بۇگىننەن باستاپ تۇرعىندار ەلدىمەكەنگە قۇتقارۋشىلاردىڭ كومەگىمەن عانا كىرىپ-شىعىپ جاتىر. بۇل حالىقتىڭ قاۋىپسىزدىگى ءۇشىن قولعا الىنعان شارا. سونداي-اق ماماندار بۇل جەردە تاۋلىك بويى كەزەكشىلىك اتقارادى.
- بۇل جولدى ەسىل تاسىعاندا ۇنەمى سۋ باسادى. قازىر سولتۇستىك قازاقستان وبلىستىق توتەنشە جاعدايلار جانە پوليتسيا دەپارتامەنتىنىڭ قىزمەتكەرلەرى كەزەكشىلىك اتقارىپ جاتىر. ءورت ءسوندىرۋ كولىگىن اكەلىپ قويدىق. ءبىزدىڭ ەكى «ۆاحتوۆكا» كولىگىمىز جولعا شىقتى. ولار تاڭعى ساعات 6.30-دان باستاپ, 20.00-گە دەيىن كەنت تۇرعىندارىن تاسيدى. سۋ كوتەرىلىپ جاتىر, ازىرگە بىراق ۇيلەردى سۋ باسۋ قاۋپى جوق, - دەيدى پەتروپاۆل قالاسى توتەنشە جاعدايلار باسقارماسىنىڭ باستىعى ەرجان ءشارىپوۆ.
«قازگيدرومەت» رمك سقو فيليالىنىڭ مالىمەتىنشە, ەسىل وزەنىنىڭ سۋ دەڭگەيى ءالى كوتەرىلىپ جاتىر. سەرگەەۆ سۋ قويماسىندا سۋ دەڭگەيى ءبىر تاۋلىكتە 23 سم كوتەرىلدى. قازىر بوگەتتىڭ جوتاسىنان اسىپ توگىلۋ بيىكتىگى 244 سم جەتكەن. بىلتىرعى انتيرەكورد – 425 سم. پەتروپاۆل قالاسىنىڭ ماڭىندا ءبىر تاۋلىكتە 2 سم وزگەردى.
