جوندەۋ جۇمىستارى مەملەكەت باسشىسى قاسىم-جومارت توقاەۆتىڭ ءۇشىنشى ۇلتتىق قۇرىلتايدا بەرگەن تاپسىرماسىنا وراي جۇزەگە استى.
بۇگىن اتالمىش مەكەمەنىڭ مودەرنيزاتسيادان كەيىنگى اشىلۋ سالتاناتى ءوتىپ, جيىنعا زيالى قاۋىم وكىلدەرى قاتىستى. سالتاناتتى ءىس-شارادا بەلگىلى جازۋشى ساۋلە دوسجان, قازاقستان ۇلتتىق كىتاپحاناسىنىڭ ديرەكتورى عازيزا قۇدايبەرگەن, اقىن, اۋدارماشى, جۋرناليست ماقپال مىسا اقجارما تىلەكتەرىن ايتىپ, وقىرمان قاۋىمدى قۇتتىقتادى.
«كىتاپحانا – ءبىلىم مەن ىزدەنىستىڭ, تاريح پەن جاڭاشىلدىقتىڭ توعىساتىن ورنى. سوندىقتان, مۇنداي مەكەمەلەردى جاڭارتۋ جۇمىستارى الداعى ۋاقىتتا ءوڭىردىڭ وزگە اۋداندارىندا دا جالعاسىن تابادى. بيىل وبلىستاعى ءۇش كىتاپحانا زامانعا ساي كۇردەلى جوندەۋدەن وتپەك. مۇنداي يگى باستامالار بارشا وقىرمانعا جاڭا سەرپىلىس بەرىپ, ەل پرەزيدەنتى اتاپ وتكەندەي, «ناعىز وقيتىن ۇلتقا» اينالۋىمىزعا جول اشارىنا سەنىمدىمىن», دەدى الماتى وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ.
