موتوتسيكلشىنىڭ ادۆوكاتى زاكىر اسادوۆتىڭ ايتۋىنشا, ونىڭ قورعاۋشىسى تاۋلىك بويى ءتارتىپ ساقشىلارىنىڭ قورعاۋىندا. قىلمىستىق ءىس مەركى اۋداندىق پوليتسيا بولىمىنەن جامبىل وبلىسى پوليتسيا دەپارتامەنتىنىڭ تەرگەۋ بولىمىنە بەرىلدى.
ونىڭ مالىمەتىنشە, ءىس بۇدان دا اۋىر باپ بويىنشا قايتا سارالانعان.
«قىلمىستىق ءىس 293-باپتىڭ 3-بولىگىنەن «بۇزاقىلىق» 99-باپتىڭ 2-ءبولىمى 9-تارماققا 24-باپتى قولدانا وتىرىپ, ياعني «بۇزاقىلىق نيەتپەن كىسى ولتىرۋگە وقتالۋ» دەپ قايتا سارالاندى», دەدى اسادوۆ.
قىلمىستىق باپ بويىنشا كىناسى دالەلدەنسە, شابۋىلداۋشى 15 جىلدان 20 جىلعا دەيىن نەمەسە مۇلكى تاركىلەنىپ, ءومىر بويىنا باس بوستاندىعىنان ايىرىلۋى مۇمكىن.
ەسكە سالايىق, قىلمىس 13 ساۋىردە بولدى. سول كۇنى بەلگىسىز بىرەۋ مەركىدەگى جانارماي قۇيۋ بەكەتىندە شەتەلدىك موتوتسيكلشىگە پىشاقپەن شابۋىل جاساعان. جابىرلەنۋشىنىڭ ادۆوكاتى قر ىشكى ىستەر ءمينيسترى ەرجان سادەنوۆكە ۆيدەوۇندەۋ جولدادى.
زاكير اسادوۆتىڭ ايتۋىنشا, شابۋىل جاسادى دەگەن كۇدىكتىنىڭ تۋىستارى ونىڭ قورعاۋىنداعى ازاماتقا قىسىم كورسەتىپ, ارىزدان باس تارتۋعا كوندىرىپ جاتىر.
