دەپۋتاتتاردىڭ تالقىلاۋىنا مەملەكەت باسشىسىنىڭ 2023 جىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ اياسىندا ازىرلەنگەن زياتكەرلىك مەنشىك ماسەلەلەرى بويىنشا زاڭ جوباسى ءبىرىنشى وقىلىمدا قاراۋ ءۇشىن ەنگىزىلەدى. ۇكىمەت ازىرلەگەن زاڭ جوباسىندا زياتكەرلىك مەنشىكتى قورعاۋ مەن ونىڭ قۇقىقتارىن قامتاماسىز ەتۋ, زياتكەرلىك مەنشىكتى دامىتۋعا قولايلى جاعداي جاساۋ, ينۆەستيتسيالار تارتۋ جانە كرەاتيۆتى ەكونوميكانى دامىتۋ ءۇشىن قوسىمشا قۇقىقتىق قۇرالدار قاراستىرىلعان.
سونداي-اق جالپى وتىرىستىڭ كۇن ءتارتىبىنىڭ جوباسىنا دەپۋتاتتاردىڭ باستاماسىمەن ازىرلەنگەن ورمان شارۋاشىلىعى جانە ەرەكشە قورعالاتىن تابيعي اۋماقتار ماسەلەلەرى بويىنشا زاڭ جوباسىن ءبىرىنشى وقىلىمدا قاراۋ ۇسىنىلادى. دەپۋتاتتىق تۇزەتۋلەر سۋارمالى اۋىل شارۋاشىلىعى القاپتارىن, اۋىل شارۋاشىلىعى, بيولوگيالىق, يرريگاتسيالىق-مەليوراتيۆتىك جانە بالىق شارۋاشىلىعى سالاسىنداعى عىلىمي زەرتتەۋ جانە وقۋ ورىندارىنىڭ تاجىريبەلىك القاپتارىنىڭ, سونداي-اق ورمان جانە سۋ قورلارىنىڭ جەرلەرىن ەرەكشە ستراتەگيالىق ماڭىزى بار سۋ شارۋاشىلىعى قۇرىلىستارى مەن سەل, كوشكىن, لاي كوشكىنىنەن قورعاۋ قۇرىلىستارىن سالۋ جانە پايدالانۋ ءۇشىن الىپ قويۋعا رۇقسات بەرۋدى كوزدەيدى.
سونىمەن قاتار اۋىلدىق ەلدى مەكەندەردىڭ جانە الەۋمەتتىك, ينجەنەرلىك ينفراقۇرىلىم نىساندارىن ورنالاستىرۋ ماقساتىمەن ەرەكشە قورعالاتىن تابيعي اۋماقتاردىڭ جەرلەرىن, ينجەنەرلىك جانە كوممۋنالدىق قامتاماسىز ەتۋ جەلىلەرىنىڭ كوممۋنيكاتسيالارىن سالۋ ءۇشىن مەملەكەتتىك ورمان قورىنىڭ جەرلەرىن باسقا ساناتتاعى جەرلەرگە اۋىستىرۋعا رۇقسات بەرىلمەك.
