فوتو: اشىق دەرەككوز
وقيعا 2024 جىلدىڭ تامىزىندا باستالعان. ايەلدىڭ ايتۋىنشا, ونىڭ 2 جاسار بالاسى «ەركەناز» جەكەمەنشىك بالاباقشاسىنا بارىپ جۇرگەن. قىركۇيەكتە اتا-انالار چاتىندا كەلىسپەۋشىلىك تۋىنداپ, اقىرى بالانى بالاباقشادان زاڭسىز شىعارىپ جىبەرگەن.
الايدا, بالاباقشا باسشىلىعى بۇل ايىپتاۋلاردى جوققا شىعارىپ وتىر. ولاردىڭ ايتۋىنشا, بالاعا قاتىستى ەشقانداي قورلاۋ بولماعان, ال اتا-انالار اراسىنداعى داۋ بەيرەسمي چاتتا تۋىنداعان.
«اتا-انالاردىڭ ءبىرى تاراپىنان بالاباقشا اكىمشىلىگى بالانى بۋللينگكە ۇشىراتتى دەگەن اقپارات شىندىققا جاناسپايدى. بالاباقشا قىزمەتكەرلەرى بالاعا قاتىستى ەشقانداي قورلايتىن نەمەسە ورىنسىز سوزدەر ايتقان جوق. انالار بالاباقشانىڭ بەيرەسمي «اتا-انالار چاتىندا» ءوزارا ۇرسىسىپ قالعان. بالاعا قاتىستى سوزدەردى ءبىزدىڭ اتىمىزدان ويدان شىعارىپ, جالا جاپتى دەپ كورسەتتى. ءبىز وسىعان بايلانىستى پوليتسياعا ارىز جازدىق, ءتىپتى, كەشە ارىز بەرىپ تە قويدىق», دەدى بالاباقشا باسشىلىعى.
بالاباقشا بۇعان دەيىن ايەلدى ءۇش رەت سوتقا بەرىپ, ەكى ءىس بويىنشا جەڭىسكە جەتكەنىن العا تارتقان.
ء«بىر كۇنى ايەل ءبىز تۋرالى 2گيس پلاتفورماسىنا جالعان پىكىر جازىپ, قۇجاتتارىمىز جوق دەپ, باسقا دا جالعان مالىمەت تاراتقان. ءبىز ول ءۇشىن سوتقا ارىز بەرىپ, سوت ءبىزدىڭ جاققا شىقتى. سوت شەشىمىمەن ول پىكىرلەر ءوشىرىلدى جانە كەتكەن بارلىق شىعىندى سول ايەل وتەپ بەرۋگە مىندەتتەلدى. كەيىن بۇل ايەل استاناداعى ءبىلىم باسقارماسىنا ارىز جازدى. بىراق سوت بۇل ارەكەتىن دە زاڭسىز دەپ تانىپ, ونى دا جوققا شىعاردى. ەندى جاقىندا اكىم جيىن وتكىزگەندە ايەل قايتادان نەگىزسىز ايىپ تاعىپ, بىزگە جالا جاپتى. قازىر ءبىز الماتى اۋداندىق پوليتسيا باسقارماسىنا ونىڭ ۇستىنەن ارىز جازدىق. وكىنىشكە قاراي, بۇرىنعى ارىزىمىز بويىنشا ءىس ءالى اشىلماعان. سوندىقتان قايتادان ارىز بەردىك», دەدى بالاباقشا باسشىلىعى.
استانا ءبىلىم باسقارماسى بۇل داۋدى قوس تاراپتان تەكسەرىپ جاتقانىن راستادى. باسقارمانىڭ مالىمەتىنشە, ايەلدىڭ بالاسى وزگە بالالارعا بىرنەشە رەت دەنە جاراقاتىن كەلتىرگەن.
«تەكسەرىستەن كەيىن ارىزدانۋشىنىڭ بالاسىنا باعىتتالعان ءسوزدى بالاباقشا پەداگوگى ايتپاعانى انىقتالدى. بۇعان دەيىن اتا-انالاردىڭ ايتۋىنشا, ارىزدانۋشىنىڭ بالاسى بىرنەشە رەت وزگە بالالارعا دەنە جاراقاتىن كەلتىرگەن. وسىعان ءبايلانىستى جابىر كورگەن بالالاردىڭ ءبىرىنىڭ اتا-اناسى ەموتسياعا بەرىلىپ «بيشىمباەۆ» دەگەن ءسوزدى قولدانعان. قازىر ارنايى مونيتورينگتىك توپ قۇرىلىپ, ەكىجاقتى تەكسەرۋ جۇمىستارى باستالدى», دەلىنگەن حابارلامادا.
