ءدالۋبايدىڭ اكەسى قالمىرزا اقساقال ماڭعىستاۋعا بەلگىلى جىلقىشى بولدى. كەڭەستىك كەزەڭدەگى سوتسياليستىك جارىس ناتيجەسىندە وزات اتانىپ, اتى وزىپ, اتاعى اسپاندادى. 14 جاستاعى بالا كەزىنەن اكەسىمەن بىرگە جىلقى باققان قالمىرزا تولەەۆ 1948 جىلدان باستاپ قاراساي, پراۆدا, ماڭعىستاۋ, سام ۇجىمشارلارى مەن كەڭشارلارىندا جىلقىشى بولىپ, 1994 جىلى قۇرمەتتى زەينەتكەرلىككە شىقتى. 1977, 1979, 1982 جىلدارى «چەمپيون جىلقىشى» اتاعىن السا, 1973 جىلى سوتسياليستىك جارىستىڭ جەڭىمپازى اتاندى. 1982 جىلى «ەرەن ەڭبەگى ءۇشىن» مەدالىمەن ماراپاتتالىپ, ۇكىمەت تاراپىنان ماشينا يەلەندى. جارى نەسىبەلى نۇعىمانوۆا كومەكشى جىلقىشى بولىپ, شارۋاشىلىقتىڭ بەينەتىن ەرىمەن بىرگە ارقالاي ءجۇرىپ, ومىرگە 7 ۇل, 4 قىز بالا اكەلدى. 11 بالانىڭ بەسىنشىسى ءدالۋباي وتان الدىنداعى اسكەري بورىشىن وتەگەن سوڭ, جىلقىشى قۇرىعىن قولىنا الدى.
– قازاقتا بالانى وتاۋ شىعارادى دەگەن بار عوي. اكە-شەشەم دە الدىما ون جىلقى, التى تۇيە, بىرنەشە ۇساق مال سالىپ, مەنى 1998 جىلى قاسىنا بولەك وتاۋ شىعاردى. اكەم ادال ەڭبەك ەتۋىمدى قاداعالاپ, اقىل-كەڭەسىن ايتىپ وتىردى. كۇنكورىس, بالا-شاعا قامى ءۇشىن وسى مالدى ءوسىرۋ كەرەك بولدى. زاماننىڭ دا قيىنداۋ كەزى ەدى. ءبىرىنشى اعام القۋات «قايرات» شارۋا قوجالىعىن قۇردى. سول شارۋاشىلىقتىڭ قۇرامىندا مالىمىزدى وسىردىك. كەيىنىرەك «قايرات» شارۋاشىلىعىنان ء«دالۋباي» شارۋاشىلىعى بولىپ ءبولىنىپ شىقتىم. مال باسىن كوبەيتتىم. نەگىزىنەن جىلقى مەن تۇيە مالىنا ءمان بەردىم. ويىمىز ىسكە اسىپ كەلەدى. ەڭبەكتىڭ جەمىسى, جەتىستىگىمىز اكە-شەشەدەن كورگەن-تۇيگەنىمىزدىڭ ناتيجەسى, ولار بەرگەن تاربيەنىڭ, ونەگەنىڭ ارقاسى. ءاربىر ويىم ىسكە اسقان سايىن ايازدى قىس پەن اپتاپ ىستىقتا بەلبەۋىنە قىستىرعان قامشىسىمەن ات ۇستىندە كەلە جاتقان اكەمنىڭ بەينەسى كوز الدىمدا كولبەڭدەپ تۇرادى. ىشتەي اكەممەن سىرلاسىپ جۇرەمىن, سىيىنىپ جۇرەمىن, – دەيدى ءدالۋباي.
ءدالۋباي جارى ايتبيبىمەن بىرگە بەس ۇل-قىز تاربيەلەپ ءوسىردى. قازىرگى تاڭدا ۇلكەن بالاسى مەن كەلىنى مەيىربەك پەن سالتانات سەنىمدى كومەكشىلەرى. «اكە كورگەن وق جونار» دەگەندەي, كوزىن اشقالى مال شارۋاشىلىعىن كورىپ وسكەن, مالساق اتاسى قالمىرزا مەن اكەسى ءدالۋبايدىڭ ءتالىمىن كورىپ, تاجىريبەسىن ءسىڭىرىپ وسكەن ۇلى مالدى جۇدەتپەي, شارۋانى جۇتاتپاي كاسىپتى دوڭگەلەتىپ الىپ كەتتى.
– ۇلكەن بالام ءوزىمنىڭ جولىمدى قۋدى. اقىلبەك پەن جانىبەك تەمىرجولشى ماماندىعىن تاڭدادى, قىزىم جادىرا مۇعالىم ماماندىعىن الدى. كەلىندەرىم سالتانات, ءمولدىر, ارايلىمنىڭ دا ماماندىعى – مۇعالىم. قازىردە ءۇش ۇلىم مەن ءبىر قىزىم ءۇيلى-باراندى, ولاردان 14 نەمەرە, جيەن بار. كەنجە قىزىم جازيرا اقتاۋداعى ش.ەسەنوۆ اتىنداعى ۋنيۆەرسيتەتتىڭ تاريح فاكۋلتەتىنىڭ 2-كۋرسىندا وقيدى. بالالارىم شارۋانىڭ جاي-كۇيىن جاقسى بىلەدى. شارۋاشىلىقتىڭ قيىندىعى كوپ بولادى. جالپى, شارۋاشىلىعىمدا 5 ادام بار. قوساعىم ايتبيبىمەن بىرگە بالالارعا اقىل-كەڭەسىمىزدى ايتىپ, ءجون سىلتەپ وتىرامىز. الداعى ويىمىز – مال باسىن كوبەيتىپ, ءونىم ءوندىرىپ, حالىققا ۇسىنۋ. ەت, سۇتتەن تابيعي ءونىم دايىنداپ, ونى ساتاتىن دۇكەن اشساق دەگەن ويىمىز بار, – دەپ جالعادى ءسوزىن ءدالۋباي قالمىرزا ۇلى.
وتكەن جىلى ءدالۋباي تولەەۆ استانا قالاسىندا وتكەن اۋىلشارۋاشىلىق ەڭبەككەرلەرىنىڭ فورۋمىنا قاتىسىپ, مەملەكەت باسشىسى ق.توقاەۆتىڭ قولىنان «ەڭبەك داڭقى» وردەنىن الدى.
– پرەزيدەنتتىڭ قولىنان وردەن الۋدىڭ ءوزى ءبىر قىزىقتى وقيعا بولدى. وردەندى العانشا سەنبەدىم. بەينەۋدەن استاناعا قاراي پويىزبەن شىققانمىن. قاندىاعاشقا جاقىنداعاندا بەيتانىس ادام تەلەفون شالىپ, قاندىاعاشتان تۇسەتىنىمدى ايتتى. ايتقانداي, پويىزدان ءتۇسىرىپ, اقتوبە قالاسىنان ۇشاققا وتىرعىزدى. قاي جەردە دە جاس جىگىتتەر كۇتىپ تۇردى. ماراپات العان كەزدەگى ءجۇرىس-تۇرىسىن, پرەزيدەنتتىڭ قولىن قالاي ۇستايتىنىڭا دەيىن ءتۇسىندىردى. بىراق 3-4 مىڭ ادامنىڭ الدىندا پرەزيدەنتكە جەتۋ دە مەن سياقتى شارۋا ادامىنا وڭاي ەمەس. دەگەنمەن تابيعات بەرگەن قالپىمنان اينىماي ءجۇرىپ ءوتتىم. پرەزيدەنتتىڭ جۇزىنەن جىلۋلىق, قاراپايىمدىلىق كوردىم. كوڭىلىم جايلاندى, – دەگەن ءدالۋباي سوزىنەن, مىنەزىنەن ناعىز شارۋاگەردىڭ, دالا ادامىنىڭ اڭقىلداعان قاراپايىمدىلىعى اڭقىپ تۇر.
ماتاي قۇمدى قۇتتى قونىس ەتىپ, مالدى مىڭعىرتۋ ارقىلى ەل ەكونوميكاسىنا ۇلەس قوسىپ جۇرگەن شارۋاگەر ءدالۋبايدىڭ ەڭبەگى ۇشان-تەڭىز. اتاكاسىپتى مانسۇق ەتپەي, قاسيەتتى قۇرىقتى قولىنا العان اۋلەت جاستارىنىڭ دالا توسىندە بابا جولىن جاڭعىرتىپ, ءتورت ت ۇلىكتىڭ ساۋابىن ارقالاي بەرۋىنە تىلەكشىمىز.
ماڭعىستاۋ وبلىسى
