سۋرەتتى تۇسىرگەن – ەربولات شادراحوۆ
گازەتىمىزدىڭ وتكەن ساندارىنىڭ بىرىندە (7 ناۋرىز 2025 جىل) ماڭعىستاۋدا اتالعان ورىنداردا ساياحات ياكي ۆيزيت ورتالىعى سالىناتىنىن حابارلاعان ەدىك. ءساۋىردىڭ سامالا كۇندەرىنىڭ بىرىندە «بوزجىرا» شاتقالىندا جاڭا تۋريستىك جوبانىڭ قازىعى قاعىلىپ, قۇرىلىس جۇمىستارى باستالدى.
– مەملەكەت باسشىسى قاسىم-جومارت توقاەۆ بوزجىرا سەكىلدى تاريحي, كورىكتى ورىنداردا ءتۋريزمدى دامىتۋ تۋرالى ناقتى تاپسىرما بەرگەن بولاتىن. وسى باستامانىڭ العاشقى قادامى جاسالىپ جاتىر. مۇنداي سۇلۋلىعى كوز تارتار مەكەندەر الەمدە ساناۋلى عانا. ءبىز تاريحي تامىرىن ساقتاي وتىرىپ, بۇل جەردى زاماناۋي تۋريستىك ورتالىققا اينالدىرۋدى كوزدەپ وتىرمىز. تۋريستەر ءۇشىن قولايلى جاعداي جاساۋ ءبىر مىندەت بولسا, نەگىزگى ماقساتىمىز – جەرگىلىكتى تۇرعىنداردىڭ بۇل جوبانىڭ يگىلىگىن كورۋىنە مۇمكىندىك جاساۋ. جاقىن ماڭداعى ەلدى مەكەن تۇرعىندارى اۋىلشارۋاشىلىق ونىمدەرىن ساتىپ, قوسىمشا تابىس تابا الادى. بۇل جوبا ايماقتىڭ تۋريستىك الەۋەتىن دامىتىپ قانا قويماي, ءوڭىر ەكونوميكاسىنا وڭ سەرپىن بەرەدى دەپ سەنەمىز, – دەدى ۆيزيت-ورتالىقتىڭ ىرگەتاسىن قالاۋ ءىس-شاراسىنا ارنايى بارعان ماڭعىستاۋ وبلىسىنىڭ اكىمى نۇرداۋلەت قيلىباي.
تۇرعىنداردى الاڭداتقان باستى ماسەلە كورىكتى نىساننىڭ تابيعي قالپىنا نۇقسان كەلۋى جانە ەكولوگيالىق وزگەرىستەردىڭ ورىن الۋى ماسەلەلەرى ەدى. ءوڭىر باسشىسى دا, كەشەن قۇرىلىسىن جەكە قاراجاتىنا جۇرگىزەتىن وتاندىق «Pana Asia» جشس باسشىلىعى دا بۇل سۇراقتارعا ناقتى جاۋاپ بەردى. ايتۋلارىنشا, تۇپنۇسقاعا نۇقسان كەلمەيدى جانە ەكولوگيالىق تالاپتار ساقتالادى. «ۆيزيت-ورتالىق قورشاعان ورتاعا زيان كەلتىرمەيتىندەي ەتىپ جوبالانعان. بيولوگيالىق تازارتۋ جۇيەلەرى, قوقىستى سۇرىپتاپ جيناۋ, كۇن ەنەرگياسىن پايدالانۋ سىندى شەشىمدەر كوزدەلىپ وتىر. تۋريستەرگە بارلىق جاعداي جاساۋ – باستى ماقساتىمىز. سونىمەن قاتار قازاقتىڭ ۇلتتىق تاعامدارى مەن قۇندىلىقتارىن ناسيحاتتاۋعا دا ءمان بەرەمىز», دەيدى جوبا جەتەكشىسى ساۋلە جاڭاباەۆا.
جوبادا 17 گلەمپينگ پاۆيلونى, 50 قوناقۇي بولمەسى, جالپى اۋماعى 450 شارشى مەتر بولاتىن ۆيزيت-ورتالىق پەن ەتنو-كافە قاراستىرىلعان. زاماناۋي ۇلگىدە سالىناتىن ۆيزيت-ورتالىقتا ساياحاتتاۋشىلارعا بارلىق جاعداي قاراستىرىلادى. مۇندا كەلۋشىلەر ورتالىعى, ەتنو-ءدامحانا مەن گلەمپينگتەر بوي كوتەرمەك.
ءوڭىردىڭ تۋريستىك الەۋەتىن دامىتۋعا باعىتتالعان كەشەن 2027 جىلى پايدالانۋعا بەرىلەدى دەپ جوسپارلانىپ وتىر. سونىمەن قاتار بوزجىرا شاتقالىنا بارار جولدا ورنالاسقان جول بويىندا قىزمەت كورسەتۋ ورتالىعىنىڭ قۇرىلىسى دا ءجۇرىپ جاتىر. اۋماعى 12 گەكتاردى قامتيتىن نىساندا تۋريستەرگە ارنالعان اقپاراتتىق تاقتالار, قوعامدىق تاماقتانۋ ورنى مەن شاعىن دەمالىس قالاشىعى قاراستىرىلعان بۇل نىسان 2026 جىلى قولدانىسقا بەرىلمەك.
سول كۇنى-اق بوزجىراعا ساياحاتتاپ كەلگەن فرانتسۋزدىق ۆەلوشاباندوزدار شوعىرى «بوزجىرا» ۆيزيت-ورتالىعىنىڭ العاشقى ىرگەتاسىن قالاۋ راسىمىنە كۋا بولدى. ماڭعىستاۋ مەيماندارى ءوڭىردىڭ كورىكتى تابيعاتىن تاماشالاۋعا كەلەتىن تۋريستەرگە قولايلى جاعداي جاسالىپ جاتقانىنا قۋانىشتى ىقىلاسىن جەتكىزىپ, باستاماعا ساتتىلىك تىلەدى.
تۋريستەردىڭ توپ باسشىسى فرانتسۋز ۆەلوساياحاتشىسى, كينورەجيسسەر سەدريك تاسسان – بۇعان دەيىن ورتالىق ازيا ەلدەرىندە بىرنەشە مارتە بولعان كانىگى ساياحاتشى. ول ءۇش جىل بۇرىن ماڭعىستاۋ دالاسىن جالعىز ءوزى ۆەلوسيپەدپەن ءجۇرىپ وتكەن ەكەن. سول ساپاردان العان ەرەكشە اسەرىن ءوز دوستارىنا جەتكىزىپ, تاڭعاجايىپ سۇلۋلىقتى كوزبەن كورۋ ءۇشىن بيىل دوستارىن ماڭعىستاۋعا باستاپ كەلىپتى. ال وڭىرگە العاش كەلگەن سەدريكتىڭ ساياحاتشى دوستارى ماڭعىستاۋدىڭ تاماشا تابيعاتىنا, بوزجىرا شاتقالىنىڭ قايتالانباس كەلبەتىنە ەرەكشە تاڭدانىستارىن قۋانا جەتكىزدى.
ماڭعىستاۋدا دالالىق جەرلەرگە ۆيزيت-ورتالىقتاردىڭ سالىنۋى – ساياحاتشىلار ءۇشىن قۋانىشتى جاڭالىق, بۇل وقيعانى كورگەن-بىلگەن, كۋا بولعان ولار ەلدەرىنە بارىپ دوستارىنا جار سالا ايتىپ, توبىن كوبەيتىپ تاعى قىدىرىپ كەلەرى انىق. ال ۆيزيت-ورتالىقتاردا تۋريستەرگە سەرۆيستىك قىزمەت كورسەتىپ, تاعام تۇرلەرىن ساتىپ تابىس تاباتىن جەرگىلىكتى تۇرعىندار ءۇشىن جۇمىس كوزدەرى دە اشىلادى دەپ كۇتەمىز.
ماڭعىستاۋ وبلىسى
