فوتو: اقوردا
«قازىر اقتاۋعا جىلۋدى «ماەك» كومپانياسى بەرەدى. بىراق وبلىس ورتالىعى تەز ءوسىپ جاتىر. قالانى جىلۋمەن تولىق قامتاماسىز ەتۋگە كاسىپورىننىڭ قۋاتى جەتپەيدى. بىلتىر اقتاۋدا ۇزىندىعى 12 شاقىرىم بولاتىن جىلۋ جەلىسى سالىنىپ, جاڭعىرتىلدى. ناتيجەسىندە قالاعا جىلۋدىڭ دۇرىس جەتۋىنە مۇمكىندىك تۋدى. وسى باعىتتاعى جۇمىستى جالعاستىرۋ كەرەك. بىلتىر وبلىستا 846 مىڭ شارشى مەتر تۇرعىن ءۇي سالىندى. بۇل – جوسپاردان 20 پايىزعا ارتىق. دەگەنمەن وبلىستاعى تۇرعىن ءۇي قورىنىڭ 7 پايىزى ابدەن ەسكىرگەن», دەدى پرەزيدەنت.
قاسىم-جومارت توقاەۆتىڭ ايتۋىنشا كوپ پاتەرلى 177 ءۇي كۇردەلى جوندەۋدى قاجەت ەتەدى. سوندىقتان تۇرعىن ۇيلەردى جاڭعىرتۋ ماسەلەسىنە ايرىقشا نازار اۋدارۋ كەرەك.
«ماعان تۇسكەن اقپارات بويىنشا اقتاۋدا ۇلەسكەرلەر قارجى سالعان 6 ءۇيدىڭ قۇرىلىسى بىتپەي تۇر. ورىنسىز, ياعني بەي-بەرەكەت سالىنعان قۇرىلىس نىساندارى دا بار. بۇل ماسەلەلەردى شەشۋ ءۇشىن ۇكىمەت اكىمدىكپەن بىرگە ناقتى شارالار قابىلداۋى كەرەك», دەدى پرەزيدەنت.
سونداي-اق مەملەكەت باسشىسى جاڭاوزەندەگى گاز وڭدەۋ زاۋىتى قۇرىلىسىنىڭ كەشىگۋى – ۇكىمەتتىڭ ورەسكەل ولقىلىعى ەكەنىن اتاپ ايتتى.
«مەن بۇعان دەيىن جاڭاوزەندەگى گاز وڭدەۋ زاۋىتىن 2024 جىلعا قاراي ىسكە قوسۋ تۋرالى تاپسىرما بەردىم. بىراق ءتۇرلى راسىمدەر سوزىلىپ, مەردىگەرمەن كەلىسىم-شارتقا بىلتىر عانا قول قويىلدى. سونىڭ سالدارىنان زاۋىتتى ىسكە قوسۋ مەرزىمى 2027 جىلعا قالىپ قويدى. بۇل – ۇكىمەتتىڭ ورەسكەل ولقىلىعى. ۇكىمەت وسى ماسەلەنى قاتاڭ باقىلاۋعا الۋى كەرەك», دەدى مەملەكەت باسشىسى.
