قاسىم قايسەنوۆ اتىنداعى 68303 اسكەري ءبولىمىنىڭ جەكە قۇرامىنا جاڭا ارنايى تەحنيكالاردىڭ كىلتىن تاپسىرۋ راسىمىنە وبلىس اكىمى بەرىك ءۋالي, توتەنشە جاعدايلار ءمينيسترى شىڭعىس ءارىنوۆ قاتىستى.
وبلىس قۇرىلعالى بەرى وڭىرگە 28 ءورت ءسوندىرۋ تەحنيكاسى مەن 24 ينجەنەرلى تەحنيكا بەرىلگەن. سالتاناتتى جيىندا قۇتقارۋ قىزمەتىنىڭ قاجەتتىلىكتەرىنە ارنالعان 23 تەحنيكانىڭ كىلتى جۇرگىزۋشىلەرگە تاپسىرىلدى. ولاردىڭ قاتارىندا جوعارى ءوتىمدى جۇك كولىكتەرى, ارنايى قۇتقارۋ ماشينالارى مەن «ترەكول» كولىگى بار.
ء«بىزدىڭ ايماق – ورماندى-دالالى, ءورت قاۋپى جوعارى ءوڭىر. سوندىقتان بۇل سالادا ەڭبەك ەتىپ جۇرگەن ازاماتتارعا ارتىلار جۇك تە, سەنىم دە مول. ولار – انتىنا ادال, سەرتىنە بەرىك, ەلدىڭ اماندىعىن بارىنەن جوعارى قوياتىن ازاماتتار. سول تۇرعىدا وقىس جاعدايلارعا قاشاندا دايىن بولۋ ماقساتىندا قاجەتتى قاۋىپسىزدىك تەحنيكالاردى كەزەڭ-كەزەڭىمەن تولىقتىرۋ تۇراقتى نازاردا بولاتىنىن دا باسا ايتقىم كەلەدى», دەدى ءوڭىر باسشىسى سالتاناتتى راسىمدە سويلەگەن سوزىندە.
توتەنشە جاعدايلار ءمينيسترى ش.ءارىنوۆ جاڭا تەحنيكالاردىڭ قۇتقارۋشىلار جۇمىسىنا ۇلكەن سەرپىن بەرەتىنىنە سەنىم ءبىلدىردى. ءىس-شارا سوڭىندا وبلىس اكىمى توتەنشە جاعدايلار مينيسترىمەن بىرگە قۇتقارۋشىلار اللەياسىنا شىرشا كوشەتتەرىن وتىرعىزدى.
اباي وبلىسى
