بيىل جالپى قارجىلاندىرۋ سوماسى 781,2 ملرد تەڭگەگە 8,8 مىڭ شاقىرىم اۆتوجول ءتۇرلى جوندەۋ تۇرىمەن قامتىلادى. ونىڭ ىشىندە 2,1 مىڭ شاقىرىم قايتا جاڭارتىلسا, 459,6 شاقىرىمعا كۇردەلى جوندەۋ جۇرگىزىلىپ, 6,3 مىڭ شاقىرىمعا ورتاشا جوندەۋ جاسالادى. سونداي-اق بيىل «قاراعاندى – جەزقازعان», «اقتوبە – ۇلعايسىن», «اتىراۋ – دوسسور», قىزىلوردا, رۋدنىي, سارىاعاش, پەتروپاۆل قالالارىنىڭ اينالما جولى سەكىلدى 1 مىڭ شاقىرىم اۆتوجول سالۋ مەن رەكونسترۋكتسيالاۋ بويىنشا 7 جاڭا جوبا ىسكە قوسىلادى.
«قازاۆتوجول» ۇك» اق باسشىسى دارحان يماناشەۆ شەكارالىق ايماقتار ارقىلى ءتيىمدى جانە قاۋىپسىز ءترانزيتتى قامتاماسىز ەتۋ شاراسى تۋرالى حاباردار ەتتى. ول ءۇشىن اۆتوموبيل وتكىزۋ پۋنكتتەرىن ء(اوپ) كەزەڭ-كەزەڭىمەن قايتا قۇرۋ جۇرگىزىلەدى. ەل شەكاراسى بويىندا جۇمىس ىستەپ تۇرعان 52 ءاوپ-ءتىڭ 2030 جىلعا دەيىن 36-سى قايتا جاڭارتىلادى.
«2025 جىلعى جوبالارعا 644 ملرد تەڭگە, جاڭا جوبالارعا 3,05 ترلن تەڭگە ينۆەستيتسيا سالعان كەزدە 2048 جىلعا قاراي 6,4 ترلن تەڭگەگە دەيىن ەكونوميكالىق ناتيجە بولادى دەگەن ويدامىز», دەدى ول.
2025 جىلعى 1 ساۋىردەگى جاعداي بويىنشا ەلىمىزدە جالپى ۇزىندىعى 3,9 مىڭ شاقىرىم 20 اقىلى اۆتوجول ۋچاسكەسى جۇمىس ىستەپ تۇر. 2025 جىلعى جوسپار بويىنشا جالپى ۇزىندىعى 5,5 مىڭ شاقىرىم تاعى 26 اقىلى ۋچاسكە ىسكە قوسىلادى. 2024 جىلعى تولەماقى الۋدان تۇسكەن تابىس 48,4 ملرد تەڭگە.
«قتج» ۇك» اق وسى جىلعى شىلدەدە ەكىنشى جولداردىڭ قۇرىلىسى بويىنشا نەگىزگى جۇمىستى اياقتاپ, ۇزىندىعى 836 شاقىرىم «دوستىق – مويىنتى» ۋچاسكەسى بويىنشا پويىز قوزعالىسىن ىسكە قوسۋدى جوسپارلاپ وتىر. ىسكە اسىرىلۋى 3 جىل جۇرگىزىلگەن جوبانىڭ قۇنى 542,8 ملرد تەڭگە. سونداي-اق بيىل نەگىزگى جولىنىڭ ۇزىندىعى 75 شاقىرىم بولاتىن 123 شاقىرىم «الماتى اينالما جولى» ت/ج جەلىسىنىڭ قۇرىلىسى اياقتالماق. جوبا قۇنى – 151,7 ملرد تەڭگە.
كەلەسى جىلى ينۆەستيتسيا كولەمى 720,4 ملرد تەڭگەنى قۇرايتىن «قىزىلجار – مويىنتى» تەمىرجول ماگيسترالىنىڭ قۇرىلىسىن اياقتاۋ مەن «التىنكول – جەتىگەن» ۋچاسكەسىن جاڭعىرتۋ (107,8 ملرد تەڭگە) جوسپارلانعان. جۇمىس جوسپار بويىنشا جۇرگىزىلىپ جاتىر.
شتاب وتىرىسىنىڭ قورىتىندىسىندا ۆيتسە-پرەمەر ۇلتتىق كومپانيالارعا بارلىق ينفراقۇرىلىمدىق جوبالاردى بەلگىلەنگەن مەرزىمدە اياقتاۋدى تاپسىردى. مەملەكەتتىك ورگاندار جوبالاردى ۋاقتىلى ىسكە اسىرۋعا كەدەرگى كەلتىرەتىن بيۋروكراتيالىق كىدىرىستەردى شەشۋ ءۇشىن تۇراقتى باقىلاۋ جۇرگىزىپ, تولىق جاردەم كورسەتۋگە ءتيىس.
