بەس كۇن بويعى باسەكەدە ەلىمىزدىڭ 20 ءوڭىرىنىڭ كوللەدجدەرىنەن كەلگەن 2 مىڭعا جۋىق جاس باسكەتبول, شاعىن فۋتبول, توعىزقۇمالاق, شاحمات, ۇستەل تەننيسى جانە ۆولەيبول سىندى سپورت تۇرلەرىنەن باق سىناستى. جارىس قورىتىندىلانعان ماراپاتتاۋ راسىمىندە وقۋ-اعارتۋ مينيسترلىگىنىڭ تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت عاريفۋللا ۇلى مەن تۇركىستان وبلىسى اكىمىنىڭ ورىنباسارى بەيسەنباي تاجىباەۆ قۇتتىقتاۋ ءسوز سويلەدى. «مەملەكەت باسشىسى جاريالاعان «جۇمىسشى ماماندىقتار جىلى» اياسىندا العاش رەت ۇيىمداستىرىلعان «ەڭبەك كۋبوگى» رەسپۋبليكالىق سپارتاكياداسىنىڭ تۇركىستاندا وتكىزىلۋى – جاستارىمىزدى تەك سپورتتىق سايىسقا ەمەس, ەلجاندىلىققا, رۋحاني تاربيە مەن تاريحقا تاعزىم ەتۋگە باستايتىن ماڭىزدى قادام», دەدى اسەت عاريفۋللا ۇلى.
جالپى كوماندالىق ەسەپ ناتيجەسىندە, ماڭعىستاۋ وبلىسىنىڭ ستۋدەنتتەرى ءۇشىنشى, قاراعاندى وبلىسى ەكىنشى ورىندى يەلەندى. ال الماتى قالاسىنىڭ جاستارى جەڭىمپاز دەپ تانىلدى. سپورتتىڭ بارلىق تۇرىنەن ۇزدىك ونەر كورسەتكەن الماتىلىق كومانداعا وبلىس اكىمىنىڭ ورىنباسارى بەيسەنباي تاجىباەۆ كۋبوكتى تابىس ەتتى. سونداي-اق دەمەۋشىلىك كورسەتكەن بىرقاتار كاسىپورىن ۇزدىك دەپ تانىلعان ستۋدەنتتەرگە اقشالاي سىياقى, جۇمىسقا قابىلداۋ جولداماسىن بەردى.
ايتا كەتەيىك, 2026 جىلى «ەڭبەك كۋبوگى» جالعاسىن تاۋىپ, الماتى قالاسىندا وتكىزىلەدى.
