جارىس جولىنا شىققاندار اراسىنان كوپتەگەن بەلدى بالۋاندى تانىدىق. ماسەلەن, باق سىناۋشىلار قاتارىندا قازاق كۇرەسىنەن «قازاقستان بارىسى» جوباسىندا جۇلدەگەلەر قاتارىنان كورىنىپ, كورەرمەندەردىڭ كوزايىمىنا اينالعان رۋسلان ابدىرازاقوۆ پەن سايات شامشيەۆتى, ەركىن جانە گرەك-ريم كۇرەسىنەن ەلىمىزدىڭ ۇلتتىق كومانداسىنىڭ مۇشەلەرى, ازيا ويىندارى مەن قۇرلىق چەمپيوناتىندا اتوي سالعان ادىلەت داۋلىنباەۆ, نۇرعالي نۇرعايىپ ۇلى, ازات سىدىقوۆتى, دزيۋدودان جاستار اراسىنداعى الەم بىرىنشىلىگىنىڭ قولا جۇلدەگەرى سانجار جابروروۆتى, كاراتەدەن ءۇش دۇركىن الەم چەمپيونى سايان ءجاندىلديندى, سامبودان بىرقاتار رەسپۋبليكالىق جانە حالىقارالىق تۋرنيردە توپ جارعان رامازان تەمىرعالي مەن بەكارىس شىڭعىسبەكتى, ارالاس جەكپە-جەكتىڭ حاس شەبەرى اڭساعان قۇساينوۆتى كوزىمىز شالدى. سونداي-اق قويان-قولتىق ايقاس, گرەپپلينگ, برازيليالىق دجيۋ-دجيتسۋدىڭ حاس شەبەرلەرى دە ءوز ونەرلەرىن ورتاعا سالدى.
جارىس 11 ساعاتقا سوزىلدى. تۇسكى 14:00-دە باستالعان جەكپە-جەكتەر 01:00-دە اياقتالدى. بىراق جانكۇيەرلەردىڭ ەشقايسى ورىندارىنان تۇرىپ, تاراپ كەتكەن جوق. ء«سادۋ ارەناعا» جينالعان جۇرت ءار ايقاستى تاپجىلماي تاماشالادى. اقىرى 32 بالۋاننىڭ اراسىنان ازامات باقىتوۆ پەن رۋسلان يسرايلوۆ وزىپ شىقتى. العاشقىسى – مما-دان الەم چەمپيوناتىنىڭ جۇلدەگەرى, ازيانىڭ ەكى دۇركىن چەمپيونى, ەكىنشىسى – برازيليالىق دجيۋ-دجيتسۋدان الەم چەمپيونى, ازيا ويىندارىنىڭ جەڭىمپازى. ولاردىڭ جاسى, سالماعى جانە بويلارى دا شامالاس. ءدال سول قوس ءدۇلدۇل «Nomad Wrestling»-ءتىڭ تۇساۋكەسەر ءتۋرنيرىنىڭ فينالىندا جولىعىپ, سول باسەكەدە باقىتوۆتىڭ (سالماعى 90 كگ) باعى جانعان ەدى. بيىلعى اقتىق سىندا دا كورەرەمەندەر ىمىراسىز ايقاستىڭ كۋاسى بولدى. ەكەۋى دە شەبەرلىكتىڭ شىنايى ۇلگىسىن كورسەتتى. دەسەك تە قارسىلاسىنا قاراعاندا ءسال شيراق قيمىلداپ, العىرلىق تانىتقان 32 جاستاعى ىشكى ىستەر مينيسترلىگى مەملەكەتتىك مەكەمەلەردى كۇزەتۋ جونىندەگى مامانداندىرىلعان كۇزەت قىزمەتىنىڭ ينسپەكتورى ازامات باقىتوۆتىڭ اسىعى الشىسىنان ءتۇستى. ول 10:8 ەسەبىمەن جەڭىسكە جەتتى. ءسويتىپ, قاتارىنان ەكى رەت باس جۇلدەنى ولجالاعان ساڭلاق «Nomad Wrestling» جوباسىنىڭ جەتەكشىسى ءارى پرەزيدەنتى ماقسات قيقىموۆتىڭ قولىنان 10 ميلليون تەڭگەنىڭ سەرتيفيكاتىن الدى. كۇمىس مەدالدى مويىنا تاققان 29 جاستاعى رۋسلان يسرايلوۆقا (سالماعى 92 كگ) 3 ميلليون تەڭگە تابىس ەتىلدى.
ءۇشىنشى ورىن ءۇشىن تارتىس ەركىن كۇرەستەن ەل چەمپيونى, بىراقتار حالىقارالىق ءتۋرنيردىڭ جەڭىمپازى نۇرعالي نۇرعايىپ ۇلى (سالماعى 95 كگ) مەن قويان-قولتىق ايقاستان ازيا چەمپيونى, پانكراتيوننان الەم چەمپيونى نۇرتاس جۇماعازى ۇلى (سالماعى 97 كگ) اراسىندا ءوتتى. بۇل باسەكەدە نۇرعاليدىڭ مىسى باسىم بولدى. جارىستىڭ قولا جۇلدەگەرى 1 ميلليون تەڭگەنى قالتاسىنا باستى.
اتالعان تۋرنيردە 20 جاستاعى ادىلەت احمەتقاليدەن باستاپ, 43 جاستاعى ەراسىل ابدوللاەۆ پەن اڭساعان قۇسايىنوۆ تا كۇش سىناستى. سانجار جابروروۆتىڭ سالماعى 135 كگ بولسا, يسلام ماميلوۆ, ادىلەت احمەتقالي, ازات سادىقوۆ, رامازان تەمىرعالي, جالعاس ايداردىڭ سالماعى 80 كگ-دان ازەر استى. ەڭ ەڭسەلى بالۋانداردىڭ كوشىن رۋسلان ابدىرازاقوۆ باستادى. تالاي ءدۇبىرلى دودادا تۇيە بالۋان اتانعان قازاق كۇرەسىنىڭ حاس شەبەرىنىڭ بويى 196 سانتيمەتر.
وسى جوبا اياسىندا سۋپەر جەكپە-جەكتەر دە ۇيىمداستىرىلدى. سونىڭ بىرىندە زامزاگۇل فايزوللانوۆا مەن ەركەجان ەرلانوۆا شەبەرلىك بايقاستى. زامزاگۇل – دزيۋدودان ەلىمىزدىڭ 5 دۇركىن چەمپيونى, قازاق كۇرەسىنەن كوشپەلىلەر ويىندارىنىڭ كۇمىس جۇلدەگەرى, ارالاس جەكپە-جەكتەن «الاش پرايدتىڭ» چەمپيونى. ەركەجان – برازيليالىق دجيۋ-دجيتسۋدان الەم چەمپيوناتىنىڭ سان مارتە جۇلدەگەرى, ازيا چەمپيونى. بۇل بەلدەسۋدە تاجىريبەلى فايزوللانوۆا ايقىن باسىمدىق تانىتتى. باسەكە اياقتالعان بەتتە زامزاگۇل ايەلدەر كۇرەسىنەن الەم چەمپيوناتىنىڭ ءۇش دۇركىن ءفيناليسى, ءبىر مارتە قولا جۇلدەگەرى, ازيا ويىندارىنىڭ ءفيناليسى, ازيانىڭ ءتورت دۇركىن چەمپيونى ءجاميليا باقبەرگەنوۆانى جەكپە-جەككە شاقىردى.
كەلەسى كۇنى «Nomad Wrestling Junior» جارىسىن تاماشالادىق. جاستار اراسىندا وتكەن ءدۇبىرلى دودادا ابدوللا باتىربەك دارا شىقتى. استانالىق دجيۋ-دجيتسۋ شەبەرى فينالدا ەلوردادان كەلگەن تاعى ءبىر سپورتشى, گرەك-ريم كۇرەسىنىڭ وكىلى ياكبو ۆيللەردى ايقىن ۇتتى. قولا مەدالدى تالدىقورعاندىق الىشەر ساكىموۆ ەنشىلەدى. ءۇشىنشى ورىن ءۇشىن تارتىستا ول الماتىلىق رافاەل ورىنباەۆتان ايلاسىن اسىردى. جاس ورەندەردىڭ جارىسىندا جەڭىس تۇعىرىنا كوتەرىلگەن سپورتشىلارعا 2,5 ميلليون, 1,5 ميلليون جانە 1 ميلليون تەڭگەنىڭ سەرتيفيكاتتارى بەرىلدى. بىراق سىياقى ولاردىڭ قولدارىنا بەرىلمەيدى. ۇيىمداستىرۋشىلار بۇل قاراجاتتى كەلەشەكتە جاس سپورتشىلاردىڭ وقۋىنا جۇمساۋدى قۇپ كورىپ وتىر.
