فوتو: مادەنيەت جانە اقپارات مينيسترلىگى
قازاقستاننىڭ رەسمي دەلەگاتسياسىن قر مادەنيەت جانە اقپارات ءمينيسترى ايدا بالاەۆا باستاپ باردى. ارمەنيا استاناسىنداعى مادەني كۇندەر باعدارلاماسى قازاقستاندىق فيلمدەر كورسەتىلىمىنەن باستالدى. بۇگىن «موسكۆا» كينوتەاترىندا كورەرمەندەرگە رەجيسسەر رۇستەم ابدىراشەۆتىڭ «قازاق حاندىعى. التىن تاق» اتتى تاريحي كينوتۋىندىسى مەن فارحات ءشارىپوۆتىڭ «ستوپ, نوچ» ءفيلمى ۇسىنىلدى.
سالتاناتتى جيىندا ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي قۇتتىقتاۋ ءسوز سويلەپ, قازاقستاندىق كينووندىرىستىڭ دامۋ ماڭىزدىلىعىنا توقتالدى. ول مەملەكەت باسشىسىنىڭ مادەنيەت جانە اقپارات مينيسترلىگىنىڭ قىزمەتىنە قاتىستى زاڭعا قول قويعانىن اتاپ ءوتتى. زاڭدا بىرقاتار جاڭا ەرەجەلەر قامتىلعان. اتاپ ايتقاندا, شاكەن ايمانوۆ اتىنداعى «قازاقفيلم» كينوستۋدياسى دامۋىنىڭ جاڭا كەزەڭى باستالدى. ەلدەگى كينوفيلمدەردى قارجىلاندىرۋدىڭ جالپى كولەمىنىڭ كەمىندە 30 پايىزى تىكەلەي اتالعان كينوستۋدياعا باعىتتالادى. بۇل شەشىم ستۋديا جۇمىسىنىڭ قارجىلىق تۇراقتىلىعى مەن تيىمدىلىگىن قامتاماسىز ەتەدى.
سونىمەن قاتار, قۇرمانبەك جۇماعالي كينوجوبالاردى ىرىكتەۋدىڭ جاڭا ەرەجەلەرى جايلى ايتىپ, قازىرگى قازاق فيلمدەرى ارميان كورەرمەنىنىڭ كوڭىلىنەن شىعاتىنىنا سەنىم ءبىلدىردى.
«ارمەنياداعى قازاقستان كينوسىنىڭ كۇندەرى – ەلدەرىمىز اراسىنداعى ىنتىماقتاستىقتى, ءوزارا تۇسىنىستىكتى جانە دوستىق بايلانىستاردى نىعايتۋدا ماڭىزدى پلاتفورما. قازاق كينوونەرىمەن جاقىن تانىسۋعا مۇمكىندىك تۋعانىنا ەرەكشە قۋانىشتىمىز. قازاق كينوسى – بۇل تەرەڭ فيلوسوفيا, بولاشاققا باتىل كوزقاراس. ءبىز قازاقستانداعى كينوونەردىڭ دامۋ بارىسىن زور قىزىعۋشىلىقپەن باقىلاپ وتىرمىز. بۇگىنگى كورسەتىلىمدەر مادەنيەتتەرىمىز اراسىنداعى التىن كوپىرگە اينالادى دەپ سەنەمىز», دەدى ارمەنيا كينو قورىنىڭ ديرەكتورى داۆيد بانۋچيان ءىس-شارانىڭ اشىلۋ سالتاناتىندا سويلەگەن سوزىندە.
ەرتەڭ كورەرمەندەرگە تاعى ەكى تۋىندى – رەجيسسەر سەرىكبول وتەپبەرگەنوۆتىڭ «پاتريوتتار ۋاقىتى», دانيار يبراگيموۆتىڭ «بۇركىت» فيلمدەرى ۇسىنىلادى.
مادەني كۇندەر اياسىندا قازاقستاننىڭ رەسمي دەلەگاتسياسى ەرەۆان مەملەكەتتىك ۋنيۆەرسيتەتىندەگى اباي اتىنداعى قازاق ءتىلى, تاريحى جانە مادەنيەتى ورتالىعىنا, سونداي-اق ارمەنيانىڭ ۇلتتىق كىتاپحاناسىنا باردى. مۇندا قازاق ادەبيەتى بۇرىشى ورنالاسقان. دەلەگاتسيا كىتاپ قورىمەن تانىسىپ, قازاقستاندىق قالامگەرلەردىڭ وننان استام كىتابىن تارتۋ ەتتى. ولاردىڭ قاتارىندا — قايرات ايتباەۆتىڭ «سال دومبىرا», نۇرباي بەكتۇرسىنوۆتىڭ «وتان قورعاۋشى», فاريزا وڭعارسىنوۆانىڭ «تاڭدامالى», قازاقستان پرەزيدەنتى قاسىم-جومارت توقاەۆتىڭ «نۇر مەن كولەڭكە» ەڭبەگى جانە باسقا دا بىرقاتار باسىلىمدار بار.
مادەني كۇندەر 19 ءساۋىر كۇنى ارام حاچاتۋريان اتىنداعى كونتسەرت زالىندا وتەتىن گالا-كونتسەرتپەن قورىتىندىلانادى. بۇل كەشكە قازاقستاندىق ەسترادا جۇلدىزدارى, زيالى قاۋىم وكىلدەرى, ديپلوماتتار, عالىمدار, جازۋشىلار مەن ونەر قايراتكەرلەرى قاتىسادى.
