 كوتەرگىشتەن تۇراتىن قولدانىستاعى ينفراقۇرىلىم كۇنىنە 6 مىڭ ادامدى قامتاماسىز ەتۋگە مۇمكىندىك بەرەدى. بۇل رەتتە وتاندىق جانە شەتەلدىك تۋريستەر تاراپىنان سۇرانىستىڭ ارتۋى ماۋسىمدىق تۋريستىك دەستيناتسيا رەتىندە تاۋ شاڭعىسى ءتۋريزمىن دامىتۋدىڭ مەملەكەتتىك ستراتەگياسىن ودان ءارى جەتىلدىرۋدى تالاپ ەتەدى. تالداۋ ناتيجەسىنە سايكەس تراسسالار ۇزىندىعىن 227 شاقىرىمعا, كوتەرگىشتەر سانىن 58-گە دەيىن ارتتىرۋ ارقىلى كلاستەر ينفراقۇرىلىمىن دامىتۋ اعىمداعى وتكىزۋ قابىلەتىن 5,6 ەسەگە, كۇنىنە 34 مىڭ ادامعا دەيىن جەتكىزۋگە, 10 مىڭ تىكەلەي جۇمىس ورنىن اشۋعا مۇمكىندىك بەرەدى. وسىلايشا, 2029 جىلعا قاراي الماتى تاۋ كلاستەرى جىلىنا 7,5 ملن-عا دەيىن تۋريست قابىلداي الادى. سونىمەن قاتار ەنشىلەس جانە سەرۆيستىك ەكونوميكانىڭ دامۋىنا تۇراقتى اسەر كۇتىلۋدە.
ينكليۋزيا دا ماڭىزدى سالا رەتىندە اتالدى. ينفراقۇرىلىمدى جاڭعىرتۋ بالالاردىڭ قىسقى سپورت تۇرلەرىن مەڭگەرۋى جانە وتباسىلىق بوس ۋاقىتىن ۇيىمداستىرۋ ءۇشىن ءبىلىم بەرۋ باعدارلامالارىن كەڭىنەن دامىتۋعا مۇمكىندىك بەرەدى.
پرەمەر-مينيستر قازىرگى جاھاندىق ەكونوميكالىق جاعدايدا ارتاراپتاندىرۋعا باسىمدىق بەرىلگەنىن اتاپ ءوتتى. تۋريزم سالاسى وڭدەۋ ونەركاسىبى, تسيفرلاندىرۋ, كولىك جانە لوگيستيكا سياقتى سالالارمەن قاتار ەكونوميكالىق ءوسۋدىڭ جاڭا باعىتىنا اينالۋعا ءتيىس.
كەزدەسۋ سوڭىندا قاتىسۋشىلار حالىقارالىق ستاندارتتارعا بەيىمدەلگەن ينفراقۇرىلىمدى جاڭعىرتۋ بويىنشا بىرلەسىپ جۇمىس ىستەۋگە نيەت ءبىلدىردى.
