قويىلىم شاكارىم قۇدايبەردى ۇلىنىڭ «ۇجدان» اتتى اڭگىمەسىنىڭ جەلىسىمەن ساحنالانعان. سپەكتاكل ادام بالاسىنىڭ ار-ۇياتى, ابىرويى مەن قادىر-قاسيەتى تۋرالى وي قوزعايدى. قويىلىمنىڭ ساحنالىق نۇسقاسىن جازعان – نۇركەن تۇرلىبەك, قويۋشى رەجيسسەر – ازامات نىعمانوۆ. قويىلىمدى تاماشالاۋعا پارلامەنت دەپۋتاتتارى, جەرگىلىكتى اتقارۋشى ورگانداردىڭ وكىلدەرى قاتىستى.
ايتا كەتەيىك, گاسترولدىك تۋر اياسىندا تەاتر ۇجىمى تەمىرتاۋ, قاراعاندى قالالارىنا دا بارادى. گاسترول تەاتردىڭ 35 جىلدىعىنا وراي ۇيىمداستىرىلعان. وسى ۋاقىت ىشىندە تەاتر ۇجىمى «پودموسكوۆنىە ۆەچەرا» حالىقارالىق تەاتر فەستيۆالىندە «ۇزدىك انسامبل», «كورول لير» قويىلىمى ءۇشىن «ۇزدىك ستسەنوگرافيا», «ەگىزدەر» سپەكتاكلى ءۇشىن «ۇزدىك رەجيسسۋرا» سياقتى ماراپاتتارعا يە بولدى.
سونىمەن قاتار پاۆلودار تەاترى 2024 جىلعى «قازاقستان تەاتر سىنشىلارى بىرلەستىگى» سىيلىعىنىڭ بىرنەشە اتالىمى بويىنشا جەڭىمپاز اتاندى.
