بەنين سىرتقى ساياسي ۆەدومستۆوسى باسشىسىنىڭ ەلىمىزگە العاشقى ساپارى ەكىجاقتى قارىم-قاتىناستار تاريحىنداعى ماڭىزدى كەزەڭ بولىپ, ەكى ەل اراسىنداعى ءوزارا ءىس-قيمىلعا جاڭا سەرپىن بەردى.
كەلىسسوزدەر بارىسىندا تاراپتار ساياسي, ەكونوميكالىق جانە مادەني-گۋمانيتارلىق سالالاردى قامتيتىن ءوزارا ءىس-قيمىلدىڭ نەگىزگى باعىتتارى بويىنشا كەڭ اۋقىمدى ماسەلەلەردى تالقىلادى. مينيسترلەر ساۋدا, لوگيستيكا جانە تسيفرلاندىرۋ سياقتى ستراتەگيالىق ماڭىزدى سالالارداعى ىنتىماقتاستىقتى كەڭەيتۋگە ەرەكشە نازار اۋداردى. وسى تۇرعىدا شارتتىق-قۇقىقتىق بازانى جەتىلدىرۋگە جانە ءارتۇرلى دەڭگەيلەردە ساپارلارمەن الماسۋدى جانداندىرۋعا دايىندىقتارىن راستادى.
– جاڭا گەوساياسي جاعدايدا قازاقستان افريكا قۇرلىعىمەن ەكونوميكالىق ساياساتىندا تەڭ قۇقىقتى جانە ءوزارا ءتيىمدى سەرىكتەستىكتى باستى ورىنعا قويادى. ءبىز اۋىل شارۋاشىلىعى, كولىك جانە لوگيستيكا, قارجى, تسيفرلاندىرۋ جانە تەلەكوممۋنيكاتسيالىق تەحنولوگيالار سياقتى پەرسپەكتيۆالى باعىتتاردا بەنينمەن ىنتىماقتاستىقتى دامىتۋعا مۇددەلىمىز, – دەپ اتاپ ءوتتى م.نۇرتىلەۋ.
ءوز كەزەگىندە بەنين ءسىم باسشىسى ەلىمىزدىڭ ءوز ىشىمىزدەگى جانە حالىقارالىق ارەناداعى جەتىستىكتەرىنە تاڭدانىسىن ءبىلدىردى.
– قازاقستاننىڭ تابىستارى – پرەزيدەنت قاسىم-جومارت توقاەۆتىڭ جەكە ۇلەسى مەن ۇكىمەتتىڭ ءتيىمدى جۇمىسىنىڭ ناتيجەسى. ەلدەرىمىز ورتاق قۇندىلىقتاردى بولىسەدى, ءدال وسى نەگىزدە ءبىز بەرىك, سەرپىندى جانە ناتيجەلى قارىم-قاتىناستار ورناتۋعا ۇمتىلامىز, – دەدى ول.
وتكەن جىلدىڭ قورىتىندىسىنا كوز جۇگىرتسەك, قازاقستان مەن افريكا اراسىنداعى تاۋار اينالىمى 700 ملن دوللاردان استى جانە بايلانىستاردى ودان ءارى نىعايتۋ ماقساتىندا قازاق تاراپى بەنينگە ساۋدا ميسسياسىن جىبەرۋگە دايىندىعىن جەتكىزدى.
اۋىل شارۋاشىلىعى ونىمدەرىنىڭ ەكسپورتى اياسىندا بەنينگە استىق, ۇن, وسىمدىك مايلارى, تىڭايتقىشتار جانە ورگانيكالىق ونىمدەردى جەتكىزۋ پەرسپەكتيۆالارى قاراستىرىلدى. سونداي-اق تاراپتار بەنيندەگى اۋىل شارۋاشىلىعى مەن گەولوگيالىق بارلاۋ قاجەتتىلىكتەرى ءۇشىن پايدالى بولۋى مۇمكىن جەر شارىن قاشىقتىقتان زوندتاۋ بويىنشا وتاندىق سپۋتنيكتىك قىزمەتتەردى پايدالانۋ مۇمكىندىگىن تالقىلادى.
سونىمەن قاتار كەزدەسۋدە كولىك بايلانىسىن دامىتۋ ماسەلەسىنە دە ەرەكشە نازار اۋدارىلدى. ەلىمىز قىتايدان ەۋروپاعا جەرۇستى ءترانزيتىنىڭ 90%-ىن قامتاماسىز ەتەدى, ال بەنين كوتونۋ پورتى ارقىلى باتىس جانە ورتالىق افريكاعا قاقپا رەتىندە ماڭىزدى ءرول اتقارادى. وسىعان بايلانىستى تاراپتار ء«بىر بەلدەۋ, ءبىر جول» باستاماسى جانە ورتا ءدالىز اياسىندا ىنتىماقتاستىقتى دامىتۋ, ەكى ەلدىڭ كولىك ۆەدومستۆولارى مەن لوگيستيكالىق كومپانيالارى اراسىندا كەلىسسوزدەر جۇرگىزۋ قاجەتتىگىن اتاپ ءوتتى.
اقپاراتتىق تەحنولوگيالار مەن تسيفرلاندىرۋ سالاسىنداعى جوعارى الەۋەت اتالىپ ءوتتى. بەنينمەن تسيفرلىق ىنتىماقتاستىق بويىنشا جول كارتاسىن قابىلداۋعا دايىندىق راستالدى, سونداي-اق بەنيندىك كومپانيالار ورتالىق ازياداعى ەڭ ءىرى IT-ستارتاپ تەحنوپاركى – «Astana Hub» جۇمىسىنا قوسىلۋعا شاقىرىلدى.
سونىمەن قاتار تاراپتار ازىق-ت ۇلىك قاۋىپسىزدىگى كونتەكسىندەگى يسلام ىنتىماقتاستىعى ۇيىمى اياسىنداعى ىنتىماقتاستىقتى تالقىلادى. قازاقستان بەنيننىڭ ازىق-ت ۇلىك قاۋىپسىزدىگى جونىندەگى يسلام ۇيىمىنا قىزىعۋشىلىق تانىتقانى ءۇشىن العىس ءبىلدىرىپ, ونىڭ جارعىسىن جاقىن ارادا راتيفيكاتسيادان وتكىزەتىنىنە ءۇمىتىن جەتكىزدى.
ەلىمىزدىڭ ءسىم باسشىسى الماتىدا ورتالىق ازيا مەن اۋعانستان ءۇشىن بۇۇ-نىڭ ورنىقتى دامۋ ماقساتتارى جونىندەگى وڭىرلىك ورتالىعىن قۇرۋ تۋرالى ەل باستاماسىن قولداعانى ءۇشىن بەنين تاراپىنىڭ ۇستانىمىنا ريزاشىلىعىن ءبىلدىردى.
كەزدەسۋ قورىتىندىسى بويىنشا ەكىجاقتى ىنتىماقتاستىقتى ودان ءارى نىعايتۋ ماقساتىندا ەلىمىز بەن بەنين سىرتقى ساياسي ۆەدومستۆولارى اراسىندا ساياسي جانە ديپلوماتيالىق كونسۋلتاتسيالار بويىنشا ءوزارا تۇسىنىستىك تۋرالى مەموراندۋمعا قول قويىلدى.
